眾新聞 Logo
眾新聞 CitizenNews
眾說

致上一代:我知我哋有幾廢


【撰文:郭倫】
作者為中文及通識科網誌作者,著有《圖解「今日香港」》、《為甚麼我考不好中文》等。Facebook專頁:中文科閱讀理解應試技巧

有網民寫了一篇題為《致下一代:你知唔知你有幾廢》, 我回敬你一篇《致上一代:我知我哋有幾廢》。

年輕人第一廢,就係讓啲公屋地公公婆婆住。

你都知道香港啲樓價好貴,但係輪候公屋嘅制度,就係年紀越大越高分,越容易申請公屋。

換句話,即係年青人寧願住劏房,都讓你啲公公婆婆住到公屋先。年青人做乜咁廢,唔去爭取自己嘅權益而去讓咗畀班老人家住先?班年青人唔止係廢,直情弱智,咁大愛包容對自己有乜著數?

點解年輕人反對明日大嶼、新界東北發展?就係香港明明有好多棕地,可以快啲咁起屋畀班老人家住,但係政府偏偏要花二十年去搞呢啲計劃。

要二十年,到呢啲計劃實踐咗之後,老人家仲有幾多時間住?仲有明日大嶼、新界東北發展起咗屋之後畀邊啲人住,大家心知肚明。我係林鄭都比大陸人住啦,而家你哋香港人有權委任我做特首架?連選特首幫班老人家早啲上樓嘅投票權都冇,所以我絕對承認我哋年輕人廢!

年輕人真係幾廢,廢到係抗爭現場清理垃圾。

年輕人大學畢業萬零蚊人工,可以年年飛幾轉日本、環遊歐洲? 幾個月換一次手機、買波鞋? 有,嗰個咁廢嘅年青人,就係叫做劉鳴煒。

香港係全球最難置業嘅地方,唔食唔住都要20年先買到樓,識得理財就可以買到樓,呢個真係千古奇聞。你講買藍籌股就可以買到樓,有邊隻藍籌股係只升唔會跌㗎?如果係咁容易,當年班公公婆婆一早上曬樓唔使等公屋。就係冇咁容易買到樓,先至有今日單公公婆婆冇屋住。如果咁容易買藍籌就可以置業,咁你係咪鬧緊呢班公公婆婆當年係廢人?唔好意思,我絕對唔同意!我覺得佢哋對香港嘅奉獻好大。

同我講喺美國示威會被警察打死?你知唔知佔領華爾街,美國警察因為過分使用暴力而賠償有幾多錢? 你知唔知美國人可以有槍,隨時可以殺死警察?

美國示威者暴力過香港,你唔講,

美國人有權選總統,你唔講,

美國凡事以美國人優先,你唔講,

美國嘅樓價低過香港,你又唔講,

咁我可以點同你講?

香港納税人供書教養,養到林鄭你個衰女肥肥白白,仲畀份月薪40萬嘅工你做,你而家反骨,仲用槍射老豆老母,冇陰公呀!咁都唔趕你出街,你話我哋幾廢丫?你同我講美國丫嘛,咁我就同你講,喺外國,個政府一早倒台。

有得普選,年輕人咪唔反你囉!乖乖地,老豆、老母先錫得林鄭你個衰女落架嘛!

睇咗你成篇文,成篇文都喺度不斷鬧鬧鬧,鬧完,香港只會增加分裂,你有冇為過香港好?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe