眾新聞 Logo
眾新聞 CitizenNews
眾說

談越演越烈的警民衝突、談人性


逃犯條例風波越演越烈,現時戰線已經發展至各大社區,尤幸今次運動未如雨傘般、拘泥堅守某個地點,要知道這樣的策略對政府而言已不構成威脅。當然,事態發展仍未明朗,但樂見社運發展至社區的新模式,說到底與中共的抗爭,始終是持久戰(所以,懇求絕食陳伯停止絕食了,再這樣下去你只會死-認真,這個政權,根本不屑一顧,又何必呢?);但是,示威後續這種越演越烈的警民衝突,到底又是誰搞出的禍?

談警民衝突

唔知林鄭想唔想試下搵次示威遊行時「落區」,當感受下「氣氛」?佢當然唔會啦,仲唔俾人鬧到 X 街咩。

林鄭想唔想試下搵次示威遊行時「落區」,當感受吓「氣氛」?

一波又一波的警民衝突,近幾星期在香港屢屢發生,警察與人民的血仇越積越多,已經數之不盡。不論示威者也好、警察也好、記者也好,受傷的受傷、差D死的死-岩岩星期六真係又差D發生命案。但最可恥最可恥的,是林鄭一次又一次地龜縮在警盾之後,任由大量警民衝突發生,事後就出嚟在記者會侃侃而談。其實你只要好好出嚟面對吓你管治的群眾,就乜事都無。點解你就係無呢個勇氣呢?藍絲們又同唔同意呢?只要林鄭肯出嚟面對吓示威者,警察都唔使咁辛苦啦是嗎?

周日晚上,沙田新城市廣場內警民大混戰,示威者被制服。美聯社
周日晚上,沙田新城市廣場內警民大混戰,落單便衣被示威者圍毆。美聯社

我唔係話黑警無罪。黑警的罪,在於守護不義的政權、甚至驕傲地守護它(所以真係唔好意思,你哋受傷我真心是心涼既)。但,相比起這種平庸之惡,林鄭之惡更為可佈的地方是,她是可以解決一切的人,但她「選擇」不解決——她就「任憑」警權繼續坐大發惡、「任憑」警民之間打來打去,「任憑」你們絕食至死——這種「任憑」,不僅無恥、不僅冷血、更是噁心。

林鄭一次又一次地,出新聞稿又好點都好,都直指勇武示威者是「暴徒」(which is 呢D「暴徒」只是平民百姓...)。我唔知林鄭你花咗幾多心力,先說服到自己嗰D是「暴徒」。大佬,咁搞法,十八區真係區區都好多暴徒喎,上水屯門今次沙田都係咁(真係唔好意思原來你「統治」緊一班「暴徒」)!喂你睇真D啦,大部分是後生仔,著熱褲 T-Shirt,一路拎住Notes溫書一路示威既中學生大專生嚟架咋。而家班細路,係拍住拖去前線俾人打,然後仲俾人老屈收錢呀(收錢食催淚彈同食椒仲打到吐血?!計落都無可能啦,俾你都唔做啦?!不過藍絲竟然連跳樓都可以因為收錢,呢種邏輯我真係識條鐵)。林鄭你係咪癡左線呀。

現時已經下下見血,可以預想的是,長此下去,終有一日會搞出人命(其實已經搞出人命)。

這些政府口中的「暴徒」,大部分都是年輕的學生。區倩怡攝

談人性

談到這裡,只能夠得出結論,就是政府已完全失去「人性」。林鄭常言,「尊重市民遊行集會的自由」。拜託,市民不是要你的「尊重」,而是想你「聆聽」與「接納」。如果你真是有「聆聽」與「接納」,人地使鬼大熱天時出嚟遊行??你「尊重」我的「自由」,但我們的「訴求」你卻永遠置之不顧,咁呢種「尊重」又有可用呢??解鈴還須須繫鈴人,你真真正正面對你所管治的人民,「還政於民」咪得囉?咁咪收拾到「爛攤子」囉?點解仲唔明白呢?普普通通的「溝通」完全做唔到,仲話「熱心服務香港」?你咪玩啦...

這,是一種人性的消亡。呢班膠官,見到政策有問題唔處理、日日坐冷氣房,諗下點用最少方法「解決」提出問題的人;見到人有訴求唔關心、用暴力解決;見到大量人民為自己一個決定受傷(甚至死亡)、竟然無動於衷。一個失去人性的政府、失去人性的政權,究竟是應該只是實行「真普選」就解決得到,定是需要更大更根本的革命先得?各位不妨好好想想。

最後,我想勸勉大家。柏林圍牆並非一天倒下,在未倒下之前的四十多年裡,也無人想過能與美國匹敵的蘇聯會有解體的一天。與中共的抗爭總是持久戰,勿因一時之氣而流血受傷被捕,委實不值。保持堅毅的心,努力作戰!共勉!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe