【撰文：陳假】
有日我見到啲以前見人撞吓門就指責人哋用暴力係唔啱、唔道德嘅人喺度講：沒有鬼，只有同路人。
我又見到有啲以前見人貼下 label 就話人左膠嘅人，喺度幫和理非嘅人宣傳抗爭。
當時我真係諗，自己係唔係眼花？定係佢哋有伏呢？
後來我發覺，原來我唔係發緊夢，香港真係變咗， 變得打爛塊玻璃之後，冇整散整場運動， 各方人士仲盡力保護衝擊者，當日抗爭者衝返入立法會救返幾位死士，更加係有情、有義、有勇氣之舉，每次睇返當日場面，都會忍唔住喊 。
市民唔再好似以前咁見好就收，一場遊行之後再一場遊行，之後更演化成各區接力遊行。網上軍師少咗，取而代之係大家多咗實質嘅行動。唔好問咁做有冇用啦，好多嘢係發生咗之後先知，我唔係先知嚟㗎，唔通當日火燒趙家樓嘅人，會知道以後有咁大回響咩。
面對住絕不退讓嘅港共政權，我哋就係需要呢種互相尊重嘅真正團結，更加唔可以放棄任何一個抗爭者，我哋要堅持繼續抗爭落去，唔可以畀佢哋含冤入獄。
