眾新聞 Logo
眾新聞 CitizenNews
眾說

高處不勝寒──香港被規劃為大灣區融資中心


大灣區香港被規劃嘅其中一個重要角色,係做大灣區融資中心, 重點係要 (1)擴大區內人民幣跨境使用規模同範圍,(2)成為高新科技產業融資中心,(3)知識產權證券化試點,(4)綠色金融中心同埋國際綠色債券認證機構等。做大灣區融資中心,唔排除會帶旺下香港金融市場,但危會多過機,因為呢啲金融產品好高風險。知識產權證券化,係資產證券化其中一種,咁我哋一齊先睇下係咩,再睇下知識產權證券化同綠色債券認證, 點解咁高風險。做呢啲金融產品中心,唔單止可以嚴重影響香港嘅財政健全,同埋聯繫匯率,更同個人投資有好大關連, 又點解呢?

資產證券化、 知識產權證券化

作者整理資料並製圖
作者整理資料並製圖

好,咁而家就睇吓大灣區資產證券化、知識產權證券化,同綠色債券認證,點解對香港咁高風險。

大灣區雷曼?──資產證券化

仲記得2008年金融風暴同雷曼事件嗎? 嗰次搞到咁大鑊,就係美國嘅資產證券化出事。當年利息好低,人人借錢買樓,市面好多物業按揭,投資銀行用槓杆原理,將按揭證券化,為咗賺到盡,搏命發行按揭衍生債券,因為發呢啲賺嘅利潤,比一般賺嘅債息以倍數計,但係當越嚟越多業主還唔到按揭,令按揭衍生債券嘅投資者卻步,令投資銀行週轉不靈,同時令樓價大跌,惡性循環,最終爆煲。

中國嘅金融系統,一向資訊唔透明,系統法規同監管,一直未能同國際接軌,第日大灣區資金互通,香港被規劃為金融中心,咁大灣區9市嘅銀行,會唔會將大量嘅物業按揭包裝成按揭衍生債券呢?其中嘅不良按揭會佔幾多呢?大家都心中有數。會唔會最終雷曼事件重演?

會唔會估高好多?──知識產權證券化

知識產權(Intellectual Property, 下稱IP)證券化,風險仲高, 因為 IP 同按揭衍生債券有點顯著嘅唔同──對將來現金流(cash flow)嘅估價(Valuation)。IP 比後者更加冇咁靠譜,因為後者嘅將來現金流,係每月按揭還款,始終有物業市場價格同埋市場利率做指標, 而IP將來版權、商標、專利權等收入估價,雖有方法估算,但不可知因素太多,如某歌手音樂突然唔流行冇市場,又例如一隻攞咗專利權嘅新藥,如果專利權屆滿, 競爭對手就出咗更好嘅新藥,咁佢哋嘅版權/專利權收入就會插水,實質估價比原先低好多,如果買咗呢啲IP證券,咁咪跌到阿媽都唔認得囉。

所以,要掌握IP估價準確性,難度好高,以中國報喜不憂嘅慣例,會唔會大幅高估IP估價?香港作為大灣區知識產權證券化試點,會影響聲譽,係咪好弊?

另外呢個問題仲嚴重。騰訊嘅遊戲《王者榮耀》本來熱賣,但中國官媒狠批「扭曲價值觀和歷史觀」,話令學生沉迷喎,結果2018《王者榮耀》推行實名制,仲將玩家資料傳俾公安數據平台嚟判定玩家係咪未成年,之後系統就會自動限制未成年玩家遊戲時數(12歲以下1粒鐘,12-18歲兩粒鐘);當玩家課金時,系統亦會聯絡監護人,騰訊仲話為咗保護未成年玩家,會將旗下遊戲逐步接入公安數據平台,嘩!咁將來版權收入咪大跌囉。喺中國,處處紅線,IP證券化本來有利創新融資,本來係商業運作,但隨時分分鐘變成政治操作,唔單止窒息創新產業,更隨時令投資者血本無歸,死未?

結論係:喺所有國家,IP證券產品嘅風險,比其他資產證券產品高,但中國嘅IP證券產品,風險更高,因為中國政治掛帥高於一切,風雲莫測,話變就變。香港被規劃為金融中心,即係將來會好多IP證券產品充斥香港巿場,問你驚唔驚?

香港被規劃為大灣區融資中心。

將紅變綠?──為大灣區綠色債券認證

港府近年大力推動綠色金融發展,金管局2018首5個月,已有13隻綠色債券在港發行,規模達50億美元,為配合發展,香港品質保證局推出「綠色金融認證計劃」,為發行人提供第三方認證服務......金管局表示,已經受國際認可的環保項目會納入「綠色通道」,未受認可的將排除在「紅色通道」。由於科技進步,今日並非環保的項目,未來有可能會成為市場認可的綠色工序,以煤炭為例,目前燒煤發電並不環保,理論上不會納入「綠色通道」,但若果申請者表示有環保的方式去使用煤,局方會將其歸納到「紅色通道」,同時要求申請者提供更多資料,若不同的專家都認同措施可行,局方亦會認可審批(2018,香港01)

香港被規劃要成為大灣區綠色債券認證中心,中國環保工作,被人咎病多年,但大融合後,香港認證水平會被拉低,會唔會被逼為大灣區「紅色通道」背書 ── 將紅變綠?

不過,有人會話唔使咁驚噃......

唔買咪得囉,梗係唔得啦

有人會話,香港有良好監管呀,最近證監咪打咗大鱷囉──〈幫大陸問題民企 IPO 出事 四大投行被證監會重罰 7.9 億元 未盡保薦人責任〉,但香港人嘅個人投資損失又點計?其實呢件事更加暴露印證中資企業嘅嚴重系統問題,香港被規劃為大灣區融資中心,大灣區企業跨境融資會倍增,以上問題只有增冇減,更唔使用水晶球,都預測到同大融合後,香港本來良好嘅監管水平,會被拉低。

又有人會話,咁呢啲按揭衍生債券同埋IP證券,我唔買咪得囉,但因為買入嘅係機構投資者,如基金、保險公司等,同你個人絕對有關。

仲有,2018陳茂波話金管局考慮用外匯儲備以股本投資方式,入股「一帶一路」項目,咁香港仲會入股大灣區項目嗎?另外,中共乾塘,今年無力撐地方,所以鼓勵地方政府發債,金管局會唔會買大灣區債券?如果買,會唔會買呢啲按揭衍生債券同埋IP證券?無論金管局投資喺項目、IP證券、債券或衍生債券,風險都好鬼高。如果萬一不幸狂蝕,咁香港人嘅身家──金管局嘅外滙基金會大跌,如果萬一不幸被大鱷追擊,香港就唔夠銀捍衛聯系滙率,港元暴跌風險大大增加。呢啲先最得人驚,呢啲就係香港被規劃為大灣區融資中心嘅高危所在。

香港「貴為」大灣區融資中心,高處不勝寒。

資料來源:

(1)Securitization of Assets

(2)10分鐘看懂金融危機- 次貸危機

(3)次按危機 雷曼爆煲 當年今日有幾恐怖?

(4)Trading IP


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe