眾新聞 Logo
眾新聞 CitizenNews
眾說

面對瀕臨失控的管治,林鄭你想挽回?我教教你


見你call哂D幕僚同事開緊急會,好似好驚咁。無論你幾想車大炮,我希望你知道,而家香港好「亂」、而呢個「亂」,係你搞出嚟,絕對唔係人民。面對瀕臨失控的管治,林鄭你想挽回?我知你好想好想,我就教教你。

林鄭的管治已瀕臨失控。美聯社

第一,唔該唔好再迷信「止暴制亂」,老實回應5大/6大訴求。事實已經證明「越止越亂」,不是嗎?(其實靜靜雞再話你聽,香港人好易管:你搞掂好基本衣食住行,然後俾地方佢搵錢發展、再俾少少民主佢、有好多人已經 Satisfy 即做港豬。你唔箍得咁實,其實根本乜事都無。乜得你咁都唔明架...)如果你老老實實回應訴求,我諗其實有好多人會收貨,社會好快會回復穩定。咁簡單的事,點解做唔到?有好多喺你權責範圍仲做到的嘢,咪做囉!有好多位,係咪要完全聽中央支笛、定係可以陽奉陰違?做完就無事了?

第二,可唔可以唔好再信你身邊的幕僚?可唔可以平衡D聽吓民主派議員意見?可唔可以唔好再信大公文匯?佢地成日散Fake News影響你判斷能力你知唔知?你身邊D幕僚其實好廢你知唔知?羅犯椒芬竟然信「天使論」同大公報,然後你去聽佢呢D人 advise?你堅決唔港獨,咁民主派議員唔港獨啦掛、佢地意見你有無聽過?點解我次次見你有乜都淨係搵建制派議員?咁都係有效管治?

第三,收起你遊花園態度,拿出真・「真誠」。我有朋友說過點考AO?就是講嘢「最識得遊花園」就得。唔怪得培養出嚟的政務官個個都係咁,只為「平衡利益」、撈份不錯的人工,完全唔係「為民服務」。唔該唔係「遊花園」,係一個人與人的對話,Please。

第一次社區公開對話是9月27日,已經是一個半前啦,林鄭。

第四,落示威區同前線公開深度對話。五個月嚟,淨係見你一大群警察圍住去過伊館,僅同一部分抽中既市民對話,咁都係對話?你夠唔夠膽直接去中大,同示威者對話(咪再一日到黑話人哋係暴徒,D「暴徒」是「好聽你話好辛苦返足學入大學最讀好書」的中大生嚟呀)?你了唔了解示威者呀(我淨係見昨晚你去酒會囉)?年青人是要公開公平公義公正的社會,唔係你施政報告D咩「買樓容易D」嘅可笑措施。我願意拎全香港男人條J出嚟同你賭你唔會肯(因為反正你都唔會肯),全港男人唔使驚。

第五,承認自己無能力再管治香港、放下你心中強烈的權力慾,可以的話、請你辭職。那句咩「如果港人主流意見認為我不適合再擔任特首,我會辭職」已經俾人回帶咗好多次,相信唔使我再講。而家咁既情況,都唔係「主流意見」?咁你句「辭職」呢?其實你辭職,雖然問題唔會解決哂,但是都會解決好多——不過以你咁好勝的性格,根本唔會咁做。你真係好可怕。(其實換個角度睇,呢班人咁難管,唔管咪仲開心,不是嗎?)

其實如果呢一刻你能夠「變番成為人類」,做上述5樣嘢,回頭是岸,我相信即刻能夠平息現時瀕臨失控的管治。方法已經俾咗你,做唔做、是你的決定。

不過,如果是做,你一早做咗啦......香港人、自求多福吧。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe