眾新聞 Logo
眾新聞 CitizenNews
眾說

G20及香港國際地位


連登仔眾籌在全球多個參與G20峰會的國家主要報章賣廣告,講述為何香港人反對逃犯條例,以及對特區政府的訴求。
 

可能有人會擔心,你哋班友玩到咁大,專登要喺G20峰會落習大大面,萬一激嬲咗中央,收緊對港政策,香港人咪無啖好食?

講真,2014年79日佔領已經激嬲咗中央,中央亦做咗好多嘢打壓反對派,又DQ又重判九子,樓市股市咪一樣照升?大陸在香港有龐大經濟利益,唔會同自己荷包鬥氣嘅。

反而特區政府無啦啦搞壇逃犯條例修訂,就真係會嚴重打擊香港經濟嘞。外國公司擔心員工人身安全,可能會撤走香港嘅業務。本地商家,尤其是同大陸有生意來往嗰啲,都會轉移部分資產去外國避險。大陸落嚟嗰班有錢佬,唔使問梗係拿拿聲賣樓走人。

最大鑊係如果通過修例,美國佬分分鐘會取消香港關係法和獨立關稅地位,其他西方國家亦可能會有相應制裁行動,到時香港就會失去優勢,變得同其他大陸城市無分別,咁香港樓市同股市肯定無運行。

依家件事搞大咗,全世界都望住香港,北京有所顧忌,反而唔敢亂嚟。香港係彈丸之地,點夠大陸鬥?但如果我哋好好利用國際金融中心呢個地位,爭取到國際社會嘅支持和監察,撐住一國兩制,咁樣大家都有飯食。

順帶一提,警察向示威者開槍,又話係暴動,外國遊客唔知頭唔知路,以為香港通街暴徒,仲邊度有人敢嚟?撐警嗰班人,搞到警察以為自己做得好啱,一味企硬,呢啲「暴動」只會沒完沒了,其實害死香港。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe