曾經，有個人被稱作民主黨大腦。講緊當然就係IQ160的羅致光。我唔知點解佢會做到民主黨大腦，可能佢IQ高，但淨係要IQ高的話，去些甚麼資優學生會度求其「的」個人都有啦。如果講業績，好似佢做咁多年大腦民主黨的表現就一年衰過一年，根本就係腦細，晨早該炒。基本上，我懷疑羅致光做大腦／腦細係拖累民主黨，所以我覺得民主黨應該開香檳慶祝呢個大腦／腦細去左777度，輪到777受其害。我真係恭喜妳呀！
民主黨歷年立法會選舉戰果（議席／得票率）（直選only）
1998 9席（20席直選）/42.9%
2000 9席（24席直選）/ 35.0%
2004 7席（30席直選）/ 23.7%
2008 8席（30席直選）/ 20.7%
2012 4席（35席直選）/ 13.7%
2016 5席（35席直選）/ 9.2%
777受咩害呢？長者綜援風波。其實都唔只係羅致光的問題，畢竟有人指出以往政府都有計劃過，再加上有777呢個乜都要計一餐婆乸數的公務員腦特首，冇羅致光都遲早會咁做。不過至少對我嚟講，件事好笑在，呢頭cut錢本來係為長遠人口乜乜乜，轉個頭就為咗比親中派有得唔見間廠成功爭取粒糖，又整個短視到暈的就業津貼，好明顯呢個政府就冇晒方向，見招拆招。不過777係咁架啦，口講就天下無敵咩管治新風格，其實咪又係咁。
話時話我同羅致光有過一面之緣，雖然都係我識佢佢唔識我嗰隻。我仲喺港大讀書時，上過佢一堂。我都自問領悟能力高的了，上咁多其他教師（廢唔廢都好）的堂我都明，唯獨是羅致光嗰堂我完全唔知佢up乜。可能你話人地IQ高，太高層次我理解唔到。可能啦，但我覺得，你屈埋喺房做research係一件事，講到教書，講到學生明都應該掛。又或者，純粹我唔係嗰D唔明就會話「呢個人真係高深勒」嗰隻人。可能民主黨好多呢D人，我唔知。
By the way，壽命延長就要延長長者定義，咁係咪都應該改埋其他嘢？例如120歲時，免費教育起碼到30歲啦吓話？關愛座起碼80歲先坐得啦吓話？唔知衰11洗唔洗改埋一份？
