眾新聞 Logo
眾新聞 CitizenNews
眾聞

【判決前夕】陳健民:審訊讓我有時間,陪爸爸走最後一段路


2014年雨傘運動9人被控公眾妨擾罪,案件明天(9日)宣判。自審訊結束後已經近四個月,9人明天將在庭上再聚首。「佔中三子」之一的陳健民,在三月底面對父親離世的噩耗,他感恩因為審訊提早離開教席,多了時間陪爸爸走最後一段路。

眾新聞在判決前夕訪問九子,問及各人近四個月的經歷、面對可能入獄的準備、裁決對香港的意義。其中陳淑莊與鍾耀華不欲受訪。以下是陳健民的回應:

陳健民今年2月參加渣打馬拉松,以2小時20分完成半馬。陳健民facebook照片

審訊結束(12月14日)至今近4個月,怎樣運用這段裁決前的日子?

嗰段時間都好忙。享受咗少少清閒嘅時間,因為我喺審訊之前離開咗大學,就有好幾日清閒時間,自然醒呀、喺校園散吓步,跟住就開始好忙,主要係我作為一個學者,仲有好多手尾要跟,譬如改卷、改簿,處理研究生過渡嘅問題,應承好多其他嘅出版商出書,要寫章節等。

跟住就以為可以開始寫自己回憶錄嗰部分,因為我想有個雨傘運動回憶錄。但係只做咗少少,因為爸爸身體好差,我用咗幾多時間去陪伴爸爸進出醫院,喺佢臨終嗰段時間。所以其實差唔多係咁,中間就去咗兩個旅行,一個係同其他二子(戴耀廷、朱耀明)夫婦去咗台灣休息,因為朱師母(朱耀明太太)一直想話審訊之後去台灣休息一吓。另一個trip就去咗外國,因為想喺宣判前可以同女兒一起渡過我60歲生日,我女女呢年幾去咗外國讀中學最後嗰部分。

爸爸離開,係呢段時間影響我最深嘅事,以往佢好擔心我面對個審訊。其實我無能為力,因為事實上好難去溝通,對事物嘅睇法有太多分歧,唔係政治立場,而係佢一路都好憂慮,覺得無乜需要為社會付出咁多。呢啲係好難去解開嘅分歧。但係,到咗呢段日子,大家唔需要談論太多嘢,只係需要陪伴。我覺得對我嚟講都係好大嘅祝福,可以有咁多時間陪伴佢人生最後一段路。所以好彩自己提早離開大學,呢件事(審訊)最好嘅,係畀到時間我陪伴爸爸,我非常之感恩。

4月9日有可能還柙,做了甚麼準備?

我覺得我心理上完全可以面對呢件事情,但係當然仲有好多生活上面嘅事情要處理。我好開心,天主教正義和平委員會下面有一個在囚人士嘅支援組,佢哋已經好快組成咗一啲義工,同我哋嘅屋企人聯繫。假如我哋要即時還柙嘅話,佢哋都會喺外面做啲支援,因為就算入條毛巾都有好多規定,譬如過往「13+3」(東北十三子及雙學三子)入過獄嘅朋友,都分享咗一啲經驗。我諗係好幫到屋企人,知道點樣去處理呢啲細節。

最掛心係屋企人,但最令我掛心嘅爸爸已經去咗天國。我相信佢去咗另一個國度嘅話,有另一個角度睇呢件事,我相信佢會更加諒解我做緊嘅事情,所以反而我相信佢會安心,佢都已經90歲,離開時亦都安詳。而家我相信,佢更加明白我做緊嘅事情,放下咗一啲嘢。

另外當然就係女女,佢要準備考大學,有好多嘢可能要同一個教授爸爸傾,咁我未必可以做到呢件事情。不過,可能因為咁,佢會更加成熟,其實唔係一定話有個教授爸爸keep住畀好多意見佢就係最好。佢知道自己人生方向,要處理嘅係報讀邊間學校、面試點樣準備嘅問題,希望佢變得更加獨立。

太太以前就會好擔心,呢件事會影響佢嘅情緒,但佢喺審訊過程成日嚟聽之後,我覺得佢好安然、多咗好多力量去面對。即使佢唔可能同我完全一樣,例如性格嘅分別,我係一個好樂觀嘅人,佢當然唔一樣。但我覺得佢多咗好多力量,我覺得喺審訊裡面,我哋已經做到最好,將嗰個歷史還原出嚟。我哋已經盡咗我哋嘅能力,向社會解釋清楚點解我哋要進行抗命,佢覺得咁就安心、已經係好好嘅一件事情。佢(對於佔中)一路都好支持、理解,好難得,好感謝佢。

你覺得裁決對於香港社會的意義是甚麼?

如果佢係將呢班人全部放咗嘅話,我相信唔只本土,國際社會將對香港法治重建一啲信心。如果要判我哋有罪嘅話,當然對於好多人嚟講會深深不忿,因為佢哋用緊好唔合理嘅控罪,結果法庭都係容許控方用呢啲罪告得入我哋。我諗,好多人會覺得唔公義,特別係參與咗雨傘運動嘅人,亦都會好多人好難過,因為佢哋覺得,我哋係代表緊佢哋受審,其實佢哋亦都係被審緊嘅。我諗會引起一啲憤怒、悲憤。

我覺得唔緊要,呢個過程最重要係令人唔好忘記雨傘運動。對於當時唔理解或者唔支持雨傘運動嘅人,希望佢哋開始問一條問題:呢班人其實都係有家室、有事業嘅,點解願意冒上呢啲風險,為屋企帶嚟咁大負擔,都要走到去監獄裡面呢?佢當然係覺得社會裡面有啲重大嘅問題,要開始警告、提醒個社會,無普選係唔得。我希望佢哋會問呢啲問題,即係如果能夠令唔支持、唔理解嘅人問咁樣嘅問題,我覺得公民抗命嘅意義就好大。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe