眾新聞 Logo
眾新聞 CitizenNews
眾說

避免大愛變成大恨——歐盟同挪威嘅家庭團聚政策


物價取決於供應同需求,醫療服務嘅數量(如人均醫護人員、人均病床數目等),同埋代價(如輪候時間),都係由供求決定。呢十幾年,醫療服務需求倍增,但公立醫院病床數目竟然少咗,未去番沙士前數目(見陳沛然醫生文章),唔爆煲至奇。
 
香港醫療爆煲,非始於今日。供求嚴重脫節,有需求亦有供應嘅因素,正如黃任匡醫生同埋好多評論强調,單程配額,唔係爆煲嘅單一原因,要正視所有原因,情況先會改善,但單程配額係人口增長嘅主因,為咗避免短期內攬炒,暫停/削減每日150個單程配額,可令未來幾年需求稍減,令醫護人員唞唞氣。與此同時,要爭取攞番單程配額審批權,仲要質詢林鄭月娥政府嘅人口估算,如果任由政府對人口政策左閃右避,用啲似是而非嘅數字同論述去誤導公眾,好多民生問題只會不斷惡化,不斷爆煲,如教育、房屋、交通同環保等等,更加唔使講,林鄭月娥就係用人口增長嚟合理化倒錢落海 -東大嶼1,700公頃填海呢個大白象工程;我哋要攞番本來屬於我哋嘅人口政策話語權!

網絡截圖:"Family reunification regulation in Norway – A summary", 2017, Institutt For Samfunnsforskning

就單程證配額同家庭團聚,林鄭月娥成日教訓我哋要包容,但一個對輪候公屋小市民,對領取綜援長者,咁涼薄嘅林鄭月娥政府,同我哋講大愛包容?虛偽無恥。好,林鄭月娥講大愛包容,咁就睇下講人權嘅歐盟,同埋盛產大愛包容嘅挪威,喺家庭團聚政策上,係咪淨講包容而中門大開?

備註:
(1)對難民申請家庭團聚,歐盟和挪威的要求會較寬鬆。
(2)挪威還有聯繫要求("Attachment Requirement", 2017):挪威可拒絕家庭移民申請,如果該家庭可在安全的第三國家生活,並且和挪威相比,該家庭和這第三國有更強的聯繫。
資料來源:Report 2017:06 Family reunification regulations in Norway and the EU,作者整理資料並製圖

由上表可見,講家庭團聚,歐盟同挪威, 唔係淨講包容人權而中門大開,點解呢?
 
挪威自2000年家庭移民不斷增加,佔所有非北歐移民40%,如中門大開,唔知邊年會好多人嚟,唔知社會嘅承載力會唔會過紅線,仲有,喺財政預算同負擔、經濟發展,基建同公共服務, 唔能夠準確規劃,所以人權包容,都要兼顧有秩序移民,兩者要平衡。
 
但挪威地大人少,2017年家庭移民先係1.6萬,有排先會過紅線啦,使乜咁多要求? 因為社會嘅移民承載力,主要涉及(1)公共服務(2)不同文化嘅融合,移民數目幾多係唔夠?/合適?/過咗紅線? 除咗客觀標準,仲有每個社會嘅主觀期望同觀感,呢啲主觀期望同觀感,每個人未必相同,係一個動態同爭論不休嘅議題,但最重要係,當移民數目遠超客觀標準/主觀期望,咁本地人自然就會覺得資源被移民佔用,唞唔到氣,民怨四起,本地人同移民,會出現對立,關係就難修補,對國家對本地人對移民,是禍不是福。追求包容嘅理想社會,應該支持,但要務實,歐盟挪威,唔係淨講大愛包容原則而忽略大局,希望避免將大愛變成大恨。
 
曾幾何時,我哋對內地人,只有大愛——盡心盡力支援天災地區同埋為六四平反等;曾幾何時,我哋對內地來港嘅左鄰右里,關懷幫助,因為社會承載力未過紅線,我哋仲有餘力助人自助。林鄭月娥最近去咗瑞士Davos嘅世界經濟論壇,話喺佢哋身上明白要謙卑,但係歐盟同挪威嘅家庭團聚政策,點解佢又唔學呢?因為林鄭月娥選擇只服務北京,呢啲「管治新風」,已成為佢嘅禍港註冊嘜頭。
 
附註:
有住所要求的歐盟成員國是:AT, BE, BG, CY, CZ, DE, EE, EL, ES, FR, HU, IT, LT, LU, LV, PL, SE, SK, UK

有醫療保險要求的歐盟成員國是:AT, BE, BG, CY, CZ, DE, EE, EL, ES, HR, HU, LT, LU, LV, PL, SI

有足夠經濟能力要求的歐盟成員國是:AT, BE, BG, CY, CZ, DE, EE, EL, FI, FR, HR, HU, IE, LT, LU, LV, NL, PL, SE, SI, SK, UK

有融合要求的歐盟成員國是:FI, IE, LU

有等待時間的歐盟成員國是:BG, EE, IE, FI, HR, HU, IT, SI, SE, SK


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe