眾新聞 Logo
眾新聞 CitizenNews
眾說

談林鄭記者會、談記者們、談港大Standing Order


睇記者們(尤其是利君雅)記者會爆Seed呢段片,睇林鄭被追問到塊面黑過墨屎,當然大快人心;但另一方面,我發覺通常記者朋友都會一次過問幾條問題(機會寶貴,當然一次過問幾條),但實際上答者往往答唔到咁多條問題重點,仲令佢可以避開好多原本極為尖銳的問題(我頂...)。這讓我想起眾膠官的畢業學府香港大學,有樣野叫做 Standing Order(中文為會議常規),其實非常好用,點解唔可以起記者會度用?!

談Standing Order會議常規

Standing Order(會議常規),為HKU一般正統答問大會必要學識的規矩。我唔知其他 U 有無呢樣野,反正HKU對 Standing Order 呢樣野是十分注重(入得HKU上莊(又或者去過Hall O),最深刻一樣嘢相信就是一開始見到一大班 Current/Final 用「震憾性的聲音」、氣勢如虹地面對台上被諮詢(質詢?)又未熟識 Standing Order 的 Freshman /台上發言者舉手大叫「Order!」)。學苑指出,Standing Order「原意為節省時間、提高議事效率,故此對會眾的發言內容要求甚高。除了賦予主席更大權力以控制會議進度外,亦明文禁止回答者「答非所問」。當台下會眾認定發言者離題,便可隨時提出規程問題打斷其發言。」 [1]

根據港大《學苑》,「根據香港大學學生會評議會議事規則(Standing order,下稱議事規則),會眾可就三個情況提出規程問題 [2],與英國國會和香港立法會的議事規則相若,分別是:

一)發言者離題(Travelling outside the scope)

二)發言者使用非議會用語(unparliamentary language)

三)發言者違反議事規則或其他守則

另外起HKU答問大會中,仲會有非常清晰答問程序,包括主問題、跟進問題(Follow Up)、與台下回應(Comment)。如果答案唔能令台下滿意,台下可以一直Follow Up落去,而且可以俾Comment台上內閣。

被人「Order!」即係點?

咁即係點?即係如果台上答問題講一D「非議會用語」、發言離題(Travelling out of scope)等,台下可以即時打斷你(大叫「Order!」),以免你繼續作無謂的發言,要求正面回答問題。「Order!」人呢樣野,是幾有氣勢(同埋俾「Order!」的人到底有幾面慒)呢?以下是港大 Campus TV2019 年度周年大選中央諮詢大會的片段,大家可以聽下「Order!」的人的氣勢是幾咁強勁(可直接飛去13:20)

睇到的話,就知道其實俾人大叫「Order!」是非常之樣衰,因為這代表你唔識會議常規、或是說話內容離題。講番政府記者會,如果有Standing Order,不但可「節省時間、提高議事效率」,而且亦唔會出現「人肉錄音機」同埋「答非所問」(俾人無限「Order!」極之樣衰)。當然,我相信政府是絕對不會引入呢套系統,唔通拎石頭擲自己對腳咩。但是,咁同時亦顯示出,呢個政府對人民又幾有承擔?尖銳問題完全迴避,台下亦無從Comment台上發言者,呢個內閣到底又有幾願意聽人意見??問到咁上下唔識再答(例如被問「會否落地獄?」),當然是立刻轉身著草啦~

利君雅一句「講人話呀,唔該你!」,講出市民心聲。

最後,話說我哋上莊嗰陣,坐喺度抄低人哋問的問題是基本動作,人哋都唔 expect 你個腦真係記到咁多條問題。另外,你可以一路聽、一路寫少少你會答咩,整理好答案,都是合理而尊重人的做法。如果上莊嗰陣,俾人發覺你無認真抄低問題同答問題,是絕對會俾人「Order!」你既(真是可笑,大學上支莊都認真過你哋班契弟)。呢個政府,真係連大學廢青都不如...

(1)【大選快訊】中央諮詢大會回顧 蒼傲創 Order 新紀錄
(2) THE STANDING ORDERS OF THE HONG KONG UNIVERSITY STUDENTS' UNION COUNCIL


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe