林鄭成功connect全港市民，明明表面上褪咗軚，反而仲多人、破紀錄咁多市民上街，果然係考第一！
好啦，串完人啦，要認真鬧佢啦。話說政府出咗新聞稿道歉，係咁講嘅（節錄）：
考慮到社會有強烈不同的意見，政府已停止立法會大會對修訂《逃犯條例》的工作，希望藉此可讓社會盡快回復平靜和避免任何人受到傷害。政府重申並無重啟程序的時間表。
行政長官承認由於政府工作上的不足，令香港社會出現很大的矛盾和紛爭，令很多市民感到失望和痛心，行政長官為此向市民致歉，並承諾會以最有誠意、最謙卑的態度接受批評，加以改進，為廣大市民服務。
咁啱我昨日先寫過文講外國學者點分析道歉，依個咪完全係扮道歉囉。道歉只係為「政府工作不足令市民失望」，依然唔肯：
・直接承條例有問題
・逆民意硬推惡法
・屈反對者冇睇文件
・講大話擺死人上枱
・誣蔑示威者係暴徒
・縱容黑警使用不合理武力
・製造六七暴動以來香港最大流血衝突
七宗罪想用「不足」兩隻字就過骨，你痴咗呀？仲有幾日前又CCTVB訪問又拍片，仲喊埋，今次出新聞稿就算？
跟住，佢嘅補救措施就係謙卑喎。佢講謙卑講過幾次，之後有冇做到，大家心照啦。同埋，佢依家就示範咗佢嘅所謂謙卑啦，就係市民嘅訴求，完全冇應承到。最後，佢聽朝起身心血來潮話「不如今日再推過啦」，都同「（現在）冇時間表」冇衝突架。
