【撰文：鄧永謙】
作者為新福事工協會關懷貧窮學校事工主任
在機構樓下遇到外判清潔工友群姐，原來佢唔知自己是否合資格申請關愛共享計劃嗰四千蚊。
「你夠18歲未呀？」
「我六十幾喇！」
冇物業、冇交税又冇領取過任何長者或成人福利金，過哂六關合哂資格，但係唔知點樣拎表……
於是從背囊拎份表格同申請需知嘅影印本，連埋信封俾佢，順便教埋佢點填同要準備埋有關文件，仲有附近最近收申請表嘅地方。
「$4000有冇半個月嘅人工呀？」
「唔止半個月喇！我一個月得六千幾蚊咋……」
因為群姐本身有長期病患，要經常去醫院覆診，所以每個月只可返廿日工左右。
其實群姐今年已經六十四歲，問佢會否之後考慮申請長生津或高齡長者津貼？
「唔搞咁多嘢喇……聽好多人講要去見福利官，又話要俾人查乜查物……」
「嗰種係叫長者綜援，同長生津嗰啲唔同㗎……」
「哎呀……事旦啦，我仲叫做得嘢，唔想攞嗰啲錢，淨係拎呢四千蚊夠喇。」
呢幾日，其實接觸到不少好似群姐處境嘅故事，或者呢四千蚊嘅金額，我哋自己拎唔拎到可能影響唔大，但對於一大班基層勞動街坊而言，其實真係唔少，但可惜佢哋真係唔清楚可以點樣做……
好似有位清潔工友，為咗養家每日直踩兩更，由朝六至晚十一，根本連去拎表格嘅機會都無。
「佢叫我上網下載表格，不如叫我唔好申請仲好啦！」
而當中更好真實地見到過去政府福利制度所塑造的標籤化，以及勞動市場外判及零散化的剝削，對基層特別是長者所造成的影響有幾咁嚴重。
雖然應該繼續勁鬧個申請手續有幾咁擾民同反智，但同時間亦想有更多有資格、有需要但唔知可以點申請嘅街坊鄰舍，最終可以受惠，希望做得幾多得幾多、做得一個得一個……
