眾新聞 Logo
眾新聞 CitizenNews
眾說

【舔共又怕得罪美帝 做雞又要貞節牌坊】引渡協議+大灣區+DQ報告,香港政策法仲唔死得?


較早前美國國會出報告,話香港受中共操控日益嚴重,可能不再值得享有獨立於中國以外的優待,嚇到成班親中商界急急跪求唔好,最好笑當然係自由黨講完支持23條即刻反悔。隔咗一排啦,美國佬唔出聲啦,以為冇事,班友又繼續支持中共魔爪如引渡協議、大灣區、DQ報告等等。結果尋日美國佬又出聲,話下次報告可能嚟真。

美駐港總領事唐偉康出席無綫節目《清心直說》時表示,修訂移交逃犯條例「或影響美國與香港的雙邊協議」。無綫電視節目截圖

成班人毫無政治同大局觸覺,一味識得賺easy money(i.e.要有中共/美帝優待打救先識賺錢,冇咗唔知佢哋點生存),係咁上下。成日話咩美國喺香港有錢賺,唔會嚟真,真係笑死人。人哋唔係淨係睇錢,係睇埋政治,睇埋長遠布局架嘛。你夠佢哋喺大陸多錢賺咩?人哋咪一樣打貿易戰?

香港於美國的價值,除咗賺錢,仲有安全港。唔理佢係咪真係甚麼用香港當橋頭堡派間諜入大陸搞事都好,至少美國政商人士喺香港係安全的,因為香港係法治社會,點樣唔會比人捉係好清楚,唔似依家加拿大捉咗孟晚舟,大陸就即刻莫須有捉返你幾廿個加拿大人。當然,美國都接受如果逃犯如斯諾登走嚟香港,佢哋都耐唔到咩何。總之香港係個雙方都接受的平衡點。

但你有引渡協議就唔同啦,會打破依個平衡。唔理香港法律講乜,中共叫港府拉人,港府敢say no咩?嗱,湯家驊講得好明架早幾日,「外籍法官會被中共買起咩?」即係中國籍法官就買得起啦,咁依家香港係中國籍法官多定外籍法官多呀? 仲有長遠嚟講邊面會更多呀?咁美國政商界人士仲夠唔夠膽嚟香港?加拿大對大陸發旅遊警告,係咪應該包埋香港?

DQ報告同大灣區呢,就唔直接關事,但就顯示港府係被中共完全操控。如果DQ唔係中共落嘅柯打,使事後交報告咩?

早幾日又另一單好笑,就係譚耀宗話咩美國唔會搞香港。譚耀宗幾時做咗白宮發言人?咁清楚美國佬諗乜嘅?仲有,一方面要舔中共海鮮,一方面又驚美國佬搞香港,依種擺明係做緊牆頭草二五仔,想食兩家茶飯lam盡着數的姿態,咪抵比人笑囉。所以話香港冇晒優待都係班政商界所謂「精英」 自己攞嚟,唔好又賴人哋呀。正是:

舔共又怕得罪美帝 做雞又要貞節牌坊


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe