眾新聞 Logo
眾新聞 CitizenNews
眾說

唔使理寶礦力係跪定唔跪


照片來源:徐緣Facebook截圖

回應寫得隱晦,讓自己有點迴旋空間,無可厚非。

嘗試簡單啲諗,出第一次嗰個滿有態度嘅回覆,當然有風險,所以我對上篇文寫:型,就唔使講。關鍵係,型呢一次,需唔需要付出代價。

品牌就價值理念作強烈表態,唔係一個 Marketing 錯誤。營銷大師 Philip Kotler 所寫嘅經典之作《Marketing 3.0》,便高舉以價值作為品牌定位,讓品牌更像一個有血有肉嘅人。

站在某價值一方,必然有成本,如支持同性平權,唔少人認為係普世價值,但必遭保守勢力杯葛。商家衡量得失,也自問真心所信為何物,自己再作取捨。

我嘅睇法係,唔使去判斷呢個回應係跪,定係唔跪。

當日寫第一個回應嗰個香港人,唔理佢係高層中層定低層,總之佢選擇咗做嗰個決定,選咗嗰幾隻用字,已成功激起千層浪,帶起更多品牌討論應否去「撤」。

我地可以做嘅,參考我對上一篇文所寫上一篇文所寫,係喺未來有策略咁支持寶礦力,照做出一個銷售增長嘅局面。

總之,要形成一個非常清晰明顯嘅商業現實:

就係有品牌公然挑戰 TVB,選擇唔落一個幾貴嘅媒體,而㨂投放其他宣傳渠道,雖然有大陸憤青鬧,有引起對 TVB 嘅不便,有人唔開心唔高興,但結果係:生意爆升。

只要形成一次咁嘅案例,便能開風氣之先。

反送中運動嘅一個主調,係我地要齊上齊落,唔好放棄每一個喺唔同崗位出一分力嘅人。

我唔理個回應係跪定唔跪,我會繼續買寶礦力,要佢爆條數上去,用商業嘅結果,去為件事作最終嘅對錯判斷,呢個係保護同聲援寫第一個回覆嘅同路人最好嘅方法。

其實,我覺得大眾唔應該去迫品牌表態,亦唔應該向唔想抽 TVB 廣告嘅品牌施壓。各品牌有自己嘅商業考慮,若果我地崇尚自由,我地應該尊重埋品牌選擇唔同價值觀,或唔想表達價值觀嘅自由。

不過,我覺得民眾自發瘋狂咁去支持主動抽 TVB 廣告嘅品牌,出力去撐同自己理念相同嘅商家,亦係我地消費者嘅自由。

講到底,都係商業衡量。

商業,由人產生。

中共力量好大,可能從一開始,香港人反抗就係不自量力。

但要一個品牌喺香港生意爆升,我諗我地仲做得到。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe