眾新聞 Logo
眾新聞 CitizenNews
眾說

阿Sir,接林鄭order嘅時候,停一停,諗一諗邊個會係賣身婦前途嘅代價


【撰文:眩人】

經歷6月12日警方武力升級,各位阿 Sir 真係威威豬,打到年青人吐血爆面,三兩下手勢就將數以萬計嘅年青人驅散,仲有時間開開心心影番張大合照,戴完頭盔,報卻五年前滿腹怨憤,又可以出來威,何樂而不為。不過凡事都好似政府教我哋啲蟻民一樣,係應該停一停,諗一諗的,唔係好易出事㗎,特別係現在國際局勢風雲變色,祖國面對大變局嘅時候,手執武力做嘢,一時唔覺意,玩大咗,今日無事,唔擔保日後無手尾。

咁我就試吓班門弄斧,幫各位阿Sir分析吓大家面對嘅形勢。雖然圍堵立法會個場,話就係清咗,但係已經引起咗大量嘅外國主流媒體高度關注,做晒國際頭條,真係勁過28國聯軍,而且好不幸,唔知係唔係警方嘅同事自己太落力,定係而家形勢變咗,所以花多咗時間心力諗點樣更有效對付示威者,減少咗前線警員嘅情緒管理訓練,又或者係各位大Sir 都吩咐咗啲前線同事,以前一向用開嘅通例守則,已經唔使再理,唔使太在意示威者嘅命仔,所以出現係國際媒體嘅影像同消息,都令抗爭者普遍得到國際嘅同情,而且睇番啲新聞,基本都有對反送中嘅前因後果,作出十分清楚詳細嘅報導。所以歐、美、加、澳各國都好快齊齊出咗聲明,叫香港政府唔好去咁盡,要諗清楚後果。

可能各位阿Sir都未必太喜歡睇新聞,特別係𠴱啲唔係高度讚揚警方行動嘅消息,就更加係難以接受,但係今次清場有無跟足合理使用武力嘅要求,定係已經過晒火位,我相信咁專業嘅警隊,一定係心中有數,所以警察一哥見傳媒嘅時候,回應上述問題,基本上都係答非所問。咁或者各位可能認為有「志不求易,事不避難」嘅最高層撐,嗰啲蟻民批評,甚至是國際政治聲音,根本就唔值得理,正所謂阿爺吹鷄,唔單止球證都係自己人,連龍門都隨時任搬,仲邊會好似佔中時候嘅幾位阿 Sir 咁出事吖。

不過,清場當日,聲稱賣身給香港嘅特首兩度現身螢幕,首先感性一哭搏同情,接住卻又指會強硬對付「暴徒」,前後兩番唔同嘴臉,精神狀態似乎唔係太穩定,須知道,自命好打得的特首,一向處事從容,現在如此詭異,應該係玩爛咗副本來以為係好簡單嘅牌,面對極大壓力,所以一定要將壇蘇州屎死都要死番掂佢,而站在最前線幫佢掃屎嘅,就正係各位以為清場好威嘅阿 Sir 嘞。

如果各位以為警隊已經預咗好耐要進行呢啲任務,而且又可以一吐五年來的悶氣,何樂而不為,咁就睇吓轉個頭,中國駐英大使劉曉明,接受英國廣播公司訪問嘅時候,就話中央係無指示過港府修例,似有急急劃清界線,為日後留退路之嫌。咁如果往後副牌越打越爛,直至不可收拾,睇怕你哋嘅特首都要自己孭晒飛,要被犧牲,咁你估到時表演得最落力嘅警隊,特別係高層嗰啲,係咪肯定可以全身而退呢?而且政務司長已經話咗將示威定性為暴動同決定開槍嘅唔係政府高層,而係警隊高層嘅決定,咁特首係自己孭鑊之前,係好大機會係自己死之前想方法要下面頂咗先,須知道,共產黨嘅權力遊戲,實質係死亡遊戲,出事嘅時候唔想自己死,射落下面,係戀棧權力者慣技,是常識吧。

再退一萬步,就算特首真係得到習帝硬撐,即使引起社會更多衝突,都在所不惜,咁警方就勢必要執行更多強硬任務,引致更嚴重的傷亡,甚至鎮壓之後,繼續對港人秋後算賬。但今日香港已經係處於中美爭霸的風眼中,自從送中事件發生至今,事件在民主世界中急速發酵,美國跨黨派議員已經開始力推「香港人權與民主法案」,更在最新版本加入針對送中引渡法的條款,制裁有關人士,如果實行,好大可能係因為事件升級至美國認為有足夠道德合法性回應,到時你諗吓警方各主事人有無份負責?被美帝嘅長臂制裁嘅人士,恐怕以後只能去大灣區渡假,連參加自己仔女係歐美嘅畢業禮,恐怕都好困難,更何況今日撐住特首強硬路線嘅習帝,權位有幾穩,都係未知之數,今日嘅一時之勇,一刻之快,隨時好快就有變數,咁嘅風險,各位諗清楚未?

(寫畢此文,我都明白,以警察在6月12日的精彩演出,就知佢哋對當今世局嘅認知有幾深,呢啲蟻民寫嘅廢文,睇完都可能唔明,但如果各讀者身邊有警方好友,特別係較高層嗰啲,都可以盡吓最後努力解說一下,否則有朝一日要轉職做大灣區公安,就唔係幾好啦。)


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe