眾新聞 Logo
眾新聞 CitizenNews
眾聞

警員集體不出示委任證如何追究? 大狀石書銘:獨立調查是唯一方法


周日九龍大遊行後的旺角黑夜,多名警員執勤時沒有出示委任證或展示編號,有人更戴著警察頭盔及手持圓盾公然表示:「警察執行職務係唔需要顯示委任證。」其言行引起公眾譁然。大律師公會執委石書銘,批評該名「警員」太離譜,「警隊帶頭破壞法治,真係好諷刺,一方面佢哋打住執法嘅旗號,但另一方面破壞法治。」

不過,石書銘表示,現行制度下市民好難追究,既無警員編號,制度上又只能向「自己人查自己人」的監警會投訴。他認為,唯一可行的追究方法是成立獨立調查委員會,調查後提出建議,處理警員違規問題。

《警察通例》第20章14條列明:「便衣人員不論是否當值,在與巿民接觸和行使警察權力時,必須表明身分及出示委任證。在案發現場的便衣人員,須將委任證掛在顯眼的地方,讓人易於辨認其身分。」眾新聞向警方公共關係科,查詢上述警員的言行可有違反《警察通例》,警方未有正面回應,僅重覆《警察通例》內容:「根據《警察通例》,便衣人員在與市民接觸和行使警察權力時,必須表明身分及出示委任證。如市民提出要求,軍裝警務人員應出示委任證,除非情況不容許;或出示委任證會影響警隊行動及/或危及有關人員的安全;或要求不合理。」 

7月7日晚上,有人頭戴警員頭盔、手持圓盾,站在十多名便衣及軍裝警員當中,自稱:「警察執行職務係唔需要顯示委任證。」蘋果日報照片

自6.12金鐘衝突以來,多名便衣警員執勤時未有出示委任證,或軍裝警員未有在制服展示警員編號,涉違反《警察通例》(通例)。石書銘指,通例是警隊的內部守則,用以規管警員權力,「其中有個好大嘅假設,就係呢啲被賦予公權力嘅人,佢哋係會合法地行使公權力。但係如果佢哋違反咗自己嘅規例,警隊包庇呢啲人,甚至乎准許呢啲警察違反《警察通例》嘅話,市民一般嚟講要警方負責係好難嘅。」石書銘認為,違規做法並非個別警員的行為,相信是高級警官或明或暗示意容許。

石書銘表示,沒有警員編號的情況下難以投訴指定警員,循民事途徑控告警務處處長盧偉聰亦不容易,只能夠指控盧偉聰沒有履行作為僱主的責任。「要睇番一般民事上面,警察有啲乜嘢責任,譬如佢哋唔可以過份使用武力,如果係過份使用武力嘅話,可以話佢侵害人身自由,令到人受傷,之後向佢索償。呢啲有基礎,但淨係佢哋唔戴委任證或者唔顯示個號碼,呢啲其實係警隊佢哋自己要處理嘅紀律問題。」

石書銘指,過往有少數違反通例而告上法庭的案例。他舉例說,如果有市民拒絕警員搜身後,被警用棍毆打,市民推開警察,結果被告襲警,法庭可以認為警員使用過份武力,違反通例,裁定警員當時並非合法地執行職務,「但呢個首先係市民被人告緊,即係佢本身已經蝕咗架啦。」他續指出,這個個案中,若警員被裁定在違反通例的情況下,濫用武力導致被告受傷,被告可以反過來向警員索償。換句話說,警員違反通例可以是支持市民索償的理據,但通例本身並沒有賦予市民向警方追究的權利。

大律師公會執委石書銘。蘋果日報照片

近日連串事件,立法會議員、市民、傳媒都拍攝到警員沒出示身分證明的涉嫌違規行為,可足以投訴?「其實你可以,譬如你影到樣,起碼可以identify到佢。之後譬如你去警察投訴課,話我而家有條片,就係呢個喇,你哋搵番幾點鐘、喺咩地方、有邊幾隊警員喺嗰度執行,呢啲資料會有嘅,有埋個樣,你要搵一定可以搵到。但一直大家都係講緊警察投訴課最大嘅問題,就係警察自己查警察,再加埋呢啲咁具爭議性同政治意味咁重嘅案件,警察係咪真係可以公正作出調查,好多人都已經有好大嘅疑問。」

石書銘續道:「而家係,警隊自己包庇緊一班違規嘅警員,之後你就走番去警察嗰度告,話呢班警察違規,你根本就向包庇緊人嘅嗰個人,去告人,你話幾咁諷刺。」

他認為,唯有成立獨立調查委員會,才能有效追究警員違規問題,「獨立調查委員會可以調查警察喺今次事件,佢哋係唔係違反法律賦予嘅責任?或者係無履行到佢哋嘅責任?或者佢哋濫用咗法律賦予佢哋嘅權力?濫用權力其中一樣,就係包庇呢啲唔跟警察通例做嘢嘅警員,包括警官。如果警察違咗規,獨立調查委員會有啲建議出嚟,或者警務處自己見到結果之後認為:如果仍然要保護警隊嘅正當性,就做啲嘢。 」

石書銘最後批評:「佢哋(違規警員)對於法治嘅破壞,比起衝擊造成破壞嘅人,嗰個破壞更加大。你變咗有班行使公權力嘅人係唔需要負責嘅。警察係全香港唯一一班可以合法用武力嘅人,佢哋可以濫用武力又唔需要負責,同黑社會有咩分別?仲衰過黑社會,黑社會都需要受刑罰,但呢班警察連內部都包庇佢嘅話,根本就無後果嘅。」

圖左:《蘋果日報》在6.12上午拍攝到有速龍小隊成員制服上有編號。圖右:眾新聞記者在6.12下午拍攝得速龍小隊多名隊員的制服上都沒有編號。



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe