眾新聞 Logo
眾新聞 CitizenNews
眾聞

殺病妻黃伯下月出獄 「香港要有安樂死」


 


81歲老翁黃國萬,獨力照顧76歲中風癱瘓妻子,他因身心疲累、擔心病妻在他死後沒人照顧,前年以竹枝將妻勒死。黃國萬之後自首及承認誤殺罪,獲法官法外開恩輕判囚兩年,他已還柙18個月,扣減刑期及履行懲教署相關規例後,料下月可出獄。工黨立法會議員張超雄,今早到監獄探望黃國萬,指黃伯身體安好,精神不俗。

黃伯的經歷令社會關注基層老年照顧者的重擔。張超雄表示,黃伯希望他向記者及公眾傳達以下訊息︰

81歲黃國萬仍在獄中,料下月獲釋。蘋果日報圖片

「多謝大家嘅關心同埋問候,我都一一收到。字我唔識得多,希望張議員幫我傳話。我嘅故事已經喺法庭公開,希望呢件事告一段落,我亦都透過張議員收到唔少記者邀約訪問,不過我最想係平靜地過日子,做返一個普通人,出返嚟之後暫時唔想見人,亦唔想再提呢件事,希望記者明白,亦都唔希望記者喺我屋外附近等候,否則我都不知道出返嚟之後可以去邊度暫住。

有關照顧者嘅問題,我覺得香港要有安樂死,咁樣社會就唔使嘥咁多資源,窮人唔使咁慘,我哋唔會有錢請工人,唔會有錢去請三更看護。我曾經帶太太到老人院,見過有老人家淨係識抖氣,但唔識郁,連說話都講唔到。一個人最困難就係生不如死,我明白螻蟻尚且偷生,但病起上嚟係冇選擇。香港嘅老人服務唔係冇得做,但要係中上階層、有錢人先會用得起,我哋呢啲低下草根階層做唔到。

我知道社會唔係咁接受安樂死,講出嚟實俾人鬧,張議員幫我講出嚟,佢都會俾人鬧。但只有生活有經驗、受過折磨嘅人,先會明白點解我會提出要有安樂死。

最後,我認為社會要有多啲同路人,大家同心合力,社會同埋制度先會有改變,社會要多啲幫助窮人。」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe