眾新聞 Logo
眾新聞 CitizenNews
眾說

當毅進警TG中大校長


過去五個月,香港的淪落度低處未算低,例子多到數都數唔到,但呢幾日的三件事,大學生被自殺,置地變戰地,大學校長被TG,我覺得都係好具代表性。第一件事,顯示當權者已經殺人唔眨眼; 第二件事,顯示當權者已經理得你商界死;但第三件事, 一個宣揚和平的上一代社會精英賢達被手握武力的毅進警兜口兜面TG,係最象徵到香港已經淪落為弱肉強食,武力為上,講和平講道理已無用的地方。

政治哲學有個 term 叫 state of nature,簡單講,在人類建立文明社會前, 人類在自然界之中,人同獸甚至人與人之間都係競爭者,強者生存弱者被食,武力決定一切。但當人類智慧增長,明白人與人合作可以食到更多食物,就有需要溝通同規矩,就發展出人際關係同社會,後來又需要有更高層次的監察同執行規矩,就變成政府和法律,開始講知識同道理了。調轉頭睇,當一個政府唔執行法律唔維護社會安定,依個政府已經係冇存在價值,不過依樣唔係今次重點。

想講係,依家香港已經越來越淪為 state of nature。班上一代精英賢達,成日講自己建立社會乜乜乜,又鐘意教人點樣成功,要讀書要溝通要妥協云云。 依家依位中大校長,讀得書多,成功人士,有社會地位,雖然唔係富豪但搵埋人工都應該唔少,建立左咁多野,sorry,喺毅進警的武力面前,你咩都唔係。同我哋講和平講溝通講妥協? 我做咩要聽你講?博士學位可以擋TG架?年薪幾百萬可以擋胡椒架?社會名譽可以擋子彈架?總之我哋警察想點咪點囉,武力在我手,驚你有牙?跟住TG一放,救到你的唔係你的學位、地位、年薪、道理、乜乜乜,係你學生手上個豬嘴呀。今次仲唔係身教:是你教我和平示威冇用的。

中大校長段崇智準備跨過二號橋,與另一端的警方協調解決僵局。EyePress照片
段崇智與警察溝通後,告訴學生協調結果,但學生不接受。EyePress照片

雖然遲咗,但校長都叫出咗嚟,而且佢都中左招啦, 所以我都唔鬧佢咁多啦。但仲有更多社會精英賢達去晒邊? 中大咁多年來積落的舊生起碼幾萬人啦, 我識D三四廿歲的都好緊張,但唔知做咩好。咁再上一代的,同校長一樣有地位名譽的,去晒邊?又簽事後聯署咁呀?我淨係知今早又有班所謂賢達聯署,都唔係講D咩呀,叫政府唔好押後區選咋。唔知好笑定好喊。

德國有個講法,當年納粹黨逼害邊個邊個,你都唔出聲,最後咪輪到你被逼害囉,應該大家都聽過,唔逐字重覆。試配落香港度?打後生仔,你唔出聲。射後生仔,你唔出聲。 TG放題,途人不分男女老幼中招,你唔出聲。商場教堂私樓大學被抄家,你唔出聲。你估你班賢達最後真係避得到咩? 到時班警察隨時入你舖入你屋搶你嘢你都無符,你一反抗就係暴徒拉你鎖你輪你。你覺得唔會呀? 當林姓主席惡過林姓特首,光頭警司惡過光頭政務司,冇晒規矩, 仲有邊個佢哋唔兇得?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe