眾新聞 Logo
眾新聞 CitizenNews
眾說

古巴行(18)斗零有交易!


香港嘅雜貨鋪,一般面積細但啲貨好多,有時轉身都有啲難度,古巴大部份雜貨鋪一樣好細,雖然冇香港啲貨多到咁誇張,但有人氣有活力,而Trinada(千里達)呢間雜貨鋪,嚟自火星與別不同- 貨品疏疏落落,好有裝置藝術feel,令呢間幾大嘅鋪頭,睇落去仲大仲空蕩冷清。

原來呢間係古巴嘅配給店。 不過,令骷髏小姐差啲大叫嘅,係配給店裏面塊黑板!

斗零有交易!

香港最普通嘅太古砂糖,約HK $6.3一磅(2014),古巴產糖,糖應該平,但HK$ 0.05一磅?斗零有交易???!!!斗零歲月,喺香港係多少年前嘅事?香港最普通嘅餐桌鹽,約HK $2一磅(2014),古巴HK$0.11!黑板列出嘅貨品,仲有雞蛋油等等,平到你唔信,如米只HK$ 0.18/公斤!
 
點解咁平?除咗古巴人均收入低物價平,主要係政府大量津貼物價,用簿仔Ration book行配給制。

唔講唔知,原來古巴唔單止啲車古董,配給制亦係歷史最悠久,共56年!除咗糧油,仲有兩類配給店:

咁點解行配給制?

古巴嘅配給制

古巴行配給制,當然係日用品同農產品供應唔夠。古巴革命成功後,工業同土地收歸國有,啲農地雖再分俾農民,但農民要將收成70%賣俾國家(其餘可賣俾自由市場),而政府收購價好低,農民冇誘因增產,另外工業生產因計劃生產冇彈性,農業用機器產量少,造成農業生產效率低;呢兩樣令農產品供應嚴重不足。咁點解唔進口?因為hard currency賺得少,咁點進口拖拉機同化肥?咪又係果句:美國經濟制裁,然後蘇聯解體,叫停對古巴經緩。
 
卡斯特羅行社會主義,強調公平分配,老百姓糧食同日用品供應唔夠,為咗避免貧富分配不均,政府便實施配給制, 配售生活基本需要,數量雖少但均等,更重要係避免出現大飢荒和社會動亂。
 
初期,配給貨品種類唔少,但政府長期大量津貼物價(聽講每年達80億港元),財政唔掂,於是減少配給種類,例如之前小朋友每年可買三款玩具,但1991年取消,被取消嘅仲有牙膏、番梘同茄汁等。配給食物物品嘅種類,雖然少咗好多,但好彩配給價56年冇咩點變,古巴人收入雖然好低,但因為有配給制,仍可勉勉強強應付基本生活開支。
 
對依賴配給制嘅古巴人,配給制確有好處,但問題多多。

偷牛,坐18年!

首先,古巴配給制最大嘅問題係貪腐。因死亡人口、人口遷移或其他原因,一定有唔少配額冇用到,配給店店員可將「剩餘」貨品,轉賣他人,等佢哋買到平價配給品,大家都有著數。事實上,配給店店員嘅違規事件,古巴官媒都有唔少報導。
 
仲有,配給品要喺特定日期內買,所以貨品一上架,就大排長龍,浪費時間精力。另外,產量成日同市場需求脫節,未必買到簿仔列明嘅配給數量,幾時有得買?可以買幾多?存在好大嘅不穩定性。

喺古巴旅行個陣,酒店嘅食物種類好多:櫻桃番茄、翠玉瓜同青瓜等,如單睇呢個表像,會唔知古巴老百姓食物短缺嘅問題原來咁嚴重,呢啲櫻桃番茄、翠玉瓜同青瓜,原來對好多古巴人係奢侈品,配給店冇得賣。既然呢啲遊客需求大價高,農民自然會種多呢啲,此消彼長,古巴人基本糧食供應,更加緊張;原來我哋遊客同古巴人爭食。
 
所以,古巴人如出國, 會帶奶粉番古巴;所以,雖然偷牛,可以坐18年,但仍有古巴人挺而走險。呢啲就係古巴配給制下,一啲都笑唔出嘅古仔。不過,亦有唔少古巴人唔使點靠配給制,佢哋有咩對策?下回分解。
 
圖1,2 : 作者提供,圖3-5: 網絡圖片,作者整理資料並製圖
初稿17.03.2014,2018年11月修訂更新


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe