眾新聞 Logo
眾新聞 CitizenNews
眾說

唔好啦掛,又中間人收風?


睇嚟中共真係覺得香港人好易呃好易氹, 繼林鄭又第N次講施政新風格,最近又有傳媒話北京又有中間人落嚟收風,想要了解年輕人做咩咁激進,喎。唔係掛,又中間人論,真係當香港人失憶㗎。咁多年嚟呢啲中間人論、北京有好多派論、中央係比親中派呃咗論,傳過無數次㗎啦,有邊次個結果真係對香港民主化有好處㗎,覺得香港人仲會中計啊?

同埋,其實香港年輕人,甚至香港一般市民,想要啲咩好清楚格,咁多年嚟講過、表達過、要求過好多次㗎啦,冇人聽吖嘛,所以依家先冇人信你呀嘛。四條人命,五大訴求,林鄭回應咗未?仲係掛住講立法會爛玻璃呀。所以而家冇人信暫緩就等於撤回囉。

嗱,仲有個更令人激氣嘅,就係老懵懂又返生出嚟講廢話,又提醒香港人你中央咁多年嚟都係與民為敵,繼續用呢班香港人最憎嘅人。咩老懵懂、羅犯、李國蟑、689、梁粉虫、豬姐、白髮魔女,咁多年來毫無建樹,最叻禍港,衰足咁多鑊都繼續受重用,甚至升職,阿張小明做埋港澳辦主任添,咁你仲講咩中間人溫和派啫,一聽就知係搵老襯啦。

近排大家都話,各自爬山,不割席,我係支持嘅, 但今日見到個新講法,我都同意,就係邊個傾邊個係鬼。仲有嗰啲講咩茅塞頓開、大灣區特色國際視野,都好鬼鬼,咪比我見到,見一隻鬧一隻。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe