眾新聞 Logo
眾新聞 CitizenNews
眾說

習近平好頭痕!


習總書記今次頭痕啦!美聯社

【撰文:筆鳩】

一舖區議會選舉,不分和勇五大訴求嘅民意海嘯,一晚就冚過盲撐林鄭止暴制亂啲蛇齋餅糉。中共一眾北大人,以至最話得事嘅習近平總書記,係咪要從以下所講三個方向,重新思考對港政策?

 

第一,就梗係要換人,仲係要換一批人啦!民建聯今次區議會選舉俾人橫掃,黨主席李慧琼唔使半日就公開話黨中委挽留佢唔好辭去主席一職。工聯會大佬吳秋北就話,今次係非戰之罪,因為今次選舉俾「黑色恐怖」籠罩咁話。

李慧琼話黨中委挽留佢唔好辭去民建聯主席一職。EyePress照片

但假設大家坐習近平個位,對呢班黨揼咗數以億元計資源,培養咗至少二、三十年嘅呢班港共,未探清楚民意敢言直諫,只係識盲撐林鄭強推《逃犯條例》在先,之後就卸鑊林鄭,但又苦無良策幫手止暴制亂;然之後又推算唔到呢場區議會選舉會觸發破紀錄七成選民三百萬人投票,一舉重新將民意比例推返去人六我四嘅六四黃金定律,仲點可能唔使問責?

更加唔使講,習近平要點處理呢啲港共所直屬嘅中聯辦同港澳辦,仲有林鄭呢隻頭號「待」罪羔羊,以至習近平大有理由借勢清理中共治港系統中長年非其族類啲人馬。須知道,唔使一年之後,就係立法會選舉;一年流流,已經敢於抗爭嘅港人,大把嘢可以做啦。

第二,正所謂「先安內,後攘外」,喺習近平角度而言,唔講大陸內部正面臨幾多問題,單講香港反送中運動依然持續,差人一次一次生事,已經令香港不時成為國際焦點,國際社會抗共心態亦愈嚟愈大。當香港內部人事布局同香港人啲民情,都要啲時間理順番前,習近平同中共都要及時向國際社會展示更多對香港開明嘅一面,至少都要搞啲治港形象工程啦。

第三,喺芸芸「外部勢力」中,自然以美國侵侵最令習近平又愛又恨;更加大件事嘅係,侵侵已經有份《香港人權與民主法案》喺手。侵侵一簽法案,以後中共港共邊啲人準備再侵害港人啲人權時,美國就可隨時制裁佢哋,凍結佢哋喺美國啲資產,限制佢哋入境或移民美國;諸如此類啲手段,已經令香港成為中美「共管」之局。

有人話美國未必好在乎香港人,但美國就肯定好在乎藉香港可以取得嘅利益:香港位處中共前沿嘅政經戰略唔使講,經過澳門金沙賭場日日流出嗰舊大錢,都只能夠靠香港滙到美國手上。咁美國又點會唔好好利用香港呢隻咁好嘅牌,尤其不過只需要花啲lip service去捍衛香港人人權咁低成本?

香港已出現中美「共管」之局。美聯社

更加現實嘅係,中共同美國都好,都想香港有一個相對穩定嘅社會環境,即使所採手段或者有啲唔同。但喺習近平角度嚟講,佢若能夠喺香港問題釋出善意,之後美國政客仲可以同佢搞枱底交易,幫佢清除治港系統同長年土共一啲非習系人馬,都係好順理成章。

當然,以上都係習近平理性上應該諗得到要喺香港做嘅嘢;但近呢幾個月喺香港發生啲事,又往往出乎香港人啲意料之外;最慘嘅係「天威難測」,當中又涉及中共幾多官僚文化因素,以至係習近平個人究竟諗緊乜。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe