眾新聞 Logo
眾新聞 CitizenNews
眾聞

浸大學生會:方仲賢獲釋前警搜屋逾1小時


周二晚於深水埗被捕的浸會大學學生會會長方仲賢,因購入10枝激光電筒,被警方指是「鐳射槍」藏有攻擊性武器拘捕,今晚獲無條件釋放。浸大學生會證實,警方於今午5時30分至晚上7時之間,曾進入方仲賢位於西貢的住宅搜屋,搜屋時間超過1小時,並無帶走任何物品,而方仲賢當時仍然在明愛醫院留醫。警方晚上約8時表示,方仲賢拒絕保釋候查,已獲暫時釋放,警方保留檢控權利。

方仲賢於周二晚在深水埗被數名休班警員截查,其後被拘捕。網上影片截圖

方仲賢獲釋的消息在周四晚近6時30分傳出,其後獲浸會大學學生會證實。在方仲賢獲釋前,警察公共關係科(PPRB)下午4時舉行例行記者會,PPRB總警司謝振中回應方仲賢案時指,警方仍在進行初步調查,「方先生接受完治療之後,我哋會同佢進行調查,但初步呢,因為呢個案件我哋仲需要做一啲科學鑑證同其他專家證人嘅理解,所以呢,方先生接受完醫療診治同初步調查之後,我哋計劃俾佢先擔保,繼續我哋嘅刑事調查。」警方又在記者會上表示,仍然未知所檢獲的「鐳射槍」功率(激光強度)多高,有待檢測。

方仲賢被捕後,大批市民周三晚到太空館外帶同激光筆觀星,警方被問到當晚可有任何行動,以及是否針對方仲賢選擇性執法。謝振中指:「其實我見到佢哋都會用鐳射筆去照射到可能附近一啲紙張,我哋初步喺呢個情形睇,佢哋嗰啲鐳射筆似乎係一般嗰啲鐳射筆,所以喺我哋嘅觀察裡面,睇唔到可疑嘅地方,要作出即時嘅跟進。」他指,太空館外聚集市民所用的鐳射筆,有別於警方周三示範所用、從方仲賢身上檢獲的「鐳射槍」,但沒有回答記者追問如何分辨「鐳射槍」與鐳射筆。

被問到警方是否周三有到太空館外觀察,PPRB高級警司江永祥沒有正面回應:「過程裡面我哋有去關注同埋留意呢個活動成個情況係點樣。(具體係點關注?有無落場?)如果確定嘅、如果確實嘅,我哋噚晚嗰個調配呢,第一,我手上無特別嘅資料,我而家答你唔到。」記者追問:「無資料點講頭先嗰番說話?即係你話覺得噚晚無人用同方仲賢嗰枝所謂『鐳射槍』一樣嘅?」江永祥後來承認:「你講有關我哋點樣知道現場嗰啲器材係啲乜嘢呢,事實嚟嘅,我哋無落到去取證嘅。」

江永祥續指:「我哋見唔到任何參與活動嘅人士,係用佢哋嘅器材向任何人照射。而我哋主要見到呢,佢哋都係用嗰啲器材照射太空館外牆,所以我哋唔會話佢攻擊太空館外牆架嘛。」至於那夜觀星活動可有構成「非法集結」,江永祥稱活動和平進行,無擾亂公眾秩序,更無破壞社會安寧,所以警方盡量不干預。

警察公共關係科高級警司江永祥。莊曉彤攝

網民又關注,警方周三在記者會上以檢獲的「鐳射槍」示範燒紙,欲了解「鐳射槍」本身有無入電、警方自行入電又是否干擾證物。謝振中指,所檢獲的「鐳射槍」本身沒有電池,入電才可確認那是「鐳射槍」抑或電筒。「關於證物檢獲之後,大家放心,警方處理任何證物都有非常之詳盡,亦都係非常之緊密嘅程序。所以由檢獲嗰10枝『鐳射槍』到成個程序裡面,我哋都有一個證物嘅人員去跟住嗰枝『鐳射槍』,所以證物嗰個處理大家唔需要擔心。」

後來有記者再問及警方處理證物的問題,謝振中說:「我諗警方係絕對尊重或者無意圖去影響任何司法程序,我哋噚日展示『鐳射槍』俾大家,唯一嘅目的,就係希望回應公眾嘅關注。喺記者會裡面示範,係希望話俾市民聽,呢個係真係一個『鐳射槍』,證明我哋當日嘅拘捕係合理懷疑下進行嘅一個拘捕,而警方喺進行調查裡面,係必需要進行好全面嘅搜證工作。」

網民又提出,要求警方於5米距離試射催淚彈、橡膠子彈等,證明這些是非致命武器。江永祥答:「我喺呢度可以向公眾講番,我哋警務處所使用嘅唔同武器或者槍彈,其實我哋全部都有了解過嗰件武器或者槍彈嘅,嗰個原廠嘅一啲,er...um...嗰啲數字,或者數據嘅,er...而原廠亦都喺佢哋生產嘅時候有晒所有測試,所以我哋睇唔到有需要做呢方面嘅實測。」但未有回應所謂「數據」是甚麼,記者亦都質疑警方使用過期催淚彈、向示威者平射或射頭,均是不合乎武力指引,安全性成疑,警方一律沒有回應。

警方於721上環衝突中使用了約55枚催淚煙及催淚彈、5發橡膠子彈、24枚海綿子彈。資料圖片

警方在記者會的開場發言則提到,接下來的幾日仍有多個遊行集會,包括機場及一些區份,至今未收到機場集會的不反對通知書申請,而擬於本周六(10日)舉辦的大埔遊行,警方已經發出反對通知書。江永祥又指,警方昨晚在尖沙咀拘捕3名男子,年齡介乎22至34歲,涉及刑事毀壞及傷人罪,與太空館外的觀星活動無關,涉案人因為在尖沙咀鐘樓噴漆而被捕。

另外,正處於退休前休假的前警務處副處長(行動)劉業成有傳重返警隊,出任副處長(特別職務)一職,即警隊或將同時有3名副處長,另外兩人是副處長(行動)鄧炳強及副處長(管理)郭蔭庶。傳媒在記者會上向PPRB求證,謝振中答:「你問到一啲退休人士會否再join番警隊,我哋現階段無呢個資料,但所有關於人事任命嘅事宜,如果我哋一有清晰嘅資料,會作出一啲公布。」其後再有英文傳媒問到退休警員回巢原因是甚麼、是否意味警方無能力處理現況。警方沒有回應。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe