眾新聞 Logo
眾新聞 CitizenNews
眾聞

爸爸告訴6歲女兒:戴口罩唔代表做錯事


 

網民於尖沙咀文化中心空地舉辦「香港警察濫用暴力侵害人權展」,展示反修例運動4個多月間,警察涉濫暴及濫捕的的重要事件及照片,又舉辦放映會,吸引市民圍觀。

一位爸爸牽著6歲女兒的手,看著放映會,又不時向女兒解釋。當片段播放至721元朗白衣人無差別打人的片段時,他握著女兒的手說:「打人呢啲你會驚,我哋睇其他先。」

爸爸帶女兒看展覽,期望女兒明白社會公義。黃思銘攝

小女孩問記者:「姐姐,點解你唔戴口罩嘅?」記者問:「咁點解你戴口罩呀?」她回答:「因為我支持香港人,但我戴口罩唔代表我做錯事。」爸爸說,曾向女兒解釋「戴口罩唔代表做錯事」、「政府成日話人唔見得光所以戴口罩,但事實唔係咁,我哋只係保障自己。」

爸爸事先知道有這個展覽,特意帶女兒到場。他說,有不反對通知書的集會,都會帶女兒出席,希望向她解釋香港發生甚麼事。「點解(示威者)明知犯法都要做到呢一步?有咩驅使到班學生由好和平嘅手段到而家升級咗?因為社會有好多唔公義嘅嘢發生。唔啱嘅嘢佢哋會受到法律制裁,但唔應該係咁對待(指警暴)。」

多人駐足看展覽。黃思銘攝

被問到對展覽最深刻印象的,爸爸說得有點激動,「去到呢一刻都係元朗721,因為香港唔應該發生咁嘅事,竟然可以有40分鐘嘅無警時分。」

對於張建宗近日叫人勿再糾纏721、大家向前看,這位爸爸指:「而家政府講嘅嘢我已經唔係好聽,佢哋只係交代俾自己聽,唔係交代俾香港人聽。咩施政報告又好,4點鐘 (警察記者會)又好,我都已經唔係好聽。」

他坦言「好擔心香港嘅未來」,但未有考慮移民,期望香港人記得香港這家園,不要再逃避,「97都試過啦,回歸嘅時候唔知前景,一大班人淨係諗自己就走。當香港個個人都唔係去諗解決問題,而去逃避,一路只會惡性循環。去到第二個97,即係2047,香港真係無,慘嘅都係下一代。」、「連最基本嘅人權都無,我睇唔到香港嘅未來,但其實好多人盡力緊。」

不少家長帶小孩來看展覽。黃思銘攝

另一位近日在前線的青年,25歲鄧先生,樂見有人舉辦展覽及放映會,認為有打破同溫層效果。「見到好多人睇展覽,冇停過,而唔係個個好似我哋咁貼。見到有人討論,咁我就有機會同佢解釋,呢啲係平時於同溫層做唔到嘅嘢。」、「好似有啲公公婆婆本身有疑問,平日冇機會問,佢哋就可以喺呢度搵人問。」

他舉例指,剛才有人討論示威者為何要「硬碰硬」、為何不打經濟戰,他便加入討論,指:「我哋何嘗唔想三罷呢?但做唔到長期,而有能力打經濟戰嗰班人,七成都係撐警嘅,經濟嘅主導權唔喺我哋手上。我哋要開始去擺脫成日想靠人嗰種心態。」

鄧先生深信,在亂世裏,人的責任顯得更重要。「我會去滲入『我哋要靠自己』嘅思想俾佢哋,每個人可以做到嘅,遠遠比自己諗嘅多 。」

展覽按不同主題指出警暴問題。黃思銘攝

  




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe