眾新聞 Logo
眾新聞 CitizenNews
眾聞

林鄭到那打素探受傷警員 大埔街坊怒斥「林鄭柒婆點解要置香港人於死地!」


行政長官林鄭月娥與保安局局長李家超,今天(15日)下午到大埔那打素醫院,探望昨夜在沙田新城市廣場警民大衝突中受傷的其中3名警員。林鄭離開病房後,在走廊的咪兜前回答傳媒提問期間,在鏡頭外的大埔街坊阿華大聲斥道:「林鄭柒婆點解要置香港人於死地!」兩名醫院保安人員迅速將他按向牆角,他被逼面向牆但繼續高聲疾呼。林鄭回答完該條問題,就即刻轉身離開。林鄭繼上周二(7月9日)稱修例「壽終正寢」後,隔了五日才再公開露面,但僅回答兩名記者問題。

特首林鄭月娥(右)與保安局局長李家超(左)一同見記者。港台直播截圖

大埔街坊阿華(化名)現年30多歲,是個普通基層打工仔,今日身穿短褲、T-shirt、手持一個風扇仔,「單拖」去到醫院找林鄭月娥。他向眾新聞詳述事件經過:「我3點鐘碌Facebook見到林鄭去咗那打素,我咪即刻換衫上去。我初頭搵嚟搵去都唔知佢喺邊,我喺急症室嗰層,即係地下,見到有採訪車泊喺度但唔見有記者,我喺公海群組問知唔知道林鄭喺邊度,有人話喺2樓,跟住我咪搭電梯去2樓。一出電梯就見到個八婆喺咪兜度扑咪,跟住我咪即刻開佢波。」

當時林鄭已回答了第一個問題,記者問她,是否如外媒報道,曾向中央請辭遭拒?林鄭沒有回應是否真有其事,僅表示特首任期為5年,承認自己目前面對好大困難,但仍「有承擔同熱誠」完成任內工作。她又指6月15日已經宣布:「徹底停止有關修例嘅工作。所以我希望社會亦都諒解,嗰個引發抗爭嘅事已經唔存在。」

第二位記者詢問為何堅拒成立獨立調查委員會,林鄭正在回答就聽到阿華罵聲:「林鄭柒婆點解要置香港人於死地!」很多傳媒的直播都清晰聽到這句,但他話音未落就被兩個保安員按住,他堅持扶住欄杆,未有被按在地上,只是被逼坐低面壁,但仍繼續疾呼。「跟著我問點解要出賣香港人,我話,你嗰兩個仔有英國國籍,可以隨時走,但係我哋香港人就無得走。」

他說現場有幾個圍觀的女士,叫保安不要打人。由於阿華被逼面壁,他看不見林鄭,直到圍觀的街坊跟他說林鄭走了,他才停止罵聲,「我都唔知佢咁快走,諗住繼續鬧架嘛」。離開的時候,他跟一個「藍絲阿伯」對罵了幾句,然後就回家去。他說一直到好想當面罵林鄭,難得今日林鄭出現在大埔,自己又未夠鐘返工,於是他二話不說就去開罵。

問到最令他覺得憤怒的是甚麼,他稱:「佢唔道歉認錯,同埋縱容警隊繼續咁樣打市民。啲差佬失晒理性咁樣,見人就毆,對市民嘅不滿發洩喺示威者身上,你見尋日新城市都係,啲市民無挑釁,都係咁追住市民嚟打。」他表示因為工作關係,在剛過去的周末沒有參與遊行示威,但在6.12都食了催淚彈,至今未有受過傷。 

阿華(右)第一次當面罵林鄭月娥。《蘋果日報》照片

林鄭上周五出席香港建造商會閉門晚宴,發言時表示支持警隊,並表明不會出賣警隊。她今日慰問受傷警員後見記者,表示感謝警隊,並稱警員受到「暴徒」襲擊:「我哋嚟到當然係感謝我哋嘅警務人員,走到最前線,維護香港嘅治安,佢哋盡忠職守,而且非常之專業、克制,但係竟然受到呢啲暴徒,我覺得真係可以形容為暴徒,肆意襲擊佢哋。」

對於為何堅拒成立獨立調查委員會、警員執勤時情緒不穩怎能成為藉口?林鄭答道,上周二已經回覆了第一個問題,然後指:「如果大家,包括記者朋友,如果認為呢個過程(警方執法期間),有一啲你哋認為唔適當或者唔合理嘅行為,亦都可以向監警會提出呢個投訴。事實上,監警會到目前為止,亦都收咗幾十個呢啲投訴,包括來自傳媒朋友嘅投訴。」說罷就匆匆離開。 

大批裝備充足的警員昨夜衝入新城市廣場。美聯社

李家超則在短短5分半鐘的發言,三度感謝警隊:「我亦都好似行政長官一樣感謝佢哋,喺呢個咁艱難嘅時候,大家同心協力,堅守崗位,面對唔同嘅挑戰同埋壓力」、「警隊喺咁困難嘅時候,都係同心協力去維持公共安全、公共秩序,我哋係非常感激佢」、「我再次感謝警隊,喺咁困難嘅時候,都可以堅守崗位,同心協力」。

李家超又指:「刻意攻擊警方嘅暴力人士,係非常有組織性,包括有物資、有聯繫、係有口號,亦都有手勢,係有計劃嘅,有刻意堵路同破壞社會安寧。」

林鄭與李家超慰問受傷警員,有多家媒體在Facebook直播,眾新聞抽查三家傳統媒體:香港電台、有線電視和now新聞的直播,截至晚上約8時,這三家媒體的林鄭直播分別錄得「嬲嬲」4004個、6818個、4913個,數量遠超其他「表情」,佔總數約9成。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe