眾新聞 Logo
眾新聞 CitizenNews
眾聞

任職8年空姐被炒:國泰只係中國品牌,唔再係香港人嘅航空公司


航空業界至今有超過20人,在反送中運動期間疑因政見被辭退,個案發生在國泰港龍航空、機管局等。職工盟昨日下午在中環愛丁堡廣場舉辦集會反對白色恐怖,要求公司撤回解僱決定、停止白色恐怖等。本月遭解僱的國泰空姐林小姐(化名)亦有出席集會,她一度語帶哽咽地說:「我對公司非常失望,喺公司受打壓嘅時候,我哋員工都係團結一致想支持公司,原來公司係可以打著呢個旗號,粗暴地解僱一個員工,毋須提供任何理據。我對公司係非常失望,我感覺被背叛。」

大會在晚上宣布,有約2000人出席,警方稱高峰期有730人。記者發現,要在現場找到國泰現職員工並不容易,參加者來自各行各業,也有年輕人和正在趕寫暑期作業的中學生。參與集會的江小姐稱,她有5、6個空姐朋友,「佢哋會覺得現場有人影佢哋大頭相,然後繼續嗰個督灰嘅行動,所以佢覺得戴口罩都唔work。」、「今日呢個係反白色恐怖,但同時因為白色恐怖,佢哋全部都嚟唔到。」

大會宣布,參與反白色恐怖集會有2000人。美聯社圖片

年約30歲的林小姐在集會剛開始時已經到場,她在國泰任職空姐8年,本月遭解僱。她表示,公司拒絕透露解僱她的原因,「本身(嗰日)要返工,佢就叫我唔使返工、嚟見我哋兩個經理。我去到個會議上面,只係直接收到封解僱信,然後佢交代就係公司行使呢個權力,終止我哋嘅僱傭關係,並無提供任何原因。」林小姐指,她的工作表現、返工情況良好,猜測是與她在Facebook或WhatsApp提到反對暴力,以及發表對「五大訴求」的意見有關,被人吿發而遭解僱。

她指,在網上的言論只限朋友見到,也是她在放工之後的私人時間發表。林小姐問:「國泰你憑乜嘢去損害一個人嘅公民權利?你憑乜嘢同一個香港人講,你唔能夠喺私人時間用個人名義發表意見?」

林小姐回想8年前以加入國泰為dream job,亦是她畢業後的第一份工,「我曾經會為我喺呢間公司工作而驕傲,但係到今時今日,如果國泰仲係用呢個方式對待員工嘅話,我覺得係恥辱。如果同人講我喺呢間公司度做,大家第一反應都係:你公司對員工好衰架喎、你公司亂咁炒人架喎、你公司白色恐怖架喎,咁我無辦法搵到一個值得驕傲嘅地方。」她又說:「國泰而家只係一個中國香港品牌,佢並唔再係香港人嘅航空公司。」

國泰航空是香港品牌,但近日處於白色恐怖風眼。資料圖片

林小姐認為,國泰行政總裁何杲(Rupert Hogg)於本月中離職後,情況急轉直下,「我覺得有啲槍打出頭鳥,因為佢(Rupert)曾經發表過一個notice,就係相對傾向保障員工嘅言論自由。我覺得Rupert 離職個情況有啲似係懲罰,覺得佢無歸邊、或者無聽話,所以就要被離職。我相信佢嘅離職對公司造成一個好大嘅震撼,始終呢個情況係前所未見嘅。我自己觀察就係,前線、可能喺office嘅同事,喺Rupert離職之後都私下表態,覺得公司真係變咗。」

「Rupert離職之後,就擔心有人督灰、擔心被send資料返去公司、甚至被起底。大家都即刻靜晒,無發表任何言論,甚至喺facebook改自己個名,連自己真名都唔敢用。」她表示,明白公司為了維持運作而作出商業決定,但質疑是否有需要掀起解僱潮、製造白色恐怖,「係咪如果有一半嘅員工,喺任何渠道、或者甚至心裡面,同你或者背後俾壓力你嘅理念、意見唔一致,就全部人都要被解僱?」

集會在愛丁堡廣場舉行,集會人士於晚上6時半遊行到太古廣場並貼連儂牆。莊曉彤攝

現職國泰空姐Jenny(化名)則戴著口罩參與集會,她在國泰工作6年,亦是她畢業後第一份工,形容當年加入國泰有份優越感,「因為佢係代表香港人嘅一個品牌,但係偏偏成為第一間被中共滅聲嘅品牌,其實係令人好心痛。」

她又表示:「今日可以因為你支持反送中,然後被人以言入罪,被人炒咗,下一個可能係因為你唔夠撐警、唔夠撐政府,然後令到國家覺得你唔愛國,然後就可以炒咗你。」、「國泰、太古集團咁大間公司都要受到中共嘅威脅、跪低嘅時候,我相信香港其他企業或者小公司都無一倖免,咁我哋香港人走得去邊度呢?」

Jenny自6月9日起參與過不少大型示威活動,所以都擔心已經被「點相」,只希望今日出席集會可以讓公司聽到員工的聲音。她又表示,明白公司的難處,「但本身公司最大嘅財產其實就係員工,員工嘅權利同自由,呢啲全部用錢都買唔到。」她又指:「想話俾公司知,其實佢唔係一個人,即係唔係管理層去面對,而係成班員工同埋香港人都係支持緊佢,作為一個香港企業,佢唔應該妥協。太古作為國泰的大股東,佢更加唔應該喺呢個時候,唔企喺香港人呢邊。」

「白色恐怖,以前聽就聽得多,但係原來親身感受嘅時候、殺到埋嚟時,係無色無聲、突然之間嘅,可能上個月我仲出席緊罷工活動嘅時候,今日我可以因為like咗一個post,然後我9月2、3號,冒著無咗份工嘅風險出席罷工。」現在,她都不敢在Facebook貼一些與反送中運動相關的貼文。

參與集會的江小姐表示,身邊有幾個空姐朋友都不敢參與集會。莊曉彤攝

集會現場亦有許多人並非來自航空業界,年過30歲的江小姐便是其中一位。她表示,自己是freelancer,因為從直播見到集會現場人少,所以即刻從荃灣坐車過來。她有5、6個空姐朋友,正正因著白色恐怖而不敢出席今次集會,但他們以往都有去「和你飛」機場集會,「佢哋會覺得(今日)現場有人影佢哋大頭相,然後繼續嗰個督灰嘅行動,所以佢覺得戴口罩都唔work。」

江小姐又表示,從空姐朋友得知,6月初有人會在機艙貼memo紙建連儂牆,「到而家都仲有啲搭飛機嘅人,好好咁樣知道國泰之前做過幾個集會,佢哋會有啲小禮物或者memo紙仔,喺派餐嘅時候塞俾空少、空姐,話多謝你哋呀、香港人都好支持你哋。」

「近排有個話(空中服務員)收到張紙仔,畫咗公仔、寫話我哋都好支持你,大家一齊加油。收嗰個crew就好感動,因為好感動呢,所以落機時佢有嗌咪就講香港人加油咁樣,之後都被人捉咗上去照肺。佢哋話其實派餐時常常有架,即係啲小朋友、香港人都會(送memo紙)。本來國泰CEO被炒之前嗰幾個集會,國泰工會都有份搞,佢哋(乘客)就係知國泰工會支持,咁都會支持機艙服務員。」

國泰航空發聲明回應集會,表示:「就個別集團員工離職一事,國泰強調,公司一向的政策是不會就個別個案的處理詳情作出回應。然而,在決定是否解僱同事的時候,公司會考慮所有相關的情況,包括適用的法規,以及同事是否能夠履行職務等等。」企業事務董事唐偉邦又稱:「最近幾個月的事態發展,不論對國泰以至香港社會均是非常重大和嚴峻的挑戰。我們衷心希望盡快妥善解決紛爭,讓社會重回正軌。」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe