眾新聞 Logo
眾新聞 CitizenNews
眾說

議員數掩飾零票數 中立做聽話擋箭牌 


石禮謙在建制派議員包園下,進到會議室試圖召開選主席會議。周滿鏗攝

首先請大家搞清楚,逃犯條例攻防戰,親中派話搵「 建制派最資深議員」石禮謙主持會議,所謂「建制派最資深議員」法律上係唔存在的。香港冇政黨法,民主派建制派只係大家口講,冇法律條文規定「呢個議員/政黨係民主派/建制派」,自然亦唔存在「建制派最資深議員」。涂謹申主持會議係因為佢係全場最資深,根本唔關民主派/建制派事。

所以所謂「建制派最資深議員」係憑空老作,全冇法律基礎,親中派做的同「我中意阿茂主持就阿茂」一樣,佢地話OK就OK。內會大過委員會就可以干涉,根據呢種邏輯,不如下次邊個做唔做得委員又干涉,辯論咩內容又干涉,委員會有咗決定又干涉,一陣石禮謙short咗內會又可以換主席,乜都內會決定晒丫笨。

跟住,親中派依家又話要講民主、數人頭佢地贏, 唔好忘記呢個立法會本身就係不公平,親中派係靠功能組別零票當選先有咁多議席,議會多唔多數根本同民唔民主無關。咁講民主,不如全港公投啦。但又唔係喎,好似之前遊行佢哋先話人數同民意唔重要喎。真係佢講晒。

至於秘書處話自己中立。話自己中立其實就係親中派,大家日常生活都接觸好多呢種人架啦。話政客唔好,但永遠係鬧民主派政客多。話政黨唔好,喂共產黨又唔見你話唔好。話唔要政治化要正能量,自己又一日到黑都講政治、超多fake news陰謀論、媽叉廢青。

另一種所謂中立,叫跟規矩做。跟規矩做就中立, 規矩本身一定中立架?功能組別都係規矩,好中立呀?政府政策保證地產界、工程界同公共事業(e.g.港鐵)包賺錢,好中立呀?法庭成日見人出身好 (i.e.有錢/讀名校) 就輕判,好中立呀?(出身唔好就抵坐監?)

乜都話跟規矩做,但又唔去諗規矩背後應有的邏輯同道理,唔叫中立,只叫聽話。有親事就賴「我跟規矩啫」、「我跟大隊啫」,唔係中立,實質就係聽話。規矩叫你殺人你就殺人呀?納粹黨同共產黨咪最多呢類人囉。

仲有個問題係,依家直頭連跟規矩做都唔係。「建制派最資深議員」?邊度寫有咁嘅嘢?內會可以代委員會做晒決定?邊度寫?跟住話,有人叫我咁做我咪照做囉,好中立丫。民主派問你啲問題你答咗未?中立?聽話就真。

慢必陳志全站在桌上,建制派議員阻止他接近石禮謙。周滿鏗攝

(btw 見到慢必「省」人個樣,又醒起以前聽過個師奶講,好唔中意慢必,因為佢大聲鬧人喎。大聲就係衰人,細聲就係好人?唔洗理成件事係點,同佢講咩理據嘅。goodest logic。好中立。再btw,我見呢位師奶「省」菲傭同細路,肯定大聲過慢必囉。)


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe