眾新聞 Logo
眾新聞 CitizenNews
眾說

29個城市以外


6 月9 日,全球12 個國家29個城市有聲援香港「反送中」行動,挪威在這29個城市以外,榜上無名。無緣6月9日動人心弦嘅白海,於是,走去Oslo地標之一Frognerpark,留下腳印記住呢日,向美麗嘅香港兒女脫帽致敬(下圖)。6月9日嘅黃昏,103萬人嘅汗水,竟然飄洋過海來到Oslo化為雨點。

圖片由作者提供並製圖。

6月10日凌晨,年青人反惡法,不惜用血肉之軀,對抗不合符比例嘅警權同暴力,實在頂唔順呢啲洋蔥,把心一橫買咗兩張機票,同骷髏先生飛番香港。撐香港,多兩雙腳,其實微不足道,或者更重要係自我救贖——香港正處於水深火熱嘅大時代,如果唔番嚟,我哋嘅香港身份認同,會有個好大嘅窿。
 
踏足喺呢個令世界感動嘅土地,唔止感動,更有感激。

6月16日200萬+1人大遊行、6月21日包圍警總、6月26日愛丁堡廣場集會、7月1日遊行、立法會煲底......都有我哋嘅身影,我哋盡量做個合格嘅啦啦隊。

「反送中」運動,令我哋重新塑造咩係香港人:
•      一直以來,大台同細台、和理非非同勇武嘅二元對立,原來唔係鐵板一塊,原來可以接近無縫互補
•      對年青示威者嘅衝擊同破壞,原來我哋可以好諒解同接受,因為「反送中」運動令我哋終於深切體會制度嘅暴力,先係最暴力
•      原來除咗「只為搵食」嘅DNA,仲有我哋一直以為自己冇,但原來有嘅無私DNA——「一個不能少」

「反送中」運動,重新塑造咩係香港人,係現在進行式,仲係一個分水嶺。香港人,向世界顯示充滿活力創意嘅Be Water 抗爭策略,亦同時展現動人嘅人性光輝;瞓醒咗嘅香港人,令世界驚艷,香港從此不一樣,有危也有機,也有希望。

呢個6月,心情複雜如五味架:

反送中引發的抗議政府行動,由6月初至今持續近一個月,包括兩次逾百萬人遊行、6.12金鐘警民衝突、兩次包圍警察總部、連串不合作運動、領事館抗議、全球登廣告、佔領立法會等。政府的回應、各界輿論、有人離世⋯⋯ 這一個月,社會幾乎每天都有史無前例的大事發生,香港人如坐情緒過山車,滑着手機的新聞或討論區時,感受到亢奮、希望、失望、憤怒、傷心、痛心、擔心、焦慮、無力⋯⋯(來源:情緒波動?放低手機,同自己傾吓偈|眾新聞|04.07.2019)

身在冇「反送中」大台嘅挪威,究竟可以做咩?除咗亢奮、希望、失望、憤怒、傷心、痛心、擔心、焦慮、無力,我哋多咗份內疚。在地嘅香港兒女重新探索身份認同,重新探索香港前途路向,離地嘅骷髏小姐,挪威雖然冇「反送中」大台,除咗啦啦隊,仲有咩可做?一定有!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe