眾新聞 Logo
眾新聞 CitizenNews
眾說

讀鄧官辭有感:唔好又賴市民唔出嚟


早幾日見人講起,走去讀了前終審法院法官鄧國楨去年退休的致辭。第一眼,鄧官算好過一些人。香港有班人成日呃細路,話法治同民主係分開,冇民主都可以有法治,鄧官就暗示佢唔係咁諗。節錄:

……長久以來,我們生活在法治之下。 人們常説法治是我們社會的基石,而我清楚知道,這並非空喊口號。 法治極可能延續,但這決不能單憑法官之力來維護。 這也不能依仗我們在香港實施普通法這事實。 普通法同樣可被用作欺壓的工具。它是一種變化多端的權力, 除非妥善地運用人權法加以適當控制,否則可被不當使用。......

好簡單,話明三權分立,行政同立法兩權,同樣對司法系統同維護法治有重大關係。有一個起訴人唔公正、亦唔受外間制衡的政府,何來法治?有一個聽晒政府話、亦不斷通過惡法的立法會,何來法治?法治,絕對需要民主。

但鄧官的好,只到此為止。且看再下一段節錄:

......大家應致力在社會上培養有利於法治的氛圍。我們在香港擁有新聞自由及選舉自由,必須努力發聲,讓你的選票發揮作用。請相信我,自由的代價是要時刻保持警覺。更重要的是,永遠不要放棄或低估自己的力量。如果我們整體社會堅持維護法治,無人可以輕易把它奪走。千萬不要讓此事變得輕而易舉。……

係我眼花定鄧官眼花?香港有選舉自由,選票可以發揮作用?我投過一個人,叫羅冠聰,佢當選咗入埋立法會架,但轉頭就比政府DQ,仲比鄧官你嘅同事確認添。 仲未計梁游劉長姚,同選舉前已被DQ,啲人想投都冇得投的梁天琦周庭etc.添。選舉自由同選票作用?鄧官你問吓你啲確認DQ、對選舉呈請/JR愛理不理拖足N年、 變相褫奪市民選舉權同被選舉權嘅同事法官啦。仲有,多得功能組別,就算佢哋入到立法會可以做的都有限。一地兩檢、引渡條例、明日大愚,阻到咩?23條再嚟過,恐怕都係阻唔到。所以鄧官仲信選舉自由同選票作用,我覺得真係學陳仲衡法官講就係「...以為投票就可以維護法治,是天真和不切實際...」,坐得監嗰隻。

被DQ的六位民選立法會議員。維基百科照片

不過我最激氣係第樣。呢類離地上一代精英,我見唔少,講緊係啲在社會上都有一定地位,私底下就鬧共產黨同擔心香港赤化,但又從來唔知佢做過乜去協助抗衡共產黨同赤化。可能鄧官有做過,話晒佢職務上有機會做,我唔知啦,但大多數的所謂精英我真係唔知佢哋做過咩,跟住佢哋仲會問做咩「大家」唔做多啲嘢。其實好多年嚟唔少一般星斗市民做過晒架啦,投票、遊行、靜坐,到佔領,捐錢、義工、瞓街,好多人已經做到身心俱疲架啦,仲要比人問「點解你唔做多啲嘢」?

唔好再賴市民唔做多啲嘢啦好冇?依家引渡條例,我敢肯定破壞香港法治衰過23條。23條係香港法律、港府告你、香港法院審你、香港監獄困你。引渡條例係大陸法律、中共告你、大陸法院審你、大陸監獄困你。林鄭話唔搞23條住,但實際做埋啲嘢仲惡毒過23條,仲要擺單殺人案上檯過橋,明明台灣方面講咗唔理。但法律界有幾多人出聲反對?講緊平日見開嗰班大狀黨同法政匯思之類以外的。

428星期日,13萬人上街反逃犯條例修訂。美聯社照片

嗱,十幾萬人企咗出嚟啦。其實大家唔係「天真和不切實際」,多少都明出咗嚟都未必擋到,但叫做做咗啲嘢過咗自己個關:第日法治真係淪亡,唔好怪我冇出過嚟呀。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe