眾新聞 Logo
眾新聞 CitizenNews
眾說

同工運大佬挪威比,香港一啲唔失禮!——寫於8月5日大罷工前夕


8月5日香港大罷工,關鍵一役,大家都屏息以待,結果未知,但表態會罷工嘅企業同員工,雨後春筍,可審慎樂觀,唔單止,其實香港人好鬼勁,同工運大佬挪威比,一啲唔失禮!點解?行咗漂亮嘅第一步,如未能成功爭取政府回應,係咪有下一波?係咪人要多嘅大罷工,先有勝算?

周滿鏗攝

同工運一哥挪威比,香港一啲唔失禮

同北歐其他國家一樣,挪威嘅工運歷史悠久,集體談判成績亮麗,係工運大佬,而工會組織,係一個要素。挪威工會嘅組織,有多個層次 :
•       個別公司嘅工會
•       個別行業嘅工會
•       地區行業工會
•       全國行業工會
•       全國總工會組織:呢個比較特別,因為有啲界別,睇落彼此雖關連唔高,但薪酬接近,好多時訴求亦接近,為咗更有力量去集體談判,所以行埋,出現咗呢啲全國跨界別總工會組織,挪威有4個呢啲總工會:

(1) LO:最大工會,120年歷史,會員90萬,主要係公務員
(2) Unio :會員主要係教師、護士等
(3) YS:會員主要係行政人員、技術人員等
(4) Akademik:會員有高等教育背景,如醫生、律師、牙醫等

每年春季,四大工會就同政府集體談判,提出訴求,如果談判膠著/破裂,工會就會罷工,有需要罷工會升級。
 
挪威人口約500萬,就業人口約270萬,四大工會會員人數近170萬(2019),即係工會會員佔就業人口62.2%,每10個僱員就6個係工會會員,同挪威比,香港係BB,冇大台,冇銀彈支持罷工嘅工會,但大罷工前動員嘅人數同聲勢,一啲唔失禮。更加重要係,有唔少年青人喺地鐵做人肉宣傳,喺街頭跪下求市民參加罷工,年青人嘅單純,年青人愛香港嘅丹心,勁派洋蔥,不過,大家都係自己人,唔使跪架;所以,喺人人自費、動員方法百花齊放、道德情操等等,我哋贏挪威幾條街!

講番8月5日,大罷工,係咪人多,先有勝算?

大罷工,係咪人多先有勝算?

8月5日大罷工 ,罷工人數的確重要,係顯示冇大台下香港人力量嘅表現,但如果8月5日未能成功爭取政府回應訴求,係咪繼續大罷工浪潮?咁係咪罷工人數多,先有勝算?
 
睇番挪威2010年大罷工(表1),四大工會會員170萬,參加罷工人數只係4萬幾,唔係好多,但仍成功爭取。

再睇真啲,學校係重點罷工機構,關鍵嘅教師屬UniO工會,教師會員94,191,但罷工嘅教師護士職員,加埋先係17,400人!即罷工人數唔使好多,人數只係成功嘅其中一個因素,挪威2010年大罷工,四大工會唔係靠人多,係靠策略:

1) 唔係四大工會所有會員都罷,只係揀對手死穴嘅關鍵界別/機構罷
    2010年關鍵界別係:學校、托兒所、老人院
2) 唔係所有城市嘅學校、托兒所、老人院都罷,只係揀關鍵城市罷
3) 喺罷工城市,唔係所有嘅學校、托兒所、老人院都罷,只係揀關鍵嘅學校、托兒所、老人院罷
4) 喺罷工嘅學校、托兒所、老人院,唔係所有工會會員都罷,只係每間揀關鍵人數罷

如談判膠著/破裂,就逐步升級。
挪威2010年大罷工致勝,係搵出關鍵界別,仲有地區、機構同人數分佈;喺微觀嘅企業層面,要搵牽一髮動全身嘅關鍵部門,本小利大。不過,罷工漫漫長路,即使得天獨厚嘅挪威,都有唔少徒勞無功嘅時候。
 
今次反送中運動,至今香港人表現卓越,如有罷工浪潮,相信會一浪接一浪越嚟越出色。退一萬步,即使呢個涼薄邪惡政府唔回應,至少可令勇武年青人抖抖,仲有,喺過程中,可結連跨世代、跨政治光譜、跨界別、跨區、跨社經背景嘅香港人,令本來已經好團結嘅香港人更團結,組織能力將更強大,將有驚人能量,工運將譜新章,單係呢啲公民社會質素,已值得努力。
 
罷工 ,次次靠人多,會勞民傷財,香港人最叻以小搏大玩槓桿,醒目靈活走位高效,係香港人強項,喺罷工浪潮,香港人會唔會再令世界驚艷?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe