眾新聞 Logo
眾新聞 CitizenNews
眾說

跟住落嚟可以做的事


最近好多人講仲有咩可以做,我講吓我意見。

0. 開始前提提大家,其實要小心政府又用冷處理拖延時間。上次佔領都係咁,硬碰幾次之後,政府開始唔多理你,任你繼續佔街,你就開始擔心洩咗度氣同想要做D嘢打破僵局,結果只係更多分歧同氣衰, 最後政府趁你失晒士氣同民意支持清你場。今次道歉同暫緩,再加上佢唔再阻你阻街同集會,甚至政總同立法會都關門等你都唔知衝邊度好,都越來越似冷處理。雖然現時仍然多數市民憤怒,但要長期維持民氣依然會有困難,特別係班要生活同返工的大人,唔排除長遠越來越多人覺得無謂煩落去。

今天市民包圍了警總。美聯社

當然你會話街頭抗爭一直都主要靠年輕人,但政府怕既唔係街頭抗爭,因為佢依家殺死後生人都無所謂既,何況政總立法會停止運作咪停囉,對佢哋嚟講有幾大損失jack,佢主要怕全港社會加外國勢力一齊譴責施壓。所以要記住,衝只係手段其中一種,唔好忽略成個大環境先係達成目標的主要途徑。比起不斷衝同佔領,維持社會同國際支持更重要,衝同佔領得嚟都要有持續性同宣傳性,可以協助維持社會同國際支持。

1. 所以,要繼續鼓勵美加澳德等外國考慮制裁香港,或至少加強監督香港情況,並可能要向個別議員同政黨敲門。

其實要到真係實施制裁,同埋告上國際法庭,係非常困難,你睇蘇丹開槍殺咗過百人都冇國家出聲,香港依家「暫緩」條例又冇真係殺死人,難以去到國際制裁的地步。但唔一定要去到咁盡,例如如果美國真係修改香港政策法,列明香港自治受損就可以制裁,咁至少係有把尚方寶劍,對親中派形成「張刀已經響你頭上」的壓力。同樣法例可以來自其他國家,不過美國最有效果同似乎最大機會通過。仲有,特別係美國, 可以請願埋佢地施壓朱西伯格同其他IT公司ban晒親中派D fake news。

所以要繼續向外國請願同宣傳,唔止係政府,仲有關心香港情況的個別議員、政黨、媒體、人權組職甚至公司,咁就算政府未有具體行動,至少可以在國際上繼續 make noise。而且政府干涉香港有好多考慮,如會擔心中共係咪報復,但個別議員、政黨、媒體、人權組職齋鬧係唔怕後果,較大機會肯鬧。(所以請記得多謝佩洛西、魯比奧、德國綠黨等等等等)。

也「佔領」過入境事務大樓,接下嚟仲可以做咩?周滿鏗攝

2. 制訂賣港賊名單

為方便外國議員出手,仲有比市民一個一個認住,不合作運動或者選舉時全部foul走佢地,應該制訂清楚的賣港賊名單。唔單止高官、行會成員、警隊高層、DQ主任、親中派垃圾會議員等,仲可以包埋區議員、親中商會同團體(及其具體成員名字),總之有新聞報道過, 或者報紙賣廣告支持送中過的,全部留底,一個不留。

3. 不合作運動

具體有咩做,好多網民有諗頭過我,我只有三點建議。 一係盡量不主動使用暴力,因為有就失晒國際形象。但須留意我講緊盡量同不主動, 就好似警察話會盡量show號碼咁,唔係絕對,對方主動使用暴力唔通自我保護都唔比咩,同埋我講的暴力係講真係會令人受傷嗰隻,單純佔領同衝過防線,本身係唔會令人受傷的話,我唔視作暴力

第二樣,不合作運動可以包括不做佢哋生意,除咗中資機構,仲可以包埋親中派做老闆嗰D,所以話要制訂賣港賊名單,一個一個認住佢哋,仲有佢地D公司同舖頭。 議員係有利益申報名單,佢地開咩公司係公開資料可以查的, 只差有冇時間人手查晒出黎。舉個例, 成日都好口臭的保險界陳健波,利益申報表寫明係「立橋保險集團控股有限公司」行政總裁,大家可以查埋其他。

三,據聞工賊會麥美娟當住林鄭面講「仆街,你試吓D手足係區度不斷比人屌丫」,證明雖然班親中派面皮厚過咩咁,但都係有極限, 當街比人屌都係會唔好受。所以,當面屌佢哋係真係精神上有用, 大家記住要多些面斥不雅(但記住唔好使用實際暴力,一陣佢哋報警)。

4. 登記功能組別選民

好多人呼籲登記做選民,票債票償,依個當然要做,但要vote out 親中派,關鍵係登記埋功能組別選民,特別係小商戶、食肆、做過社團藝團嗰D,研究吓有冇界別可以參加。

點解著重功能組別,一來地區直選係用比例代表制,親中派輸極都唔可能全部議席輸晒,而且只要功能夠多,佢哋隨時可以繼續保住垃圾會多數,所以一日唔食入去功能組別議席,一日影響有限。二來功能組別好多只係幾百同幾千個選民,你投一票影響到結果的機會係比較大。三來今次商界都有人不滿,雖然佢地未必會投民主派,但有個對手猛鬧現任親中議員,可能會令部分商界票棄權,或至少幫手造勢, 營造一個親中派真係唔掂的大圍氣氛。所以小商戶、食肆、做過社團藝團嗰D,快D睇吓有冇界別可以登記

p.s. 登記傳統功能組別只係取代超級區議會嗰一票,唔影響你投地區直選的。

5. 記得投票

區議會選舉都要記得投票,因為投票率向來低,大家肯投票係有機會可以一次掃走好多親中/扮中立區佬。大家未必記得,俗稱「超級區議會」其實係「區議會第二」議席,仲有個「區議會第一」議席,係全港區議員互選產生。民主派贏到過半區議員,就食多個功能組別議員架啦。仲有,如果你個區議會選區係冇民主派參選,諗下自己參選。上次有人心血來潮去報名,結果就無端端贏咗鍾tree根啦!

跟住又會有人話,但唔想投民主派wor。 咁民主派內都有好多人架嘛,搵個你肯投架囉。或者,睇吓有冇議員係講明願意支持抗爭者,例如宣明不割席、提供法律支援、會捐錢出嚟比基金打官司等。咁既然依家anyway 你係零期望既,至少都叫爭取到一樣好處咁多丫。

暫時諗到咁多。完


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe