眾新聞 Logo
眾新聞 CitizenNews
眾說

古巴行(21) 唔正常嘅生活日常


一直以來,古巴大部份(85%)勞動人口係公務員,510萬人鐵碗飯,仲唔使交稅添,呢個情況喺2010出現翻天覆地嘅變化。

公務員平均月入US$ 20,個體戶收入會多啲,但申請攞牌嘅人數,遠低於政府嘅目標,唔算好成功,反映生意唔易做。

個體戶生意唔易做

近年去過古巴嘅,唔少住過民宿,食過民營餐廳,個體户好似遍地開花,但個體戶失敗嘅例子,其實唔少。失敗其中一原因,係競爭劇烈,因入行門檻太低。最多人申請攞牌嘅係旅遊業:飲食、民宿同的士司機等。客廳變餐廳、睡房變旅客房間,同埋一架單車就可做單車的士,易入行,競爭劇烈生意唔易做。另外,稅重(每年收入US$2,300或以上,入息稅50%),難以負擔。

仲有,缺乏材料:做pizza嘅缺麵粉、電工缺電線、木匠缺木材、水喉匠缺水喉.......下刪一萬字。個體戶發牌制,令部份消費品零售同服務,可以喺市場自由買賣,但一切材料仍由國企生產同營銷,國企供應追唔上零售市場需要,造成瓶頸,唔少個體戶執笠收場。

美國對古巴嘅經濟制裁政策,五十年不變,但好諷刺,個體戶需要嘅材料,竟然唔少嚟自美國。原來美國前總統Obama放寬旅遊限制,容許美籍古巴裔人番古巴探親(之前非法),於是美國嘅親戚每次探親都搬幾大箱行李,幫古巴親戚帶貨帶材料,當然,其中唔少職業水貨客。將古巴經濟打沉嘅,係美國,「打救」古巴個體戶嘅,都係美國;古巴人對美國,愛恨難分。

不過最攞命嘅係,古巴政府政策模糊,龍門任搬。一個例子:時裝店。古巴國產成衣又貴又老套,2009開放個體戶牌照嗰陣,唔少人攞牌入口南美成衣賣,本來進口外國貨入嚟古巴賣,係非法,不過,政府大鑼大鼓叫人攞牌,呢啲進口時裝店,開到成行成市,完全無事,但到咗2013政府突然間雷厲風行執法,話進口外國成衣,打擊本地成衣生產喎,國進民退,哈哈,係咪好似中國國策?古巴政府話改就改, 唔理呢2萬間進口時裝店嘅死活,完全唔記得當初係古巴政府勸人落搭架,不愧專制政權特色。

古巴個體戶牌照制,令人諗起古巴嘅黑市市場,同埋"To be, or not to be"呢句說話。

"To be, or not to be"──大話同歪理嘅生活日常

古巴所有企業國營,但計劃經濟毫無彈性,多年來供應需求一直脫節,未有個體戶牌照制前,如果你想食魚,國營配給店未必有得賣,如果咁啱有個打魚嘅friend,同佢買條魚食,雖然非法唔過份呀;又如果你想去國營商店買建材補屋頂,sorry,供應緊張請排隊,好,乖乖守法等咗幾年,但爛屋頂等唔到,冇法,只有把心一橫,托熟人搵門路,買咗啲你需要,但來歷不明嘅建材......日積月累,成就咗古巴龐大嘅黑市市場,亦交織成古巴人嘅人際關係網,係一張互利嘅路線圖,一入網羅,習慣咗,就難以抽身。

未有個體戶牌照制前,如果你工餘打魚,將捉到嘅魚,靜雞雞非法賣俾相熟親友,而家有咗個體戶牌照制,你會點做?(1)申請個賣魚牌,選擇見光,乖乖交入息稅利得稅,洗底回歸正途?(2)繼續留喺黑市,繼續逃稅?抑或(3)選擇見光,但逃稅?因古巴發票幾乎唔存在,逃稅借火咁易。"To be , or not to be, that is the question.",呢啲就係古巴人每日面對嘅現實。

黑市市場,我哋零經驗,只可想像,"to be, or not to be",對我哋或者係掙扎,但古巴人多年物資短缺,黑市已成生活不可分割一部份,佢哋或者習慣咗已無感?唔「正常」嘅黑市,喺古巴扭曲制度下,成為改善生活嘅理所當然。諗起一啲不能認同,但被逼接受嘅生活日常,人點面對?思想雲遊,諗起香港,香港呢幾年嘅發展急速下滑,開始體會"to be, or not to be"呢個掙扎。 

特區政府嘅大話同歪理,已成為生活日常,初初聽,好嬲好扯火,但更多更大嘅大話歪理同荒謬事,無日無之,會唔會開始習慣漸漸麻木?唔正常事,開始習以為常,咁可以點對抗?

近嘅如國歌法,學校好快被逼教歪理,被逼示範謊言,作為教師、家長、香港人,點樣面對?喺日常生活中,點樣面對一個黑白顛倒嘅謊言世界?多年嚟,我哋一直唔使同共產黨交手,而家終於天真不再。諗起當年東歐對抗共產黨嘅謊言,我哋嘅對抗謊言之路,又係何模樣?

要結束鎮壓,人們須要抵制謊言,並學習「在真理良知中生活。(索贊尼辛,蘇聯著名作家及異見份子)
哈維爾用一個蔬果商做例,蔬果商在商店裡展示了「世界工人,團結起來!」的標語,因為不展示的話,可能被視為不忠;展示,並不表示蔬果商擁抱政權,而是對政權屈服的象徵。在這種制度下,為了內心平靜,為了生存,人們生活在謊言中,遮掩真正信念和渴望,做政權要人們做的事情。
但哈維爾建議人們「不必接受謊言」,不認同的標語,蔬果商可以不展示;假選舉,可以不投票;;在政治會議上,可以說出真正想法 ——在真理良知中生活」 ,這樣可以打破支撐政權體制的遊戲規則。(哈維爾,捷克著名作家及異見份子)

資料來源:

(1)"Cuba legalises small and medium private businesses", 2016,BBC

(2)"Tighter rules threaten Cuba's independent clothes sellers",2013, BBC

(3)"Cuba sets out rules and taxes for self-employed workers", 2010,BBC

(4) “The Power of the Powerless”, Václav Havel.

(5)"Live Not By Lies", Alexander Solzhenitsyn

初稿25.03.2014,2019年3月修訂更新

 

 

 

 


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe