眾新聞 Logo
眾新聞 CitizenNews
眾說

區選有冇用?搶對手嘅資源同彈藥你話有冇用?


對於11月24號區議會選452個區議員,身邊的黃人持兩極嘅意見:樂觀嘅認為政府暴政激發大量素人出選同往屆無出來嘅選民投票,應該可以拿下絕大部份嘅議席;悲觀嘅認為區議會同政府一樣已然失效,加上建制派用各種不法手段例如操縱選舉劃界(gerrymandering)、種票配票、蛇齋餅糭、威逼利誘、安排交通等等確保能夠贏得絕大部份議席,黃絲出嚟投票係冇用嘅。

兩邊意見當然都有佢嘅道理。我地CDHK認為區選並唔係樂觀派咁諗會贏硬,但亦唔係悲觀派咁諗投票冇用。就算得唔過半數嘅議席,黃絲手足去投票都有以下彼消此長嘅好處:

插圖來源:文宣收集處Facebook

・重奪建制派資源,影響佢哋分贓:現時區議會係建制派分贓嘅底層,有好多小白象工程,例如觀塘音樂噴泉及灣仔摩頓臺項目,都係俾咗建制派用咗嚟派油水、私相授受。我哋重奪呢啲資源,可以減少政府亂咁洗我哋納稅人嘅錢,而轉為用作黃色經濟黃色建設嘅彈藥。亦可以影響對手嘅分贓,分贓唔匀,利益為先嘅建制派就算唔內鬨都唔會咁努力。

・削減建制派地方權力,增加我哋嘅實力:將地方變為黃色區議員支援嘅範圍,可以增加我哋喺地方嘅力量,例如「守住屋苑範圍,提供法律支援,守連儂牆,入狗屋救手足,地區動員」(摘自手足post),將來重劃選區等等。

・減少建制派地方樁腳,增加我哋下年立法會嘅勝算:資深嘅地方樁腳同我地講,立法會選舉需要大量嘅地方資源同樁腳支持,我哋攞咗佢哋嘅區議會議席,立法會選舉建制派就會失去左地方嘅支持,而我哋就會增加咗地方嘅力量。

・影響特首選舉:「區選只要過半席數,就可以攞晒選委會117席, 影響特首選舉」(摘自手足post)

・阻止假諮詢,重拾話語權:維基百科指:「現時建制派於…佔有全部十八個區議會主席席位及十七個副主席席位… 每個區議會的主席和副主席都是該區地區委員會的成員。地區管理委員會成員包括負責管理地方事務之政府部門人員,分別聽取各區議會之意見,和參照所得意見行事。」攞返呢啲主席位,就算唔過半數,都可以爭取返個話語權,政府以後施政唔會咁容易俾地區委員會開綠燈授權,趁火打劫,胡混通過。

・變相公投,同國際講香港人對暴政說不:香港嘅區議會係單議席單票制,每人每區只係會投一個人,無論真・獨立或者係泛民,都係對暴政過去五個多月來嘅殘暴投不信任票,及對「五大訴求,缺一不可」作出公投。但唔投票就唔會有呢個效果。我哋要同國際講:我哋二百幾萬人一條心,向殺人強姦嘅暴政說不! 

希望所有黃絲手足,尤其是年青嘅首投族、勇武派,可以放低武器,係11月24號拉埋戰友出嚟投票(一人至少拉三個,可以助選就更好!)唔鍾意泛民主派嘅手足,可以投第一次出選嘅真・獨立素人。記住攞身份證(唔使通知信),同查好自己選區,早D落街投,可能要排長龍,暴政亦可能使橫手提早收擋,唔好咁遲。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe