眾新聞 Logo
眾新聞 CitizenNews
眾聞

內地從商多年 邵仲衡:身為特首,要識同上面say no


7月1日,邵仲衡看著示威者佔領立法會,感觸、感動:「係完全無保留、赤裸嘅反抗。點解我哋要出聲,係對香港有份感情。無感情使乜理佢,行咗去咪行咗囉,有感情至會出聲,所有嘢都係從心,而家好多人都係從心。一個地方有咁多人從心,咁大批後生仔從心去愛呢個地方,唔使死嘅!」

邵仲衡相信,年輕一代如此愛香港,未來是樂觀的。

政府警察有公權力,使乜去撐

2015年,經典劇集《大時代》重播,飾演「大佬孝」的邵仲衡再現幕前。有別於其他藝人,現年55歳的他高調論政,由親身到雨傘運動現場、網上響應「一人一相反對女性胸部被視為攻擊性武器」行動、七一上街、讚好德國領事館貼文談「尊嚴」(5月本民前黃台仰獲德國批政治庇護),至近期緊貼反送中新聞。

邵仲衡笑言,把論政風氣帶進娛樂圈,總算有點貢獻:「身為公眾人物 ,唔係出嚟講:『大家好,我係邵仲衡!』你有個咁嘅身份,咁多人留意你,係要有社會責任,覺得唔妥嘅,就要做啲嘢,應該講啲嘢。」他認為,觀眾的品味學養已高過業界所能提供:「講膠嘢,觀眾會笑你呀!啱就啱, 唔啱就唔啱,呃唔到自己。」

對於譚詠麟、鍾鎮濤與梁家輝等藝人出席「撐警集會」,邵仲衡認為各有所求:「不過,身為眾人偶像,我覺得唔係好適合;或者佢唔食,佢班手足都要食,佢咪要做,但聰明人係唔會咁做。有人覺得應該撐警察,但一個正常社會,政府與警察已有公權力,使乜去撐,納粹德國嗰種政府至需要咁樣撐。」

近日反送中示威,讓他想起 2014年雨傘運動,親到現場看見的一幕:「香港從未出現過 (佔領運動),所以到現場觀察、了解。烈日當空,最深刻印象係見到黎智英 (壹傳媒創辦人) 坐喺個營幕入面,一個肥佬、年紀又大,30幾度,著住件背心、搭條毛巾,戴住老花眼鏡睇書,我心諗真係熱死佢。佢點解要咁做呢?我解釋唔到。佢咁嘅身家、地位,無必要咁做,無必要做俾你睇,就係因為佢對呢個地方嘅愛囉。」邵說,就如你我正在做的事 — 保護這地方、捍衞香港核心價值。 

邵仲衡早前經過中環連儂牆,以「司馬至全」名字 (ViuTV 劇集《詭探》角色) 留下打氣 memo。(受訪者提供)

 

邵仲衡留言的中環連儂牆。(受訪者提供)

政治與生活緊扣

邵仲衡認為,自6月9日的百萬人大遊行起,運動訴求歸根究柢,市民只為安居樂業。「烈日當空,你估好過癮呀?30幾度,行街都熱死啦,更何況扶老攜幼?你竟然夠膽話拎去二讀,今時今日仲講咩『壽終正寢』。唯一可以解釋,就係為咗一樣嘢 — 利益、特權。」

港人認識的邵仲衡,多是《大時代》的丁孝蟹 (大佬孝),或知道他曾從商近年再現幕前。他是理工大學設計系畢業生 (1983年),畢業後曾加入政府,於康文署前身當技術主任 (technical officer),參與過西貢北潭涌上窰民俗文物館、大埔墟火車博物館、荃灣三棟屋等項目的設計和建造工作。 「本身對公共事務好有興趣,加入政府後,見過有人用政府資源做私幫嘢,仲要聲大夾惡,覺得個世界唔應該係咁,覺得應該可以做到少少嘢,個根就喺度種咗。」

他在政府工作1年後離職,加入高文安設計公司、國際品牌顧問及設計公司 Landor,後於1987年參加「超級新星大賽」進入娛樂圈,仍兼顧內地設計及裝修工程。「做過夢特嬌第一間連鎖店,當年專做大品牌連鎖店,要經常上去睇地盤;仲記得當年去啟德機場排隊 stand by (等候補機位)好方便,千一蚊機票飛上海,俾多七百坐前面,即係今日嘅 business class;又試過夜晚拍完通宵戲,第二朝7點搭直通車上廣州。」

他當時20多歲,經常往返內地,後於1994年離開娛樂圈,經營越野車生意,曾在東莞成立公司以中介角色在華東搞方程式賽事。「香港做門市16年,內地做了4年,乜嘢級數客人都有,由超級富豪到廠佬,有話嚟做報關,一睇就知做走私。」他自2008年定居北京:「喺國內生活咁多年,一定會有人搵你傾偈,要做政協,十個都有得做,係自己嘅選擇,到今日都好多朋友係解放軍、最高級武警。」他於2012年把內地生意放下,重投幕前,拍過電影 《點對點》、《逆向誘拐》,ViuTV劇集 《詭探》等。

烈日當空,再三上街,只為保衞香港。資料圖片

不恥下問 任用賢人

邵仲衡形容,香港和內地是兩個截然不同的社會發展系統:「舉例說,投標前要攞圖、標書,在香港的話公司會搵個職員,攞資料返去俾老細睇。但內地就會搵個某某大學建築系教授嚟傾,其實只係攞份標書返去填,香港,甚至外面世界都唔係大陸咁。」

「内地好多直轄市,中央根本管唔晒,唔同種族已經好唔同,四川粗獷啲、湖南人係thinker。大陸好多省市唔同,同一樣政策去到唔同地方要fine tune。香港係一個備受全世界信任嘅資本市場。作為香港政府 ,上面有指令,喺咪要識得fine tune?」從商後,他獲住在美國柏克萊的朋友邀請加入一個智庫學習,並完成政策相關的碩士學位。

「(班高官)一出嚟就打政府工,去幾多次大陸?返去一兩日,前呼後擁,行行食食,走馬看花,落返嚟就話識大陸,內地有好多特有事物。佢哋嘅問題係唔認識內地,你見 (内地官員)第一時間走出嚟話,唔係我哋叫 (修訂逃犯條例),嗰吓都笑到轆地啦。」

「呢個同你講話做,唔代表上面係咁諗;要了解中國政府模式同外面世界好唔同,唔可以當服侍舊老細(港英政府),佢哋截然不同。今次呢個真係焦土政策,唔係點會咁多人走出嚟?作為特首,係要識得 say no。」

「97年前做生意,政府搞掂晒,好多嘢唔使擔心,有啲咩古靈精怪,偷步、貪污呀,好快俾人清咗,你去搵錢,群策群力,全世界無一個地方咁細,可以做咁多嘢出嚟;但而家好多嘢唔公平,班高官講埋啲嘢,完全唔make sense。」

他認為了解both worlds (國際及內地)至為重要:「唔叻就搞到而家咁,動搖香港根基,好多國際企業準備撤離香港,加上內地金融市場緊張,香港好多大陸投資都收縮緊。」他直指特首林鄭月娥:「佢係個 know-no ,但佢唔會話:『我唔係好識,幫幫忙。』佢講唔出口呀!我哋外面世界,好似踢波咁,要識補位。政治要平衡利害,好多細微嘢,你睇番(前港督)彭定康、衛奕信,政客有好多嘢。講能力,佢可能係(歷任特首)最好,但佢唔夠data,咁點process? 唔夠料就要去進修。」

不懂國事既不去問,又不禮賢下士,任用賢人。「好多嘢要識變通,可以問吓 (內地)呢度可唔可以咁改改。呢個人 (林鄭) 明顯有不足,邊個選佢出嚟呀?咪就1200名選委囉。點解唔俾多啲香港嘅叻人參選?咪就係驚選咗個控制唔到。」一人一票真普選,落實何期?

邵仲衡說,安居樂業是他和不少香港人的底線。

場地鳴謝:東南樓藝術酒店 room 68

攝影:Lew




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe