眾新聞 Logo
眾新聞 CitizenNews
眾說

港鐵服務嘅,其實唔係你,係權力


逆權運動係一場真正嘅政治運動,迫使香港社會好多一直被去政治化嘅地方,入面嘅政治權力關係,都一次過浮曬上面,俾世人見到香港政治嘅專制本質:由以前所謂中立嘅警察,到被詬病嘅商場,再到機場、航空公司,到今日更加明顯嘅,係鐵路;我地係時候睇清楚鐵路空間背後嘅權力關係。

* * *

平時我地會覺得,香港鐵路當然係服務香港人嘅,而佢作為一種公共服務,就係無論乘搭人嘅目的、背景係乜嘢,只要佢俾得起車費,就可以作為一個乘客咁去使用。無論係你星期一至五去返工,星期六日去街,甚至去遊行都好,港鐵喺提供服務上面大抵係中立嘅,佢唔會因為你諗住去遊行而禁止你搭車,亦唔會因為你撐警察而免費通行。

圖片來源:MTR Service Update
筆者特別鳴謝:Pepe The Frog
 

但呢一個原來只係一個美麗嘅誤會,原來政權只係一直無動用一個權力去阻止你咁做:港鐵最大股東就係特區政府,而且喺中國大陸發展眾多業務,例如深圳嘅龍華線就係由港鐵公司營運。喺尋日,葵芳站提早關閉,基本上等大部分人收工返屋企之後就關站,唔容許帶有示威目的嘅人利用葵芳站嘅空間繼續抗議。而今日星期六,更加決定中午過後就停止觀塘線整個觀塘區嘅服務,基本上就只係因為觀塘區今日有大型遊行(仲要係合法添)。

* * *

喺政治地理學上面,空間建設嘅邏輯,以至於佢嘅使用規則,基本上都係有權力嘅運作喺入面。喺香港,鐵路空間作為金融經濟嘅命脈之一,政權就會根據呢樣嘢去要求鐵路系統為現有秩序服務:八五大罷工嘅時候有唔少人搞不合作運動癱瘓港鐵,政府好大聲咁譴責,因為佢地「阻住人返工」。政府唔係真係好在意人返工嘅權利,而係在意經濟癱瘓對現有秩序嘅衝擊,會導致不利嘅政治後果。到咗非返工時間、金融假期嘅尋晚同埋今朝,地鐵就可以停葵芳站運作,甚至停埋觀塘區所有站,背後都係因為咁樣對金融城市嘅運作無乜負面影響,反而可以試圖減低危害政權穩定性嘅葵芳集會同埋觀塘遊行嘅力量。

* *
講咁多都係想講,香港地鐵服務嘅其實唔係你,只係服務權力嘅時候,有時順便服務埋你,當你嘅權利同政權利益有衝突,你就會被放棄。當政權動用嘅權力越來越赤裸,我諗我地都係時候認清我地生活每一步都係有政治嘅影響,由搭飛機到搭港鐵,我哋都無處可逃。

呢種係咩嘅政治體制?咪就係專制囉。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe