近一個多月，上百萬香港人投身反送中運動，每一次遊行、圍堵、衝突，然後政府一再拒絕回應訴求，都牽動著每個人的情緒。累月以來，倦極了的香港人，有人選擇離隊，於是戰友把他們找回來，不讓他們賠上生命，許多社工與心理學家亦都奔走相救。
由多名心理學家組成的傘後組織「良心理政」，於6月16日開設熱線，在當天黑衣遊行設「心靈傾偈站」，亦提供網上表格，以及接收前線社工、醫生的個案轉介，與當事人免費面談。 良心理政召集人、臨床心理學家葉劍青表示，求助個案當中許多是有上過前線的抗爭者，最細只有15歲。求助者當中，約有三分一是在6.12受到警察暴力鎮壓感到驚恐，造成情緒困擾。有求助者表示，會在日常生活裡突然聞到催淚彈氣味，最嚴重的甚至有幻聽、幻覺，有人表示曾計劃輕生。
葉劍青指，警方的大搜捕行動，乃至入醫院拉人，對於救援工作造成極大妨礙，「流緊血嘅都唔求助啦，何況心理上，所以呢啲大搜捕係好大阻礙。其實你係令到啲有需要幫助嘅人，唔敢求助，令到我哋仲要花啲功夫（搵出有需要人士）。」
臨床心理學家葉劍青表示，6月15日梁先生離世當晚，良心理政成員就決定要成立熱線，翌日開始運作，服務時間為每日早上9時至晚上11時。求助者打來，會由臨床心理學家或教育心理學家接聽，有需要的話會安排與臨床心理學家面談。良心理政之後亦提供網上表格以及接受前線人員轉介，接收個案。過去半個月共收到60多宗求助個案，年齡介乎15至60歲，當中約七成是20至30歲，平均分佈在以下三類個案：
第一類個案：6.12經歷警暴留下陰影
「最主要係Trauma（精神創傷）、恐懼、驚恐，PTSD（Post-traumatic stress disorder 創傷後遺症）。其實就係突然嘅嘢，即係無論災難好、警方開槍、橡膠子彈、布袋槍，或者亂咁射嘅催淚彈，有啲係嚇親，有啲可能係企好遠、唔係前線嘅，都射過嚟而受傷。」葉劍青指，15歲的求助者屬於這類精神創傷，但恢復力強，很感恩有法律及專業援助，目前情況穩定。葉又表示，6.12當日大部分抗爭者未必參與過雨傘運動，甚至是社運新手。
第二類個案：驚嚇引致的身心創傷
葉劍青解釋，有求助者受到驚嚇之後，會令到某些東西「固定」（fixate）在你的腦海，甚至會影響身體，他形容求助者多數出現的情況是：「一個叫intrusion、flash back，即係會回閃image，就算佢唔喺嗰度（畫面出現的場境），個image都會返番嚟，可能係警方舉槍嗰吓。另一個就係senses（感官），例如佢無啦啦坐喺度就聞到催淚彈味。」葉指，這類個案一般需要協助他們放鬆身體，常用的是眼動療法（EMDR）。另一方面，就要幫他們找回初衷，令到影響他們情緒的因素顯得較小。
第三類個案：觸發過去積累下來的情緒問題
「呢次就算無喺最前線，勾起咗佢某個problem 嘅 complex（心理負擔）出嚟。其實好多嘅，可能平時都有咁嘅感覺，例如家庭唔理解佢，或者朋友都唔理解。」葉劍青舉例說，一位60歲的求助者，因為對年青人的歉疚，覺得幫不到忙，再加上長期與伴侶有矛盾，以致在這段時間情緒低落。葉續指，這類求助者受情緒困擾的原因與個人經歷相關，如今因著反送中運動觸發了情緒問題，所以協助他們的時候，一般不是靠心理學家的治療，而是轉交社工提供實質的幫助，更為有效，例如有些人參與遊行時找不到朋友同行，社工可以幫他找一些適合的遊行團體。
今次的反送中運動，溝通模式與過往的大有不同，連登和Telegram成了主要的溝通平台。葉劍青指，留意到連登都有社工「駐場」，在網上一對一傾偈輔導。「我哋（雨傘運動時）癡埋社工做情緒站、傾偈，有啲緊要啲嘅，我哋就take up。嗰個唔同就係，有嘢就容易啲搵人。而家就要靠番（網絡），但我哋唔好低估或者睇小Telegram、公海，一日籌到幾百萬喎，雨傘模式都籌唔到幾百萬，所以唔好低估而家啲年青人，或者佢哋嘅組織能力。」
有網民因為參與6.26包圍警總被警察圍捕，但遭連登仔一面倒批評抗爭者遲遲不肯離場，受創甚深，兩日不願上連登。葉劍青表示沒有收過6.26這樣的個案，但有類似個案，「我哋聽過嘅係，覺得戰友唔明白。呢啲其實5年前都有，因為大家方法唔同，就引起罵戰，呢個佢哋其實而家已經小心咗，不割席、不分化、當然不督灰就basic。」葉建議以不傷人、不罵人的方式表達意見，否則對當事人傷害很大，令對方自我隔離，不會再求助，便會成為高危一群。
葉劍青不認為，依賴網絡溝通平台，會產生更多情緒問題，「virtual reality 都係 reality，但係唔代表個傷害就細，所以調番轉要了解virtual 嘅support。」他又特別提到，世界衛生組織於2000年發表一份給媒體的指引，指出宜低調處理自殺報道。「嗰時應該未留意到而家social media咁，就算你點樣俾心機（低調處理），即係傳統媒體、網媒俾心機，資訊都係出咗嚟。所以根本無得（低調），反而係點樣用個資訊，或者喺資訊裡面留意點樣帶出一啲正面嘅訊息，唔係唔講......同埋你又唔好忘記，今次呢個6、7月嘅年青人be water，亦都有佢哋嘅能力救人，用咗幾十、幾百個人衝去金鐘救人。」
Stickers 下載位置：https://whatsticker.online/p/180319j1ARsoy/HK/zh
葉劍青分享他作為臨床心理學家，怎樣幫助年輕求助者。「我哋做therapy，唔係話要教佢一啲方法，心理學家係可以教方法，但其實係聽清楚感受、需要、困難喺邊度，再聽清楚或者尋找出你嘅能力、方向、你嘅commitment喺邊度，呢啲好緊要。所謂解決困難，其實有可能同佢捲入咗一個死胡同（有關），即係年青人覺得香港有咩出路？我哋作為大人、心理學家，無能力提出咩出路、我哋一樣睇唔到出路。」
他續道：「所以你同佢拗，無出路都唔使咁、無出路你可以對自己好啲，呢啲common sense，或者無乜力量嘅advice係入唔到年青人嘅腦度。一定係要聆聽，你一定要有個心係想理解佢，有個好奇嘅心、尊重嘅心。聽得清楚，唔只你清楚，佢會感受到你明白佢。嗰個就係帶來轉變嘅力量，最主要帶來轉變嘅係個關係。」
良心理政在本周日（7日）會同「十八種香港」及「流動共學」，落區舉辦小組分享聚會。第一場於下午2至6時、第二場於晚上7至10時，由嶺南大學文化研究系客席副教授許寶強與葉劍青主持，活動重點是小組分享及經驗交流。地點定在九龍區，網上報名後如獲確認留位，將以電郵發送具體地址。
報名連結：https://forms.gle/jmrQJRKXGPAbEDZ6A
放鬆小貼士：
1. 放下手機、關上電腦、電視，暫時遠離資訊。
2. 嘗試做令自己放鬆的事，例如運動、瑜珈、食餐好的。
3. 以舒服的姿勢，嘗試放鬆身體。
4. 感受自己的情緒，適當抒發。
5. 與親人、朋友分享感受，互相支持。
相關文章：《情緒波動？放低手機，同自己傾吓偈》
