眾新聞 Logo
眾新聞 CitizenNews
眾聞

警更新6.12彈藥數字 較兩個月前公布多90發催淚彈 首次提及海綿彈


警方在昨日的例行記者會上,公布兩個月前在6.12金鐘清場行動中所用彈藥的最新數字,與6月13日警務處處長盧偉聰所公布的數字,有明顯出入。盧偉聰當日稱,發射超過150發催淚彈、數發橡膠子彈、大概20發布袋彈。但警方昨最新指,6.12用了約240發催淚彈、約19發橡膠子彈、3發布袋彈、約30發海綿彈。其中海綿彈是首次提及。

警察公共關係科高級警司江永祥表示:「因為同事可能去計數嘅時候,將布袋彈同海綿彈個數字撈亂。(你哋同事係咪出錯,會唔會需要徹查同處分?)(你哋係咪專業架?連呢啲都搞唔清。)我諗我哋最初提供數字嘅時候,都係行動比較早嘅階段,所以我而家俾你呢個呢,係我而家得到嘅最新數字。」

另外,警方首度承認曾使用過期催淚彈,表示「過期」只會影響發射效能,例如發射失敗,不會對公眾構成更大危險。

警方公布6.12使用彈藥數字,兩個月之間有明顯出入。眾新聞製圖

警方被問到6.12金鐘衝突至今,一直未有公布使用彈藥的確實數字。警務處副處長(行動)鄧炳強一度稱較早前已經公開數字。記者重申,未有確實數字、其他日子的數字都未有交代。警察公共關係科高級警司江永祥說:「不如等我答啦,有部分原因係因為大家每日嘅問題太熱熾,我終於可以喺度攞張紙出嚟答。」話音未落,現場記者即時起哄:「即係你唔會主動交代嘅?」、「我哋已經問咗60日。」、「其實我上次有問嘅,你哋應該主動出稿,呢啲係公眾利益。」、「呢啲資料係幾時出?」、「咁PPRB要嚟做乜嘢,你居然賴我哋唔問?」

江永祥沒有理會,只表示:「好,6月12號,我手頭上嘅資料呢,6月12號我哋總共用咗大約240發催淚彈、橡膠子彈用咗約19發。(點解仲係約數?)呢個係我哋而家嘅數字,我亦都唔敢肯定到最後會唔會有微調出現,於是乎我用約數。(個困難喺邊?)數字我都係從各個持份者,佢嘅數字度,總數加番出嚟嘅,係喇,我亦都唔敢擔保佢哋會唔會喺點算......因為我哋用彈都用咗好多日,大概會唔會有個落差或者誤差呢,呢個我唔肯定。(其他武器呢?)好喇,咁我繼續,布袋彈我哋用咗3發,另外海綿彈我哋用咗大約30發。」

換言之,警方最新數字顯示,6月12日在金鐘清場時使用了約240發催淚彈、約19發橡膠子彈、3發布袋彈、約30發海綿彈。這個數字與6月13日盧偉聰公布的:超過150發催淚彈、數發橡膠子彈、大概20發布袋彈,有明顯出入,而且盧偉聰沒有提及過海綿彈。

記者追問為何落差如此大,江永祥答:「係喇,因為同事可能去計數嘅時候,將布袋彈同海綿彈個數字撈亂。(你哋同事係咪出錯,會唔會需要徹查同處分?)、(你哋係咪專業架?連呢啲都搞唔清。)我諗我哋最初提供數字嘅時候,都係行動比較早嘅階段,所以我而家俾你呢個呢,係我而家得到嘅最新數字。」記者續質疑,警隊就用彈量的紀錄不清楚,甚至沒有紀錄。「我哋係有呢個出入彈數,我頭先都有提過,因為行動裡面牽涉嘅隊伍比較多,牽涉用嘅彈數亦都唔少,因為今次嘅行動都係比較大型。所以我覺得需要時間去確實數字,並非唔合理。」

記者再問:「但係你彈數再多,你啲同事都係即日返到嚟,最多6月13日返到嚟警署嘅時候,唔係應該即刻申報用咗幾多彈藥?」江永祥說,就這個問題沒有補充。江永祥亦承認,上星期已經取得有關數字,又稱數字重要,所以想在記者會交代。然而,上星期每日的記者會上,江永祥都沒有說過有新數字。至於其他日子,江永祥一度稱:「其實我哋上個禮拜都係咁啦,如果嗰日嘅行動唔算太繁忙嘅話,我哋第二日都會公布彈數。」鄧炳強此時接話:「或者我哋再嘗試答其他問題,呢個都答咗好耐。」

記者繼續問:「你啱啱未講埋其他日子,除咗6.12,7.27、7.28、8月3、4、5、6、10、11日(清場行動所用彈數)都係未答嘅。」(編按:7月2日凌晨在立法會外的清場行動,警方亦未有公布確實所用彈藥數目)鄧炳強又說,稍後完了記者會再提供。記者會結束後,江永祥馬上離開,眾新聞記者唯有向其他在場警員查詢,因為當時已經沒有見到警察公共關係科的傳媒聯絡人員。一名譚姓總督察表示,將在本周一或二向傳媒提供有關數字。

眾新聞記者由6月17日起,每天向警察公共關係科查詢警方在6.12及其他日子所用的彈藥數字,但每天都不獲回覆。警察公共關係科職員說得最多的一句是:「有回覆,就回覆你。」

警察公共關係科高級警司江永祥(右)。周滿鏗攝

警方再被問到有否使用過期催淚彈時,警務處助理處長(行動)麥展豪起初指,過期催淚彈不會對公眾構成更大危險,催淚彈上所標示的日期只是「最佳效能期限」,過期後只會影響發射成功的機率。他指,這些資訊是來自警方掌握的資料以及供應商。記者追問:「到底有無用過?用咗幾多?」麥展豪答道:「警方喺過去呢兩個月嘅行動裡面,正如我頭先所講,呢個係講緊最佳效能期,而警方係有,有用過嘅。但確切嘅數目字,我呢度暫時唔能夠向大家公布。」

有記者續問:「有醫學專家講過,過期催淚彈會變山埃,03年你哋講過唔會存放過期催淚彈,所以先需要補給新催淚彈,點解而家過咗期你哋都會繼續用?」麥展豪只重複說他掌握資料顯示,不會對公眾構成更大危險。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe