眾新聞 Logo
眾新聞 CitizenNews
眾聞

中槍男生籃球隊友:同學要團結,先對得起佢食咗呢粒子彈


中五男生曾志健於10月1日在荃灣被警員以實彈槍傷左胸,據報目前情況穩定。他就讀的Band 1學校荃灣公立何傳耀紀念中學(何中)昨日有學生罷課、逾百校友與校方對話,最終不歡而散。校門外有學生摺的紙鶴,祝福曾志健早日康復。中五級陳同學與曾志健(健仔)在初中時相識,同屬籃球校隊,「佢打得分後衛(的位置),同佢打波見到佢份人好自信,同埋喺場上都好鼓勵隊友,平時喺校園就係一個好好的人,大家都同佢可以好friend。」

戴著黑色口罩的陳同學表示:「同樣身為何中人,佢喺前線為我哋擋子彈,我哋乜都做唔到,所以我覺得真係,唉,如果佢返嚟學校,我都無面去見佢。我覺得何中同學應該要再團結,先至對得起佢食咗呢粒子彈。我哋都唔配叫何中人,因為真正的何中人,係為香港奮鬥而受咗傷。」

市民、何中校友昨早到學校門外聲援中槍的健仔。美聯社照片

中五陳同學表示,與曾志健(健仔)一齊打波三年,但健仔早前已經退隊,二人算不上熟稔,「但因為我識佢嘅好朋友,其實佢身體之前有少少狀況,所以留班,都好唔容易,有留班嘅壓力又參與示威。」他又形容健仔:「平時喺校園就係一個好好的人,大家都同佢可以好friend,絕對唔會係所謂的暴徒。」

陳同學指,周二下午收到健仔中槍的消息,非常傷心。陳同學與家人之間又有意見分歧,一夜無眠,「因為一瞇埋眼就會覺得,而家香港真係好亂,我哋作為學生係完全無任何安全感,唔知道喺條街度幾時會被人拘捕、幾時會被人用槍械傷害。我覺得,我哋成間學校嘅人都擔心自己安全。」昨日,陳同學亦有參與罷課,他所知大概有近100位同學參與,大多數時間在禮堂靜坐,期間摺了一些紙鶴、製作標語,祝福健仔早日康復。陳同學指:「副校長都話,會遲啲將我哋嘅祝福帶去醫院送俾曾同學。」他認為,校方沒有漠視罷課同學,也理解同學情緒。

何中校門外,同學為健仔摺的紙鶴。莊曉彤攝

問到陳同學對健仔中槍的感受,他緩緩說:「我首先係憤怒啦,即係點解可以對學生開槍,其次就係覺得好慚愧,就係同樣身為何中人,佢喺前線為我哋擋子彈,我哋乜都做唔到,所以我覺得真係,唉,如果佢返嚟學校,我都無面去見佢,我覺得何中同學應該要再團結,先至對得起佢食咗呢粒子彈。我哋都唔配叫何中人,因為真正的何中人,係為香港奮鬥而受咗傷。」

另一名中六陳同學,認識健仔多年,曾經在示威現場見過健仔。他形容健仔自小予人「陽光」感覺,亦都非常照顧師弟妹。健仔亦都參與籌備校內罷課的關注組。據學生所知,警方昨日沒有到過何中。

下午放學時間,30多歲的市民鍾小姐與友人到校門外派糖/朱古力,每份連同一張紙仔寫著:「多謝你們!我們一起加油!願今天約定......他朝煲底相見~ #一個都不能少」。配圖有連登豬、連登狗和Pepe。鍾小姐笑言自己是「和理非廢中」,希望為學生們打氣。

10月1日,健仔在荃灣大河道被警員近距離射擊胸口。港大學生會校園電視台影片截圖

何中校方昨早與約200多名校友會面,表示與健仔家人及代表律師了解過,盡量不想高調處理事件,並稱律師建議校方「不可以講任何嘢影響審訊」。校友一再問校方對於學生被警員近距離槍傷的立場,校長謝潤明未有明確回應,指自己未有時間看相關片段,遭校友質疑態度兒戲。校方承諾,不會處分健仔,即使健仔要面對長時間審訊,校方亦會為他保留學位。

副校長何偉雄發言時,以母子比喻中港關係的言論引起校友不滿。何說:「就好似屋企人,而家返咗屋企,就算阿爸阿媽做得好錯好錯都好,可能你哋講警察在元朗嘅事,或者一啲中港關係。我想問番就係:就算家長做到錯晒,錯得好緊要,咁究竟我哋點樣回應呢個父母?我哋係咪在屋企裡面任意打爛晒啲嘢,父母就可以知道......」校友聽到這裡已相當鼓譟,有人問:「咁你教我點做?」何偉雄表示,遊行是一個出路,又指讉責警方也解決不了問題。有校友回應他說:「遊行開始咗10分鐘都無就藍旗,你同我講和平遊行有用?」

何中校長謝潤明(中)、副校何偉雄(左)、副校劉瑞儀(右)。立場新聞直播截圖

另一位副校長劉瑞儀出言降溫,稱明白大家擔心健仔,又指健仔受傷後第一時間與她聯絡。劉瑞儀哽咽續道:「我哋無卸責、我哋唔會扔低任何一個何中同學。」校友報以掌聲,以及高呼:「加油!」有校友說:「校長、副校,今次何中唔企出嚟讉責警隊嘅話,即係你哋俾咗通行證,之後可以開第七槍、第八槍,之後再有任何一個人受傷,甚至死亡嘅話,你哋係直接成為幫兇。」會上,多名校友感觸落淚。

校長謝潤明說,自己看片只會信八成,「因為不同嘅片有不同情況。」他又稱少看了新聞。有校友表示:「我曾經以何傳耀學生為榮,我今日真係覺得與何傳耀為恥,我哋大家唔好嘥時間喇,我哋走啦。」校友臨走前舉手表態要求校方讉責警方濫暴,並高叫「師弟妹你並唔孤單」、「以何中為恥」。

戴著「V煞面具」的何中學生,在民間記者會發言。莊曉彤攝

同日下午的民間記者會,以「自由之心不死 奈何以槍斃之」為主題,在何中校門口舉行,有戴著「V煞面具」的何中學生發言,形容健仔是「可靠的大哥哥」,又指健仔經常說「寧願死都唔想被人拉」、「班狗係無性,拉你去打毋須理由」。他又希望香港人不要忘記在運動中被捕、受傷的人,「永世不原諒香港警察」。

何中校友會昨日轉載一封「一群荃灣公立何傳耀紀念中學老師的信」,信中指:「我們痛心學生承受身體上的傷害,擔憂他將要面對漫長的康復治療及訴訟。我們亦關心在校學生、校友和家長的情緒。至今,我們的心情極為沉重。」信中提及,絕不在此艱難時刻離棄同學,會給予在校學生情緒支援,並感激校友對母校的關心與愛護。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe