眾新聞 Logo
眾新聞 CitizenNews
眾說

今日挪威,明日香港?


粵港澳大灣區發展規劃綱要》(下稱《規劃》)出爐,令我諗起挪威同埋歐盟,會唔會今日挪威,明日香港? 將歐盟、挪威同大灣區扯埋一齊,九唔搭八,點解?因為大融合呢三個字。

歐盟成立嘅目的係擴大自由貿易區,講4個自由流通:貨物、服務、人同資金,講大融合一體化,而《規劃》內容正正就係講4個自由流通大融合,唔止咁,《規劃》仲用埋「大融合」甚至「一體化」呢啲字眼,仲有,中國華南理工大學鄭永年話,大灣區計劃有歐盟嘅好處,但有中央協調,冇歐盟協調不足嘅問題。大灣區規劃梗係唔係咁筍啦,呢個世界,點會有免費午餐?挪威唔係歐盟成員,係EEA(歐洲經濟區)成員,EEA同歐盟簽咗協議(1994年生效),協議俾EEA成員享受歐盟成員4個自由流通嘅好處,但睇挪威同歐盟呢25年嘅大融合 ,喺自主權上,挪威要俾沉重代價 。

挪威嘅得與失– EEA同歐盟嘅協議

挪威可享有4個自由流通咁大好處,有得梗有失:

資料來源:(1)"Norway's financial contribution",2017,Government.no(挪威政府網頁)(2)"Ofte stilte spørsmål",2017挪威政府網頁,作者整理資料並製圖。

OK,俾錢歐盟啫,挪威產油有米,錢相對次要,最攞命係1994年到而家,歐盟一共塞咗11,000條歐盟法例指令俾挪威,因為根據協議,EEA成員要遵守同協議內容有關嘅歐盟指令,而新指令每年約500條逐年增加,咁咪會削弱挪威嘅自主權囉。咁誇張?冇呃你,不如一齊睇下啲實例, 睇下EEA同歐盟簽咗協議後呢25年, 呢張「賣身契」,點樣將挪威逐忽逐忽削肉。

資料來源:"Så mye makt har Norge gitt til EU gjennom EØS - etter at vi sa nei til EU", 2018, nettavisen(挪威媒體),作者整理資料並製圖。

今日挪威,明日香港?

挪威簽咗呢張EEA「賣身契」,就俾歐盟不斷咁合法地「擴建」協議同埋指令,令挪威民生環保等等,如食物安全同埋質素下降;上面嘅實例, 就係個「劣幣驅逐良幣」嘅教科書例子,係經濟一體化嘅必然之惡,特別係挪威細而歐盟係大集團。不過更嚴重嘅係,挪威自主權受到嚴重侵蝕,唔止係經濟領域,仲有其他各方面。歐盟為咗自己大集團嘅利益,就合法地有權用盡,但歐盟始終生活質素唔差,「劣」極都有啲譜,況且歐盟講人權法治講民主講透明度,始終有法例同程序公義規範。
 
睇挪威同歐盟大融合經驗 ,今日挪威,明日香港?要香港融入大灣區,要4個自由流通,香港咪要同中國嘅劣質法例融合一體化囉。況且香港面對嘅中國共產黨,淨講霸權人治,唔講人權法治精神,共產黨實會借住大灣區呢個規劃,乘機伸手嚟,全面管治香港。林鄭月娥冇水晶球,又唔係一男子,佢竟然可以拍心口話「大灣區規劃唔會影響香港自主」,簡直侮辱我哋香港人嘅智慧,難聽過粗口。
 
附註 : 挪威的自主權– EEA和歐盟協議
挪威的自主權,取決於EEA和歐盟協議的內容,協議涵蓋的領域的關法例,由歐盟決定,挪威的自主權最小。

資料來源:"NEI til EU ble JA til veldig mye", 2014, Aftenposten(挪威媒體)

 


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe