眾新聞 Logo
眾新聞 CitizenNews
眾說

5年後的831


【撰文:陳假】

唔經唔覺又到831, 五年前嘅831開始燃起咗香港第一度火, 經過兩個多月嘅佔領行動之後, 可為係第一次嘅革命失敗, 但係亦都揭露咗港共政府嘅真正邪惡面目。

兩年後嘅農曆新年,有一班打破咗一向以來抗爭加鎖嘅年青人走出旺角,同黑警對戰,發動咗第二次革命,可惜革命失敗嘅後果就係當中一班年青人參選俾dq,香港嘅三權分立已經畀共產黨差不多摧毀。最慘嘅係之後呢班年青人被告以暴動罪,要含冤入獄多年。

梁天琦在2016年農曆新年在旺角發生的「魚蛋革命」事件中,被控以暴動罪,判刑6年。《蘋果日報》照片

之後香港嘅社運進入低潮期,老實講當時進入低潮期嘅係包括我自己,因為當時我覺得香港團火係咪已經冇咗?香港係唔係會繼續沉淪落去?

2019年,真係喺毫無先兆底下,唔知邊個屎忽痕搞個送中條例出嚟,呢條條例真係挑起咗埋藏喺香港人心底好耐嘅恐共陰影,積藏多年嘅恐懼同怨氣,再一次將香港人團火燃起,呢團火比以前任何一次都要大,而不幸嘅係,我哋所付出嘅代價都比以前任何一次大,我哋冇咗6條人命,三隻眼,差不多近千個義士被捕。

如果今次我哋團火熄咗, 我哋唔知要等幾多年先會有下一次, 咁嗰近一千個義士咁點算?佢哋會必然受到清算!

只有眼前路,沒有身後身,團火係唔可以熄,我哋冇得返轉頭,無論幾艱難都要繼續向前行落去。

#光復香港 時代革命

美聯社

呢句口號,就係起始於當年參與魚蛋革命嘅梁天琦先生,係新東補選時候所用嘅口號。係度希望千祈唔好忘記,仍然受牢獄之苦嘅盧建民以及梁天琦等人。當中尤其係盧健文先生,佢名氣唔算太高,但係要受嘅牢獄之苦就最長,長達七年。而大家亦都必須要明白,如果呢近1000個義士要受到清算嘅話,佢哋嘅後果係不堪設想。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe