周日反送中大遊行，逾100萬市民上街抗議政府修訂《逃犯條例》，惟政府堅決安排條例草案明日（12日）在立法會恢復二讀辯論。港人不滿林鄭月娥政府漠視民意，發起明日罷工罷市，一日內獲逾170個商戶響應，當中包括《100毛》 、「CALL4VAN客貨車」、藝人譚小環的「渣哥」小食店等。職工盟昨日傍晚亦呼籲市民周三停工，響應民陣號召，出席上午11點開始的立法會外集會。
網民又在社交網站及討論區，發起周三在政府總部添馬公園野餐、通宵「度劇本」、慢駛死火等行動。各大專院校學生會今天舉行聯合記者會，交代學界聯合行動。
根據網民整理的清單，截至昨晚11時已有逾170間來自不同行業的店舖響應罷工罷市，當中大多屬中小企，來自餐飲、零售、工程、醫療、教育、出版界等。
中醫診所「懸壺善學堂」在大遊行後，凌晨在Facebook發貼，宣布由昨日起至周三，由每位醫師及員工自由決定是否罷工，寫道：「若診療等候時間受影響，冤有頭債有主請出來向踐踏市民意願、危害各位安危的中國香港特區政府追究。」又呼籲其他公司或個人，勇於採取類似行動回應，更指會慎重考慮是否要短期內結束一切商業性之業務，「一起以hea爆共渡時艱」。
懸壺善學堂老闆、不時替基層義診的80後中醫師李家麟向眾新聞表示，早在反國教時，已認為港人終有一日需要用到罷工這種抗爭手法，「因為你見到政府愈來愈強硬，違反民意時，我哋可以點樣？」他說，罷工可令市民暫時放下日常生活，騰空一點個人空間，「罷工呢件事睇落好似係一個損失，但其實當我哋決定暫停業務嘅時候，我哋係賺咗一啲時間同空間。我哋可以用呢啲時間同空間，直接行使民主。」
李家麟說，周日他因事未能上街，不過晚上有到政總，看看示威者有否急救需要，一直守候至凌晨。對於修例，他指沒有可能接受，批評是將香港法制與內地法制接軌，尤其內地的法制是以黨統領司法制度。李認為，去到如今這個地步，罷工是必要的。他坦言罷工對生意有影響，但會支持：「業主係唔會同你一齊抗爭，員工都係照出糧。不過如果大家（罷工）係進入咗理想模式，一定會支持。」
百萬人遊行，政府卻稱二讀安排不變。罷工一天，真的有用？李家麟說：「唔諗啦。對於未來，人係無知。未來有冇用，就要到未來變咗當下先知，我冇辦法預計聽日會發生咩事。既然冇人知未來，只能做當下覺得要做嘅事，今日最少我知我想做咩嘢，咁我咪做。」
室內設計公司「Map Out」亦響應罷工罷市行動，明天暫停所有室內設計及工程查詢。店主Jun說，周日他公司全部約4、5名員工都有參與遊行。特首林鄭月娥漠視遊行的回應，令他更覺得不能不進一步表態，「因為（修例）影響下一代好緊要，而家修例令我哋有白色恐怖嘅感覺，影響言論自由。」
這次是Jun首次用公司名義參與社會事務，他本來不太贊成表態，「因為想客戶Focus喺生意上，但因為周三已經係二讀，已經冇時間，所以諗到嘅層面都會去做。今次真係諗唔到仲有咩棋可以行，盡量用得嘅network都用，話畀人知，其實我哋好多人都真係咁諗。」
他說，罷市對生意影響不算太大，不過也擔心會因政治表態，收窄顧客群。Jun指：「但我同Partner嘅理念都係覺得，每人做少少力量都好大。希望做少少先，如果搞起到，我哋進一步參與都願意。」他直言罷工「預咗冇用」：「唔會咁天真，因為都知損害唔到佢實際利益，除非長期罷，但大家有家庭負擔，唔會咁多人犧牲。」
「不過唔好淨係睇結果而做，都係盡做，如果吓吓睇結果一定要成功先做，就乜都唔使做啦。就算星期三佢照過，都要畀全世界見到佢有幾樣衰、幾夾硬嚟。」Jun說。
另一間有份響應罷工的婚紗店「Gardenia Wedding」店主陳小姐說，因身懷六甲沒有參與大遊行，不過一直都有留意修例，「內地嘅法治令人擔憂，好似李旺陽被自殺，或者林榮基都要逃亡到台灣。第時如果我捍衛自己權利，譬如言論自由，或者可能發生毒奶粉事件，我表達不滿嘅話，我身邊人會唔會受傷害呢，會有呢個擔憂。」
大遊行後政府仍堅拒撤回條例，陳小姐在想還能做些甚麼時，就在網上見到罷工罷市行動。因應這次罷工，她推卻了明天的客戶，部分客戶願意另約日期，不過仍對生意有些微影響，「都諗唔到咁多喇，自由權利重要啲。香港人呢個時候再唔同心的話，都唔知要等到幾時。」她指，很難預測最終是否有成效，「但唔做嘅話，我又驚會後悔。」
化妝學校「Kazaf Academy」老闆Ricky說，希望透過罷工罷市，表達香港人對修例的重視，「遊行完之後，政府都冇正視過我哋訴求，只係話畀大家聽會繼續二讀，咁我哋係咪應該行動做少少嘢？」他擔心修例後，港人有機會因製作影片或撰寫文章，被內地認定為罪犯，繼而影響家人及個人自由，「我都係香港人，我哋應該要保護呢個城市。」
Ricky是化妝界網上KOL，在YouTube教人化妝及美容。就政治議題發聲，他也曾感到擔憂，不過他說今次並非純粹的政治表態，而是保護香港人基本言論及創作自由，「如果有多一個人發聲，就可以令更多人知道呢件事嘅重要性。」被問到會否擔心影響生意，他說：「如果因為修例，令香港經濟唔好嘅話，我哋都係會冇生意。咁點解我哋唔保護而家有嘅嘢，保護我哋基本自由呢？大家香港人都過得好，我哋生意先會好。」
「我唔知究竟罷工效力有幾大，但呢刻我哋唔做，就唔會有效應。要影響大家做啲嘢嘅時候，不如自己企出來做咗先。」Ricky說。
除了各中小企外，宗教組織「好鄰舍北區教會」宣布昨日起罷工3天。另外，韋智達律師行（Vidler & Co. Solicitors，韋智達是人權律師，曾代表女同志QT跟政府打官司、協助早前滯港的沙特小姊妹）在Facebook宣布罷工，指已通知所有員工，若員工想憑良心行事，因參與罷工而缺勤，將予以支持。
網民討論各種後續行動。Facebook出現「一個人政總野餐」活動，時間訂為周三上午9時，地點在添馬公園，目前約8000人剔選「會參加」；約2.3萬人剔選「有興趣」。活動詳情寫道：「查過黃曆，星期三6月12日係好日，所以建議大家放個靚假出街行下吸收下新鮮空氣。去邊好？如果可以免費欣賞到價值幾百萬嘅維港景色，又可以係出自著名建築師手筆嘅門常開下拍照留念，仲有一大片草地，咁就緊係去添馬公園啦！」
「香港編劇權益聯盟」Facebook專頁則呼籲，周二至周三在政總「通宵劇本圍度」，並指「歡迎所有熱愛創作、熱愛香港朋友加入」。有網民討論在周三當天「慢駛死火」、在港島「遊車河」，「唔知有無人一齊去港島各有各遊，遊到攰攰哋就停低唞吓？」配圖是金鐘夏愨道。
