眾新聞 Logo
眾新聞 CitizenNews
眾聞

【8.5金鐘】青年隔水馬斥警方:畀人利用仲唔知,是為不智


 

市民昨日發起三罷行動,並在七區舉行集會。位於金鐘添馬公園的集會下午1時開始,集會人士填滿添馬公園、立法會示威區,及後佔據添美道、夏愨道及部分夏愨道行車天橋。

警方下午向人群投擲多枚催淚彈,以強硬武力清場。此時,添馬公園仍有大批集會人士聚集,部分市民經海富天橋離開時,與駐守在政總對出天橋的警員,相隔水馬對罵。其中,有一名戴上全副裝備的青年痛斥警員……

年輕示威者痛斥警員躲藏在「狗屋」(警署)、巨型水馬陣內,向示威者擲催淚彈、放胡椒噴霧,「我哋起碼肯行出嚟為自己個家。你?賣港賊!仲要搵兩萬八……」

(警察)畀人利用仲唔知,是為不智。明明我哋市民先係你哋要服務嘅人,是為不忠。你哋專蝦啲老弱婦孺,是為不義。不公、不義、不智嘅犯法狗。你哋繼續照啦,我哋係唔怕光㗎。要有你哋啲垃圾先要匿埋喺入面,黐啲雷射膠紙。驚咩呀?你咪繼續照我囉,我有咩好驚呀?我又冇犯法,我冇錯。我為公義企出嚟,而你哋呢?匿埋喺入面,連編號都唔敢拎出嚟呀,羞唔羞家呀?有啲連自己要出示委任證都唔知道,到底點畢業㗎你哋? 

 

 

有記者舉機拍攝水馬內的警察,即被喝止:「喂!拍乜X嘢呀?」有警員批評在場拍攝的記者採訪不公道,一度透過水馬間縫,直朝記者噴射胡椒噴霧。該名年輕示威者續斥警察:

點解我哋每個禮拜走出嚟,係為乜嘢呀?我哋為嘅,係爭取番我哋要有嘅自由公義。而你哋每個禮拜出嚟,為乜嘢呀?為你嗰份糧,埋沒自己嘅良心。你自己問吓自己,對唔對得住自己?對唔對得住我哋?對唔對得住你哋父母呀?每日都畀人問候,對唔得住你阿媽呀!你番去(屋企)斟茶認錯,係因為你個不孝子、不孝女,令到你阿媽成日畀人問候。

圍觀群眾報以一陣歡呼。該名青年接著說:「我哋一個市民都冇傷害過。就算連你哋,黑警、黑狗,我哋都冇傷害過你哋。」警員隨即用粗口罵他:「收皮啦!」

示威者於是叫警員走出水馬,跟他講道理,「你行唔行到?你敢唔敢呀?你唔敢呀,知唔知點解?因為你理虧,你怯呀。點解你哋要係咁射催淚彈呀?你哋驚呀,驚你哋停低咗,個腦就唔記得咗,你做緊錯嘅事呀。你哋明知自己做緊錯事,你哋唔停咁做,就係希望可以遮咗你哋個良心呀。」

這天下午約4時半,警員設於政府總部、2米高水馬圍牆內,朝夏愨道人群施放多枚催淚彈,並一度舉起橙旗,發射橡膠子彈。及後有警員走上政總天橋旁的平台,向地面一次過投擲多枚催淚彈。

有示威者在夏愨道行車天橋及地面,向水馬內的警員投擲雜物。前線示威者在最接近警方的地面,半蹲在自行搬來的水馬後,以木製盾牌及雨傘築起防線;另一批示威者用水澆熄掉下的催淚彈。在天橋平台上的集會人士,向地面警員高呼「不畏懼、不徇私、不對他人懷惡意」的警察誓詞。

至傍晚6時許,一輪催淚彈攻勢後,現場示威者呼籲轉場銅鑼灣,人潮慢慢沿告士打道向灣仔方向移動,不久後夏愨道已近乎清空。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe