眾新聞 Logo
眾新聞 CitizenNews
眾說

同林鄭辯論如向空凳丟壽包


成日話要學習謙卑、同市民溝通的特首林鄭月娥又再發功,左一句「廢話」右一句「鴕鳥」,董建華、梁愛詩、陳弘毅、美國領事等等全部中招,真係霸氣畢露(btw其實仲掃埋作為前政務司司長、前發展局局長嘅佢本人)。

對此,筆者毫不意外,因為歷年來佢每次被人質疑,回應都唔係直接同人講道理,而係牛頭不搭馬嘴扯到大西洋,如「無聊問題」、「waste time」、「上帝叫我參選」、「官到無求膽自大」、「特首係可以比人鬧嘅」,或者用啲冇人知實際內容嘅口號,如「管治新風格」、「理財新哲學」。

所以,基本上你同林鄭辯論係真係「waste time」,因為佢從來唔知答咗去邊,雙方就好似唔同channel搭唔上線,你拋幾多問題比林鄭都冇人會接住,再用另一個比喻就係歇後語「亞視台慶—向空凳丟壽包」。

2012年6月,亞視在北京搞55周年台慶晚會,馬拉松式演出長逾4小時,現場有1萬7千座位,但觀眾聊聊可數,出現藝員「向空凳掟壽包」的經典畫面。照片來源:蘋果日報
 

同樣情況仲延續到其他高官度。例如明明台灣都講左唔理你,李家超都係日日狂loop廿萬次殺人案殺人案殺人案,唔係向空凳丟壽包係乜?仲有美國佬開聲話引渡條例唔掂當,邱騰華話佢「拉得比較遠」,咁都得?真係取消香港政策法 ,到時出入口仆直、股樓齊跌、GDP受損、甚至親中派被美國制裁 (雖則我冇所謂),你又話一切都係幻覺嚇我唔到,咁就當冇事發生呀?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe