眾新聞 Logo
眾新聞 CitizenNews
眾說

又施政新風格?仲要呃人幾多次?  


提提大家,今日選民登記截止

外號「行騙長官」的行政長官林鄭月娥,昨日在慶回歸酒會上強調自己會改變施政風格,多聽取民意。 根政府發布的演辭,她說:

…我會汲取教訓,確保政府日後工作更貼近民心民情民意, 積極回應社會大眾的所思所想所求。最基本的第一步, 是政府的施政風格需要改變,要變得更開放、更包容, 聽取民意的工作要革新。…… 我會安排更多時間,親自會見不同黨派、不同階層、 不同背景的人士,讓我保持政治觸覺,掌握社會脈搏…… 透過不同途徑主動接觸不同背景的年輕人,聆聽他們的心聲……

 

咪玩我啦,當我失咗憶,唔知你櫳嘢呀?施政新風格、理財新哲學,次次你鑊咗就話自己會改會謙卑㗎啦,跟住就一切照舊呀嘛。成日扮蟹扮新人,當人食懵咗唔記得你做咗成四廿年官, 又係曾梁政府要員?新?新咩呀?

你要會見不同黨派,尋日民主派咪提出見你囉,你話自己好忙唔得閒見丫嘛。大佬,依家有咩緊要過平息事態?除非你一開始就唔諗住平息,係諗住暴力清場啫。聽年輕人心聲,你喺會展內同班真‧破壞派談笑風生飲香檳嗰陣,外面咪好多年輕人囉,唔見你聆聽佢哋?咁共產黨就梗係唔敢見學生㗎啦,上次肯見嗰個叫趙紫陽丫嘛。

講到底,三個字,你呃人。新風格就係舊風格。完。

鬧完林鄭,講多兩樣。本來我都好疑惑衝擊立法會有咩用,特別係見到入面成班警察,我驚大家係自投羅網,但見大家講唔好割席,忍住唔講先。但之後班警察唔知點解唔見晒,衝入去之後大致上冇咩人受傷,總算鬆咗口氣。因為我一直的取態係唔鼓勵暴力,特別係指主動傷人的暴力, 所以結果上嚟睇,嚴格嚟講尋日又好似冇觸犯我呢個定義。

我懷疑警察唔見,有兩個可能,其他人都有講,一係想設局包抄示威者,二係想向佢哋冠以暴力同破壞的帽子。但我就懷疑後者係咪真係會有用。至少見到大口狗、犯婦人的相被拆咗,我朋友係話大快人心,唔知有幾多人都係咁諗。聽到示威者譴責立法會制度暴力,唔代表市民, 呢個亦係fact嚟,好難唔同意。而當見到特區區徽被畫花,我又有感,才下眉頭,卻上心頭。

立法會內的特區區徽被塗污。

最後第二樣。提提大家,選民登記今日截止,未係的快啲網上搞掂佢。嗱,我知有人會話冇人想投,或者想投的被DQ,或者投嚟有咩用。都係登咗先啦。到底會有咩人選,冇人知格,可能突然彈個人出嚟你覺得投得落,或者有個獻世派你真係好憎好想vote him out呢。總之,到時投唔投一件事,登咗先,因為登一次就以後幾時想投都有得投,唔投都冇所謂,但你唔登呢, 係冇得忽然想投就去投㗎。再再提提大家,上次區議會選舉得3成人投票,好多親中派區議員的實際得票只佔潛在選民1成幾,vote them out 唔係冇機㗎。

 


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe