眾新聞 Logo
眾新聞 CitizenNews
眾說

中學教師:唔想學生受到不必要傷害


上周六,教育界發起「守護良知,守護學生」遊行。龍頭去到禮賓府,全身盡濕,龍尾卻仍在中環站。一悠攝

【撰文:王加柏】

817由香港教育專業人員協會籌辦的教師遊行,以「守護下一代, 為良知發聲」為主題,從遮打花園出發,以禮賓府為終點,路程雖短,但黃色暴雨警告下,途中不時有雨,不少老師濕透身。

在終點前的轉彎位,三名十來歲的中學生身穿黑衣站在路中,男孩說:「多謝老師支持我們。」語落,九十度向老師們鞠躬。有老師剛從樓梯下來,走近抱著學生。

老師集會在黃色暴雨中進行,有學生冒雨舉牌支持老師。一悠攝

「我希望政府回頭是岸。」吳老師在中學任教三十幾年,過去一直留意事態發展,亦有參與遊行,提到兩個月來所見,他非常氣憤:「我哋都識教學生,大家要和解,用輔導、軟性溝通方法處理事情,但係政府做咗一個好差嘅示範,用暴力解決一件原本佢可以解決到嘅事情。」吳老師直言愈壓下去、聲音只會愈大,「出嚟打啲學生,你只係想嚇到佢第日唔好出嚟。如果個政府繼續用警察力量去解決件事,件事唔會解決到。」

日前,內地《人民日報》海外版〈以法律之劍止暴制亂〉 一文提到「止暴制亂」,形容香港示威者是「激進暴力分子」。

說到暴力,在小學任教逾十年的郭老師坦言要理解行為背後的原因:「我哋喺學校教小朋友,有爭執、出手打交,都唔會即刻話佢呢度錯、個度錯,你要諗背後嘅原因,先可能解決到個行為。」郭老師指運動開初也沒有任何衝擊行為,「一百萬人嘅遊行、二百萬人嘅遊行,但係政府都無回應,佢哋就會諗係咪比多啲行動,先有人回應。」

在中學教了中文科幾年的鄧老師亦提到:「喺表達訴求嘅時候, 我相信每個學生嘅出發點都係和平同理性,但係後期點解會變成咁,係咪因為政府或者高官無聆聽佢哋嘅聲音,令到大家愈嚟愈大聲, 希望你有一日可以正視到個問題呢?」 鄧老師認為二百萬人遊行不是一個小數目,但到目前仍未見政府有正面回應;每一日只聽到政府支持警方執法,亦令他非常失望。

「每一個有良知嘅老師都唔會想學生受到不必要嘅傷害。」鄧老師知道818維園集會也會有學生參與,她坦言有點矛盾, 既是擔心學生,同時理解學生在做他們認為是正確的事,「 大家最終都只係想個社會更加好。」

而遊行隊伍中有現職老師,亦有準老師。

黃同學在香港教育大學修讀中文教育,畢業後將投身教育界。黃同學指這場運動令他更明白老師的責任:「我想學生知道老師係佢嘅避風港,係佢哋可以依靠嘅對象,無論佢有幾多無力感,都可以放係我哋度,唔駛自己一個人承受。」


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe