眾新聞 Logo
眾新聞 CitizenNews
眾說

講冇建樹,夠你林鄭?


中共同港府近日加強攻勢,日日開記者會攻擊示威,但狗口長不出象牙,只識鬧人搞壞經濟同賴外國勢力,對於呢個局面如何自己有份造成,隻字不提,應該話唔敢提。

最新,講過N次會學習謙卑同溝通既林鄭,直頭鬧示威者對社會冇建樹冇stake,所以搞破壞。又嚟依種有貢獻冇貢獻論?第一,邊個話反政府的人冇貢獻? 多場示威同罷工都有各行各業,無論法律界、醫護界、交通界、金融界、公務員參與,甚至影后同前高官都有呀,你敢話佢地全部都冇貢獻?第二,有貢獻先有權出聲呀? 咁不如搵班富豪治港啦,佢地貢獻得多GDP,其他人貢獻就少丫嘛。仲有幾時取消體育界、漁農界議席呀?第三,其實正正係年輕人太有stake,先咁緊張香港。 班年輕人未來五六七十年都要係香港過世架,點會冇stake呀。已經未同你講2047添啦,你班老嘢根本唔夠長命唔需要驚,又或者揸緊外國護照所以唔洗驚。

一名昨天在機場參加「和你飛」集會的市民,舉起抗議林鄭出賣香港、祖國和香港警察的標語。美聯社

講開又講,最冇建樹咪你班親中派,尤其你林鄭囉。回歸廿年,治港無方,各類深層次矛盾無解,民心離國家越來越遠,都唔肯認自己有錯,一味賴咩識用TG就係外國勢力操控。律政司帶頭犯法,財政司就開劏房,仲有個政務司就真係做過咁多年官都冇人知佢有咩建樹。

不過都唔夠你林鄭有建樹啦,成件事個元兇就係你,你仲好意思話人搞破壞,最破壞香港咪你囉。唔只逼出香港史上最大型反政府運動,又搞到成個禮崩樂壞警黑合作, 仲有響中共建國70周年前夕同中美貿易戰之中為國家添煩添亂,邊個夠你建樹多呀?考第一添呀。其實你只要一句撤回送中或者獨立調查,局勢立即緩和,示威者起碼即刻少一半,暴力行為即刻減少。咁簡單就可以幫到香港既嘢你都唔做,學咩人講建樹呀你。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe