眾新聞 Logo
眾新聞 CitizenNews
眾聞

【判決前夕】戴耀廷:控方沒回應「公民抗命」,重視法庭考量


2014年雨傘運動9人被控公眾妨擾罪,案件明天(9日)宣判。自審訊結束後已經近四個月,9人明天將在庭上再聚首。「佔中三子」之一的戴耀廷,重視法庭如何理解「公民抗命」,以及以此作為減刑考量。他指:「控方唔提出反對,係咪佢都認為係一個公民抗命嘅案件呢?」

眾新聞在判決前夕訪問九子,問及各人近四個月的經歷、面對可能入獄的準備、裁決對香港的意義。其中陳淑莊與鍾耀華不欲受訪。以下是戴耀廷的回應:

戴耀廷2013年起提出佔領中環,此後雖現疲態卻不知倦。戴耀廷facebook照片

審訊結束(12月14日)至今近4個月,怎樣運用這段裁決前的日子?

同正常生活無乜分別,主要因為我呢個學期大休假,所以我又輕鬆啲,唔使教書,咁就可以做多啲其他嘢,繼續推動公民落社區、搞緊民主毅行。但呢幾個月都特別準備多咗時間同太太,每個月都同佢去一次旅行,1月、2月、3月。我又開始咗每日跑步、游泳。

(註:戴耀廷與多個民間團體發起「民主毅行重奪社區」行動,在18區遊行集會,呼籲市民登記做選民、盼為年底的區議會選舉炒熱氣氛。他於2017年中發起的「風雲計劃」,募集民主派人士參選區議會,他於上月底表示計劃已經完成,將有30多人參選今年區議會選舉。)

我哋初步覺得,即時還柙嘅機會唔係好大,但我都準備咗可能會發生。何芝君(退休理工大學社會科學系副教授)會幫手做多啲(民主毅行)統籌。因為而家去到個階段,主要係同各個區的現任議員、區內工作者做連繫工作,好多區都開始咗初步連繫,計劃緊點樣籌備毅行。如果我真係還柙,何芝君會繼續同佢哋連繫。去到毅行嘅日子,我出現唔到,大家都會繼續去。

(去了哪些地方旅行?)香港人最鍾意去邊度?都係日本,哈哈。我哋1月嘅時候,同陳健民、朱牧師 (朱耀明)夫婦一齊去咗台灣。仲有一次去咗柬埔寨,睇吓吳哥窟、歷史嘢,都係太太一直好想去嘅地方,佢都係鍾意呢類。以往一年去一、兩次,咁今次咪特別安排去多啲。我都希望四月份可以再去,即係唔使坐監就即刻再去。

太太擔心嘅,我諗都人之常情,不過都咁耐,大概習慣咗,或者準備咗,心理準備好晒。不過,你話真係去到嗰刻,如果假設要坐監嘅時候,咁再睇睇嗰時嘅心情,而家就相對平靜。

4月9日有可能還柙,做了甚麼準備?

呢啲我哋個個都係聽黃浩銘教路,著無鞋帶嘅鞋呀、橡筋褲呀,一樣嘅準備。另外,準備咗一啲入去睇嘅書。因為我都有啲藥係要長期食,搵定醫生寫信,準備好晒啲藥。到時還柙就可以帶入去。 

你覺得裁決對於香港社會的意義是甚麼?

呢個案件涉及的並非只係佔中,仲有以後所有呢種非暴力抗爭或者街頭嘅行動。若果我哋唔係按著《公安條例》嘅程序去申請集會,係可以用公眾妨擾罪懲處嘅話,其實個影響幾大。同埋今次有關嘅控罪,唔係直接告我哋構成公眾妨擾,而係用串謀、煽惑、煽惑人煽惑,呢啲都係一啲佢所規管嘅行為,即係喺實際出現行動之前,(控罪)已經係涵蓋咗,咁就變咗佢個禁制範圍其實係更加大。

所以我諗,如果最後我哋係被判有罪嘅話,我哋一定會上訴,因為涉及嘅問題係成個香港民間,就算你係支持政府,都有可能被人告,當然呢個實際上唔會。但理論上,你無跟《公安條例》,就可能被人告呢啲咁樣嘅罪行,其實有個長遠嘅影響。

當然假設法官判我哋無罪嘅話,起碼反映到香港喺呢級法庭裡面,法官能夠明白到法治、保障人權嘅重要性,因為喺我自己嘅陳詞、其他律師嘅陳詞裡面都特別提到,點解呢班人會有咁樣嘅行動,因為涉及到一個根本嘅憲制權利,就係民主普選。同埋我哋都係行使緊我哋嘅言論自由、集會自由。

同埋有個基本原則,就係公民抗命個元素。我自己嘅陳詞都開宗明義講,呢個係一個公民抗命嘅案件,其實控方無回應過呢一點。因為若果係一個公民抗命案件,根據終審法院喺「廣場三子案」(雙學三子衝入公民廣場案)入面,確立咗為一個減刑理由。就算我哋有罪都好,嗰個原則點樣應用喺實際嘅案件呢。在「東北十三子案」,法官認為涉及暴力,所以就無用到公民抗命原則。但今次我哋嘅案件,控方唔提出反對,係咪就係佢都認為,係一個公民抗命嘅案件呢?

若果係公民抗命嘅案件,減刑係點減法呢,有無一啲基本原則或者考慮咩因素,然後決定減刑幅度呢?今次案件,可能進一步喺法律上澄清。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe