眾新聞 Logo
眾新聞 CitizenNews
眾說

反對暴力,更反對暴政


港府宣布《禁蒙面法》後各區再次爆發示威,不少政府建築物、港鐵及商店遭到破壞,林鄭翌日又發表錄影片段譴責暴力,呼籲市民同「暴徒」割席。筆者的回應就係,我反對暴力,但更反對暴政。

我以往在個人fb page上都講過,我的原則並非反對所有形式的暴力,至少自衛性質,人哋打你時你作反擊以自我保護,我係可以接受的。當然,近日的對市面的破壞就超過呢個原則了,我無法講我好支持呢種做法。但就算係咁,我哋都要諗返,依家一部分示威者變到咁暴力的根源係咩造成。

使用暴力,不一定是非理性,情緒化或洩憤的,使用暴力都可以是經過考慮後所作的選擇。正如打仗,夠暴力掛,但打仗所涉及的計算先多呢。又睇返,依家的破壞並非無邏輯的,並非間間舖都受攻擊,亦冇大規模搶掠,而係有針對性,經過計算的。

香港過去幾廿年的示威都係和平,係最近幾個月暴力先明顯增加。使用暴力的示威者並非一開始就愛暴力,係曾經參加過和平示威,但認為冇用,政府唔會聽和理非,只會用警察鎮壓,所以依家選擇咗暴力。簡單講,沒有暴政,沒有暴力。 所以反對暴力,更應反對暴政。

而最新的《禁蒙面法》,或者更準確講,係背後的《緊急法》, 仲衰過23條同反送中,令港府更加向暴政邁進。 就算閣下係深度和理非,不被之前關於暴力示威者的講法打動,如果你反對過23條,反對過送中,咁依家你更應該出來反對《緊急法》。

送中衰過23條,因為23條雖然係衰,但始終有明確範圍,同埋係香港審返,而送中範圍更大仲係返大陸審,更易中招兼一中死多幾錢重。《緊急法》更衰,因為政府直頭話有需要就可以立法,唔洗經立法會,佢叫就得,惡法放題,仲立即生效。政府可以任意為佢需要扭曲法律,完全違反法治最基本要求的任何人(包括政府)都要受法律約束。佢話緊急,又可以一日過送中;佢話緊急,一日過國安法:佢話緊急,拘留時間加長;佢話緊急,限制網絡;佢話緊急,戒嚴宵禁;佢話緊急,押後選舉……

邊個話唔得呀?當年國民黨宣布「動員戡亂」,總統命令可以不受憲法限制,由國共內戰1948年到台灣民主化1991年,「動員戡亂」 咗43年,當中冇舉行過立法院換屆選舉,到1991年仲有立委係1947年當選的老人家呀。(但有補選, 因為都好多人老死咗。)林鄭昨日已經講咗,政府研究緊各種現行法律下可用的手段,咪預示咗會有權用盡囉。

靠JR呀?首先香港JR搞咁耐,人哋英國首相Boris Johnson解散國會,反對派提出JR,法院急事急辦,到終院終極宣判只係用咗三個禮拜,香港立法會選舉DQ案就要審年幾兩年,都就嚟下屆選舉添啦,JR引用《緊急法》的法律都唔知要搞幾耐,到時唔知幾多人被打盲甚至打死咗啦。就算好彩贏咗, 一個人大釋法就收你香港法院皮啦。

所以大家一定要繼續,不論和理非定勇武,目標一致反對同要求撤回惡法,否則用《緊急法》一開先例, 政府為所欲為,惡法放題,真正暴政降臨。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe