眾新聞 Logo
眾新聞 CitizenNews
眾說

暫別


【編者按:本文原載「佔中九子案」被告之一、立法會議員陳淑莊的Facebook

最近我一直諗應該點寫呢篇「暫別感言」。論文采,一定不及KM,論理念,又不及Benny,論激昂,更不及朱牧。所以,我都係用返「四眼陳」Style去寫,希望大家隔住個mon都聽到我聲音導航,哈哈哈哈。

陳淑莊拿著漫畫家尊子繪贈送給她的畫像。陳淑莊Facebook

嗱,你哋唔好睇我平時粗粗魯魯、青筋暴現,就以為我細個好百厭,其實由細到大,我都唔敢行差踏錯,讀書時唔遲到,亦冇犯過校規,出嚟做嘢之後連翻版碟都唔會買,所以公民抗命對我嚟講係好遙遠嘅事,更莫講話可能坐監。

我人生嘅上半場算係好幸運,可以按自己嘅興趣做舞台劇演員同埋大律師。但相對於早已投身社運嘅朋友,我好慚愧,因為加入公民黨之前我只係透過演出「東宮西宮」諷刺時弊,說不上對民主運動有任何貢獻。直至Audrey邀請我加入公民黨,我先算真正覺醒,發現香港越嚟越唔妥。

做過雙料議員,亦都做過雙失議員,呢個轉捩點令我開始反思,究竟冇咗個議席仲可以點推動民主運動?我開始參與社運,喺民陣識咗好多有心人,一齊參與大大小小嘅群眾運動。直至Benny提出公民抗命佔領中環,我感受好深,之後聯同一眾戰友去18區毅行、宣傳電子公投,再剃頭明志,完全體會到一場大型群眾運動係需要推動旁觀者變成參與者。相信大家都估唔到回歸21年後,我哋爭取民主愈嚟愈難,甚至要犧牲個人前途同人身自由。

照片來源:陳淑莊Facebook

多得所有參與雨傘運動的人,令我知道今日當權者俾我嘅罪名,只係生於亂世敢於抗爭。多謝所有民主派嘅選民,令我在官司纏身期間,仍有動力喺立法會監察政府。我更要多謝風雨不改去法庭聽審嘅朋友,我人生初次坐在犯人欄,難免坐立不安,你哋嘅關心陪伴我挺過呢段艱難時刻。雨傘運動,絕不可能單憑我哋九個人變出嚟。

聽日,我會喺犯人欄等候裁決。無論會否定罪,我衷心希望,再唔會有人因為公民抗命而坐喺犯人欄內,再唔會有香港人因為爭取民主而成為政治犯。

唔洗擔心我,我會坦然面對。雨傘運動,不屈不撓,公民抗命,無畏無懼。

陳淑莊


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe