【撰文：公民數據鉛筆】
自從民主黨中委開會表示撐曾俊華後，被視為黨內年青新聲音的乳鴿之一區諾軒飽受壓力，「民主黨真係無X用架」之聲適時重現。一同被視為「乳鴿」的黨友羅健熙等，擺明車馬撐薯片。區諾軒不想多言，徑自繼續落區，去為公民聯合行動舉辦的「2017特首民投」，擺街站叫人參與公民提名。
有人在他Facebook留言回應他的擺街站照片，認為梁國雄去參選並不合適。區諾軒在下面笑嘻嘻回答：「咁你咪提名其他人囉，無話一定要提長毛架」。
身為「左膠」的區諾軒，夾在黨友與進步陣營朋友之中，兩邊不是人，唯有戴番個頭盔先：「我係民陣召集人，我只係負責叫人做公民提名架咋，無話一定要提名邊個」。
他的黨友對進步陣營的批評，其實好嚴厲。區諾軒本人也把他對進步陣營的批評，在文章上寫得清楚：「唔好以為體制外一定有好多人支持，唔好以為舉出公民提名，就會有好多人響應你，唔好去期望得到大多數市民的支持，而家如果有一半以上的泛民在進步陣營那邊，你已經贏咗。」
進而批評潛在參選人之一長毛：「你咁想入閘嘅，你咪去說服D選委，去令到你入閘囉。但長毛唔係嘛——佢有無去見選委？D選委覺得，你又唔接觸我，你又覺得自己大晒。咁樣係自絕後路。」
學者梁啟智撰文解釋過，選委選舉制度不公，因此選出來的選委，其實不應有個人意志和情緒，而是要跟民意而行。區諾軒滿腔苦水：「你唔可以想像D選委係耶穌，打極臉都唔嬲，人都有意氣，又要批評選委造王、損害民主運動；一時又講到選委唔提名你長毛就即係唔支持公民提名，唔支持民主候選人…咁你講曬啦。」
把進步陣營罵了一頓後，那你區諾軒本人為何每日站在街上食風、擺街站，叫人去公民提名？「如果你簽到37,700個名，以後都可以話比人聽，公民提名係一個可以實踐既理念。」
「如果你話由零開始，安慰獎就係我簽夠37,000個名，階段性勝利（比D掌聲自己先），我以後都同人講我簽咗37,000提名，係你唔比我入閘，可以堂而皇之地講。入到閘更開心，你可以係成個選舉提出自己的政治主張，不停『滋擾』其他候選人，要求他回應你的政治訴求。」
「更大的獎，是能夠將政制問題擺入特首選舉。入到閘，你就會係咁叫其他候選人回應你，對人大831的睇法。」
筆者對前段沒有異議，但後段以為泛民入到閘便能在選舉過程中大講831，卻是十分天真。首先泛民從來沒有主導議題的能力；其次，泛民候選人十日之前才毫不留情，狂踩以打倒831為原則的進步陣營。到得你踏上台，你自己也不好意思來提打倒831。整個有關政改部分，泛民從來只會陷入失語。
結局已是預料之中，那你的行動角色是什麼？「你咪做番社會運動嘅嘢。你知道而家搞行動是傻的，甚至去到最後有一D局面，係無空間去搞行動。當是阿曾選到了、入到閘了，咪又一樣，唔通個經濟政策忽然間會對老人家好好？咁你就要有個好的基礎，到時令人可以走出來反對。呢樣嘢係社運界最應該擔當的角色：如何鋪一條路，未來可以繼續落去。」
現在民情繼續支持曾俊華，左膠與「群眾」好像愈來愈對立。「我覺得再鬧都只係勢成水火。有好多人係中間派。你又要靠中間D嘅人變，去令件事有發展」。
公民提名本是為加強充權和參與。但在扭曲的選舉制度下，現在大家好似愈來愈以為自己真的有持份，公民提名和投票變成迷幻藥，讓人產生幻覺。
區諾軒說，「有一堆問題我真係解決唔到，選舉好假，但實踐公民提名理念，是否好似可以揭穿個虛假呢？」
「但現局比大家見到，進步陣營的形勢好差，加上系統故障、又有人認為候選人唔理想。長毛拿不到37,000個提名幾乎已成定局了。我相信仍然應該落區，只能寄望最後得出來的數字不會太差。一個人做不到很多，但我係為理念不值。」幾年前大家為了特首選舉機制，整個社會在奮鬥。「今天只有很少人重申提名機制應該是甚麼、香港人應該有怎樣的特首選舉之類問題。說這些，當然很不切合lesser evil的氣氛。路昏暗，但我寧願走在應當幫的人的道路。」
