眾新聞 Logo
眾新聞 CitizenNews
眾聞

【引渡修例】梁君彥趕走6議員 毛孟靜批林鄭「講大話」被指冒犯 胡志偉斥「八婆」


特首林鄭月娥今早到立法會出席行政長官答問大會,甫行入會議廳,即有泛民議員高呼:「反送中!林鄭下台!」大會開始後不到15分鐘,公民黨郭家麒欲向林鄭送上時鐘,站起身來就被立法會主席、經民聯梁君彥要求離開會議廳,成為今日第一個被趕走的議員。

林鄭其後回答議員提問時稱,1997年的《逃犯條例》不適用於中國並非刻意為之,亦非因為當時害怕內地法制,批評坊間說法「全部都係廢話」。議會陣線毛孟靜隨即斥「你講大話!」梁君彥指毛孟靜言語冒犯,將她驅逐。

一個半小時的會議裡,梁君彥共趕走6名泛民議員(包括:郭家麒、毛孟靜、譚文豪、胡志偉、陳志全、范國威)。其中,當民主黨胡志偉被逐,在幾名保安「護送」步向會議廳門口時,突然一記「回馬槍」,從三名保安中間探出身來,向著林鄭說:「你唔死都無用呀,八婆!」引起建制派議員起哄。

梁君彥傍晚回應,今日毛孟靜因「講大話」被逐,指英國西敏寺或議會當中:「unparliamentary language 第一個字其實就係講to charge of lying or being drunk, and misrepresentation of the words of another. 呢三個係最嚴重嘅指控嚟⋯⋯所以呢個唔係我嘅決定,而係喺西敏寺入面,呢個係嚴重嘅指控。」他續指,行政長官答問會是莊嚴的地方,他是次裁決將會成為「案例」。

特首林鄭月娥今日出席答問大會。莊曉彤攝

林鄭月娥開場發言時,先由香港與中央的關係說起,指她體會到中央如何支持香港融入國家發展大局:「我是站在最前線與中央協作。」她其後主動提到修訂《逃犯條例》的爭議,稱:「因為不理解或者誤解或者其他原因而產生的極端言論和不必要的恐懼,挑起了中央和香港、香港和內地之間的矛盾,我感到痛心和遺憾。」

林鄭開場白之後,公民黨郭家麒表示:「特首用咗好多時間擘大眼講大話,話香港人唔理解送中條例,呢個係絕對講緊大話。」然後他拿出一個方形時鐘,貼有「堅決反送中」、「民意不可欺」黑底白字標語,擬走向林鄭,並稱「我哋唔要送中,我哋送番個鐘畀佢。」立法會保安隨即從會議室兩側衝上,將郭家麒攔在議員席,不准他上前。梁君彥宣布將郭家麒逐出會議廳,郭最後自行離開。

郭家麒欲步向林鄭月娥送上時鐘,卻被保安阻止。莊曉彤攝

公民黨楊岳橋續提問,林鄭政府修訂《逃犯條例》,為何不理會國際社會、商界、遊行、民主派、陳弘毅教授、何濼生教授等人的意見。

林鄭答道:「唔使咁衝動,我慢慢回答你。呢個所謂當年喺條例裡面話不適用於中國、其他地方,並不是刻意;亦都更加唔係有啲人話係怕回歸之後內地的法制;更加唔係有啲人話連中方都同意喎,中英聯合小組、中方都同意如果包埋內地會影響香港的順利移交。這些全部都係廢話,大家可以睇番立法會嘅檔案,係嘛?」毛孟靜此時向林鄭高呼:「你講大話!」林鄭稱:「我唔會講大話。」

梁君彥此時說:「毛孟靜議員,你喺度公開話行政長官講大話,呢個係嚴重冒犯。毛孟靜議員,如果你再唔收回,請你離開會議廳。呢個係嚴重的指控,係違反會議的常規,請你⋯⋯請你收番。呢個係一個嚴重的指控同冒犯性指控。」泛民議員隨即起哄,梁君彥宣布暫停會議。

約15分鐘後會議再開,梁君彥指,毛孟靜在林鄭發言時作出「不適當插言」,要求收回,否則以「行為極不檢點」為由逐離會議廳。毛孟靜表示:「我話畀你聽,梁君彥,立法會係要嚟監察政府,我話:林鄭月娥係講大話。」梁君彥宣布將她驅逐離場,約5名保安員包圍毛孟靜,「護送」她離開會議廳,期間有泛民議員高叫:「你點知林鄭月娥唔係講大話」、「你護主心切」,毛離場時指著林鄭說:「反送中,林鄭下台,大話精。」

毛孟靜因批評林鄭講大話被逐。莊曉彤攝

民主黨林卓廷、新民主同盟范國威先後提出規程問題。林卓廷要求梁君彥解釋是否要收窄標準,打壓議員的言論及議事空間。梁君彥指:「我已經作出裁決,我嘅裁決係不容辯論。如果你對我嘅裁決有其他意見,請你喺其他場合同我傾。」范國威則指,毛孟靜認為林鄭視社會各界對修例的意見是「廢話」、毛指林鄭講大話,所以認為毛只是作出事實陳述,沒有違反議事規則,認為梁君彥的裁決錯誤,范指:「林鄭月娥作為特首,更加要清楚解釋,點解對社會各界、商界、議員、專業界別,對逃犯條例的意見⋯⋯」隨即被梁君彥熄咪,梁重申:「我已經作出裁決,我嘅裁決係不容辯論。」

公民黨譚文豪續提出規程問題,譚一度稱聽不到梁君彥叫他的名字,梁君彥則沒有正眼望譚,卻道:「你聽唔到嘅或者可以去搵個專業驗吓耳。」譚文豪續質疑梁君彥趕毛孟靜離開,才處理規程問題,做法有問題,並指:「你可以話毛孟靜議員點解提出呢個指控,你叫佢(毛)提出一個原因點解話佢(林鄭)講大話,但你不能夠證實⋯⋯林鄭月娥無講大話!」譚文豪至少三度指梁君彥「不能夠證實林鄭無講大話」,梁君彥此時已熄其咪。梁要求譚坐下,並稱:「我覺得佢(毛)係侮辱性,呢個已經係作咗裁決!」

泛民議員繼續表達不滿,梁君彥再說三次:「我已經作咗裁決。」然後將譚文豪逐離會議廳。至少6名保安員包圍譚文豪,僵持一陣之後,保安員不再緊貼譚,譚自行步出會議廳指:「林鄭月娥你係講大話,你唔可以話呢句係侮辱,因為你而家侮辱緊香港人。」梁君彥待譚文豪離開後,讓楊岳橋發言,楊說了句「唔需要」,就將咪拋在檯上,梁君彥遂邀請林鄭發言。

譚文豪於會議中段被逐。莊曉彤攝

民主黨胡志偉其後繼續就逃犯條例提問,主要質疑修例並非堵塞漏洞,而是自拆區隔中港的「防火牆」、放棄一國兩制對港人的保障。胡續道:「你望吓自己,你望吓自己,而家我喺度見到嘅樣,除咗有黨性、有奴性,你就無血性,亦都無人性。」林鄭此時已經撓起雙手,建制派議員亦聞言起哄。胡續道:「我而家問你,你究竟要幾多人上街,你先肯收手?你要幾多人撤資,你先肯收手?你要幾多香港人辦移民,你先肯收手?我再問你,你會唔會撤回你嘅逃犯移交條例,只做單次與台灣當局一次性嘅安排,處理陳同佳嘅問題?可唔可以放過香港?可唔可以保障香港一國兩制嘅核心利益?」

工聯會陸頌雄隨即提規程問題:「頭先發言嘅議員有好多冒犯性嘅語言,包括係無血性、無人性、(有)奴性,呢啲係咪冒犯性詞語。」梁君彥就回應:「我再提醒議員,應該盡量用一啲中性啲嘅言語,唔好用一啲冒犯性嘅言語,尤其是對於行政長官。」

胡志偉在會上指林鄭「超越董建華,勁過梁振英」。莊曉彤攝

林鄭回應胡志偉提問時,引用前刑事檢控專員江樂士,以及1996年審議《逃犯條例》時,兩名時任民主黨議員的講法,但林鄭未有公開二人名字。胡志偉隨即反問:「江樂士夠叫你喺梁振英案件上面要攞其他嘅專家證據,你又唔聽?有啲聽、想聽嘅就便聽、唔想聽就話唔聽。我想問吓你,你係咪即係話過去三任特首,他們都係失職──董建華失職、梁振英失職、曾蔭權失職,因為係得你先咁叻,喺23年後堵塞漏洞?」胡志偉指,林鄭月娥帶給香港的破壞,「超越董建華,勁過梁振英」。

林鄭表示,她「不得不撐」保安局局長李家超所用的「鴕鳥」一詞,指「每一段時間的特區政府都面對很多政治爭議的議題,亦明知道這件事提出後會令到官員,包括特首,受到很大攻擊。今日放在眼前,大家都看到。」胡志偉高聲說:「你唔好擘大眼講大話。」梁君彥逐其離場,胡繼續高呼「林鄭月娥下台!」 5至6名保安又來「護送」胡志偉離場。梁君彥突然一句「睇住!」只見人民力量陳志全同時舉著標語走向主席台,喊著「反送中,林鄭下台」。梁君彥逐下令他離場。胡志偉步向會議廳門口期間,突然一記「回馬槍」,從三名保安中間探出身來,向著林鄭說:「你唔死都無用呀,八婆!」

梁君彥繼續主持會議,其後范國威提出規程問題,質疑林鄭未有答胡志偉問題,梁熄其咪,范繼續高聲說話。陸頌雄提問期間,范國威未有停止說話,梁君彥說:「我已經多次警告你,你不可以在座位叫囂。」陸頌雄插話:「我忍夠喇!」梁君彥其後逐范國威離場,成為今日最後一位被趕走的議員,剩下的泛民主派議員寥寥無幾,郭榮鏗、梁繼昌、莫乃光等已經提早離場抗議,建制派議員隨後與林鄭繼續問答。

人民力量陳志全也被逐。莊曉彤攝
立法會主席、經民聯梁君彥。莊曉彤攝



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe